Tag: لندن آتشزدگی

لندن: برطانوی شہر لندن کے جنوبی علاقے کے ریلوے اسٹیشن میں دھماکے بعد آگ لگ گئی، جس سے ایک شخص زخمی اور متعدد متاثر ہو گئے۔

تفصیلات کے مطابق لندن کا ایلیفنٹ اینڈ کیسل ریلوے اسٹیشن زور دار دھماکے کی آواز سے گونج اٹھا، جس کے بعد اسٹیشن پر آگ لگ گئی، جس پر 10 فائر انجنز اور 70 فائر فائٹرز نے قابو پایا۔

آگ پیر کی دوپہر کو لگی تھی، آتش زدگی کے بارے میں اسکاٹ لینڈ یارڈ کا کہنا تھا کہ واقعہ دہشت گردی کا نہیں لگتا، مقامی انتظامیہ نے کہا کہ آتش زدگی سنگین نوعیت کی تھی، تاہم آگ کی اصل وجہ معلوم نہیں ہو سکی ہے۔

لندن کے میئر پاکستانی نژاد صادق خان نے واقعے سے متعلق بتایا کہ اس میں دھوئیں سے ایک پولیس افسر سمیت 2 افراد متاثر ہوئے ہیں، واقعے میں 6 تجارتی یونٹس، 3 کاریں اور ٹیلی فون باکس جل کر تباہ ہو گیا۔

امدادی ٹیموں نے جائے وقوع پر 5 افراد کو طبی امداد فراہم کی، جن میں سے ایک زخمی کو اسپتال بھی منتقل کیا گیا، جب کہ متاثرین میں ایک پولیس افسر بھی شامل ہے۔

برطانوی میڈیا کا کہنا ہے کہ اسٹیشن پر بھڑکنے والی آگ کے شعلے کافی بلندی تک دیکھے گئے، اور دھوئیں کے بادل ہر طرف پھیل گئے، انتظامیہ کی جانب سے حفاظتی تدبیر کے تحت مقامی رہائشیوں کو گھر کی کھڑکیاں بند رکھنے کی ہدایت جاری کی گئی، دوسری طرف اسٹیشن پر آنے والی تمام ٹرینوں کو روک دیا گیا۔

پولیس کا کہنا ہے کہ واقعہ دہشت گردی کا معلوم نہیں ہوتا تاہم اس سلسلے میں تحقیقات کی جا رہی ہیں۔