Tag: لاہور

لاہور کے نواحی علاقے کاہنہ میں میاں بیوی کے جھگڑے کے دوران مبینہ طور پر باپ نے فائرنگ کر کے 4 سالہ بیٹے کو قتل کر دیا اور خود تھانے پیش ہو گیا۔

گلشن ہاؤسنگ کالونی کا رہائشی عمر فاروق حساس ادارے کا ملازم ہے اور چھٹی پر گھر آیا ہوا تھا، میاں بیوی کے جھگڑا ہو گیا، اس دوران مشتعل ہو کر اس نے فائرنگ کر کے چار سالہ بیٹے عثمان کو قتل کر دیا، جس کے بعد خود تھانے پہنچ گیا، دادا اور ملزم کا کہنا ہے کہ حادثہ اتفاقیہ ہے۔

 لاش کا پوسٹ مارٹم کرانے پر پولیس اور لواحقین میں اختلاف ہے، پولیس کا کہنا ہے کہ پوسٹ مارٹم ضرور کرایا جائے گا اور واقعہ کی تحقیقات ہو گی، چار سالہ بچے کی اندوہناک موت سے ایک خاندان اجڑ گیا جبکہ پورے علاقے کی فضا سوگوار ہے۔

لاہور میں ضلعی انتظامیہ نے غیر قانونی تعمیرات کے خلاف آپریشن کرکے دو سو سے زائد دکانیں مسمار کر دیں۔

ضلعی انتظامیہ کے مطابق لاہور کے علاقے ریگل چوک میں کچھ روز قبل دو سو سے زائد غیر قانونی دکانیں تعمیر کی گئیں تھی جو کہ درست نقشے کے بر عکس تھیں۔

ضلعی انتظامیہ نے غیر تعمیر کی گئی دکانوں کے خلاف آپریشن کرکے تمام دکانوں کو مسمار کر دیا۔

لاہور میں دو روزہ بیوٹی ایکسپو کا انعقاد کیا گیا، نت نئے ملبوسات، جیولری اور کاسمیٹکس کی نمائش کی گئی۔

لاہور کے مقامی فائیو اسٹار ہوٹل میں دو روزہ بیوٹی ایکسپو میں بدلتے موسموں کے اعتبار سے رنگارنگ عروسی اور پارٹی ویر ملبوسات کے ساتھ ساتھ جیولری کے اسٹالز بھی لگائے گئے۔

  بیوٹی ایکسپو میں ماڈلز نے مختلف برانڈز کے خوبصورت ملبوسات اور نت نئے زیورات زیب تن کرکے ریمپ پر کیٹ واک کی، جسے شائقین فیشن نے بے پناہ سراہا اور دل کھول کر داد دی۔

  بیوٹی ایکسپو میں مردوں کے علاوہ لاہوری خواتین کی کثیر تعداد نے شرکت کی اور ایکسپو میں متعارف کروائے گئے نئے فیشن سے بے پناہ محظوظ ہوئے۔
    
   

لاہور میں دو گروپوں کے درمیان مسلح تصادم کے نتیجے میں ایک شخص جاں بحق جبکہ 10افراد زخمی ہوگئے۔

پولیس کے مطابق لاہور کے علاقہ گوالمنڈی میں دو گروپوں نے اندھا دھند فائرنگ شروع کر دی، جس کے نتیجہ میں سترہ سالہ سلیمان جاں بحق اور10 افراد زخمی ہو گئے۔

واقع کی اطلاع ملنے پر ریسکیو نے جائے وقوعہ پر پہنچ کر تمام افراد کو میو ہسپتال منتقل کر دیا جہاں زخمیوں کے اہلخانہ بھی آ گئے اور پولیس سے انصاف کی اپیل کرتے رہے۔

پولیس کی بھاری نفری نے ہسپتال پہنچ کر جاں بحق ہونے والے سلیمان کی لاش کو مردہ خانہ منتقل کر دیا اور اس واقعے میں ملوث افراد کی جلد گرفتاری کا بھی امکان ظاہر کیا ہے۔

مرید کے میں کالعدم تنظیم کے تین مبینہ دہشت گرد پکڑے گئے، ملزمان سے بھاری مقدار میں اسلحہ، دھماکا خیز مواد اور نقشے برآمد کرلئے گئے۔

لاہور میں قانون نافذ کرنے والے ادارے نے کارروائی کرتے ہوئے مریدکے سے تین مبینہ دہشتگردوں کو حراست میں لے لیا، ملزمان سے بھاری مقدار میں اسلحہ، دھماکہ خیز مواد اور نقشہ جات بھی برآمد ہوئے۔

ذرائع کا کہنا ہے کہ دہشت گردوں نے لاہور، گوجرانوالہ اور سیالکوٹ میں عید میلادالنبی کے موقع پر جلوسوں کو نشانہ بنانے کی منصوبہ بندی کررکھی تھی، ملزمان کو مزید تفتیش کے لئے نامعلوم مقامات پر منتقل کر دیا گیا۔
       

لاہور کے علاقے کاہنہ میں پولیس نے دو ڈاکو گروہوں کے سات ارکان کو گرفتارکرلیا، ملزمان سے اسلحہ، نقدی اور لوٹا ہوا سامان بھی برآمد کر لیا گیا۔ ایس پی ماڈل ٹاؤن ڈویژن طارق عزیز اور اے ایس پی کاہنہ سید اقرار حسین نے پریس کانفرنس سے خطاب کرتے ہوئے کہا ہے کہ پوما اور پانڈو ڈکیت گینگز متعدد وارداتوں میں ملوث ہیں۔

پولیس نے کارروائی کر کے دونوں گروہوں کے سات ارکان کو گرفتار کیا ہے جبکہ ملزمان کے قبضے سے اسلحہ نقدی اور لوٹا ہوا سامان بھی برآمد کیا گیا ہے۔ پولیس افسران نے بتایا کہ ملزمان نے دوران تفتیش ڈکیتی اور رہزنی کی 18 وارداتوں کا اعتراف کیا ہے۔ ملزمان ایک عرصہ سے کاہنہ اور گارڈن ٹاؤن کے علاقے میں وارداتیں کررہے تھے۔

بین الاقوامی شہرت یافتہ یافتہ گلوکار راحت فتح علی خان ٹریفک حادثے میں زخمی ہوگئے، راحت فتح کے سر اور چہرے پر چوٹیں آئیں ہیں۔

لاہور میں حادثہ بیدیاں روڈ پر اس وقت پیش آیا جب راحت فتح علی خان اپنی رہائش گاہ سے ایئرپورٹ جارہے تھے، کہ ان کی کار مخالف سمت سے آتی گاڑی سے ٹکرا گئی، راحت فتح علی خان کے سر اور چہرے پر چوٹیں آئی ہیں، انکا ڈرائیور شدید زخمی ہوا، راحت فتح علی خان نے آج بحرین روانہ ہونا تھا۔