ARYNews.tv | Urdu – Har Lamha Bakhabar

Tag: لتھوانیا

  • جعلی ریزیڈنٹ کارڈ پر لتھوانیا جانے والے مسافر ایئرپورٹ پر پکڑے گئے

    جعلی ریزیڈنٹ کارڈ پر لتھوانیا جانے والے مسافر ایئرپورٹ پر پکڑے گئے

    اسلام آباد: جعلی ریزیڈنٹ کارڈ پر لتھوانیا جانے والے چار مسافر اسلام آباد ایئرپورٹ پر پکڑے گئے ہیں۔

    تفصیلات کے مطابق ایف آئی اے امیگریشن نے اسلام آباد انٹرنیشنل ایئرپورٹ پر کارروائی کے دوران جعلی ریزیڈنٹ کارڈ پر لتھوانیا جانے کی کوشش ناکام بنا دی اور 4 مسافر آف لوڈ کر دیے۔

    ایف آئی اے کے مطابق مسافروں میں ذیشان منیر، بدر منیر، حسن جمیل اور محمد علی شامل ہیں، آف لوڈ کیے گئے مسافر آپس میں بھائی ہیں اور ان کا تعلق جہلم سے ہے، مسافروں کی جانب سے پیش کیے گئے ریزیڈنٹ کارڈ جعلی نکلے۔

    امریکی ویزا پابندیاں، پاکستانی طلبا کس طرح اس سے بچ سکتے ہیں؟ ویڈیو

    امیگریشن کلیئرنس کے دوران مسافروں کی دستاویزات کو مشکوک پایا گیا، معلوم ہوا کہ مسافروں نے سوشل میڈیا پر ایجنٹ کا اشتہار دیکھ کر اس سے رابطہ کیا تھا اور جعلی کاغذات بنوائے تھے۔

    ایف آئی اے نے ملازمت کی تلاش میں بیرون ملک جانے والے شہریوں کو خبردار کیا ہے کہ ایجنٹس آن لائن اشتہارات کے ذریعے شہریوں کو اپنے جال میں پھنساتے ہیں، اس لیے ان سے ہوشیار رہیں۔

  • طیارہ اچانک ایک گھر میں گر کر تباہ ہو گیا، دل دہلا دینے والی ویڈیو

    طیارہ اچانک ایک گھر میں گر کر تباہ ہو گیا، دل دہلا دینے والی ویڈیو

    یورپی ملک لتھوانیا میں ایک کارگو طیارہ ایئرپورٹ پہنچنے سے قبل اچانک ایک گھر میں گر کر تباہ ہو گیا، واقعے کی ایک ویڈیو سوشل میڈیا پر سامنے آئی ہے جس میں طیارے کی تباہی کا دل دہلا دینے والا منظر دیکھا جا سکتا ہے۔

    غیر ملکی میڈیا رپورٹس کے مطابق لتھوانیا میں DHL کا کارگو طیارہ گر کر تباہ ہونے سے ایک پائلٹ ہلاک، اور 3 افراد زخمی ہو گئے ہیں، مقامی حکام کا کہنا تھا کہ پیر کی صبح دارالحکومت وِلنیئس کے انٹرنیشنل ایئرپورٹ کے قریب طیارہ ایک گھر میں گر کر حادثے کا شکار ہوا۔

    طیارے نے جرمنی سے اڑان بھری تھی، جسمیں دو پائلٹ اور کمپنی کے دو ملازمین سوار تھے، دو منزلہ عمارت سے ٹکرانے کے بعد طیارے میں دھماکے سے آگ بھڑک اٹھی تھی، حکام کا کہنا ہے کہ حادثے کی تحقیقات جاری ہیں۔

    حادثے میں ہسپانوی پائلٹ ہلاک ہوا، جب کہ عمارت میں موجود 12 افراد کو بحفاظت نکال لیا گیا، ایک قریبی کمپنی کی سی سی ٹی وی کیمرے نے طیارے کی تباہی کا ہولناک منظر ریکارڈ کیا، جس میں دیکھا جا سکتا ہے کہ ایئرپورٹ کے قریب پہنچتے ہی طیارہ معمول کے مطابق نیچے اترا اور پھر ایک عمارت میں گر کر ایک بڑے گولے کی صورت میں پھٹ گیا۔

    لتھوانیا کے وزیر اعظم نے ایک بیان میں کہا کہ طیارہ اگرچہ رہائشی علاقے میں گرا لیکن خوش قسمتی سے مقامی آبادی میں جانی نقصان نہیں ہوا۔ حادثے کے بعد سامنے آنے والی تصاویر میں ڈی ایچ ایل کمپنی کے ٹریڈ مارک پیلے رنگ میں طیارے کے ٹکڑے جابجا بکھرے دیکھے جا سکتے ہیں۔

  • فوٹوگرافر نے جنگل میں‌ ایک دل دہلا دینے والی تصویر کھینچ لی

    فوٹوگرافر نے جنگل میں‌ ایک دل دہلا دینے والی تصویر کھینچ لی

    انٹرنیٹ پر ایک دل دہلا دینے والی تصویر سامنے آئی ہے جو لتھوانیا کے ایک فوٹوگرافر نے ایک مقابلے کے لیے قریبی جنگل میں‌ کھینچی تھی۔

    جب یوگنیجس نامی فوٹوگرافر کی کھینچی گئی یہ تصویر انسٹاگرام پر اپ لوڈ ہوئی تو صارفین نے اسے ’ہارر‘ فلموں کا کوئی دہشت ناک جانور قرار دے دیا۔

    دل چسپ بات یہ ہے کہ لتھوانیا کے فوٹوگرافر نے یہ تصویر ایک عالمی مقابلے کے لیے کھینچی تھی، اور جب لوگوں کو یہ علم ہوا کہ یہ کون سا ’جانور‘ ہے تو وہ مزید حیران رہ گئے۔

    تصویر دیکھ کر کوئی تصور بھی نہیں کر سکتا کہ اتنی خوف ناک نظر آنے والی شے محض ایک چیونٹی ہے۔

     

    View this post on Instagram

     

    A post shared by Pubity (@pubity)

    وائلڈ لائف فوٹوگرافر نے یہ تصویر بہت قریب سے کھینچی ہے، جس میں چیونٹی کے سر اور منھ کو دیکھ کر ایسا لگتا ہے جیسے کوئی عفریت ہے۔

    یہ تصویر 2022 کے ’نیکون اسمال ورلڈ فوٹومیکروگرافی‘ کے مقابلے میں جمع کروائی گئی تھی، یہ مقابلہ خوردبینی فوٹو گرافی کے فن کی نمائش کے لیے منعقد کیا گیا تھا، تاکہ اس سے لوگوں کو ایسی تفصیلات ملیں جسے انسانی آنکھ نہیں دیکھ پاتی۔

    تصویر دیکھ کر کچھ صارفین واقعی دنگ رہ گئے، ایک صارف نے تبصرہ کیا ’اینٹ مین کو تو ایک ہارر فلم ہونی چاہیے تھی۔‘ ایک اور صارف نے لکھا ’میں تو چیونٹیوں کو بہت پیارا سمجھتا تھا، اب میں گھبرا گیا ہوں۔‘ ایک تیسرے صارف نے تبصرہ کیا ’تصور کریں کہ ایسی ایک ملین چیونٹیاں آپ کی طرف دوڑتی ہوئی آ رہی ہیں!‘