لندن: وزیراعظم شہباز شریف کی لندن میں اور نوازشریف سے ملاقات میں انتخابات مقررہ وقت پر کرانے پر اتفاق کرلیا گیا۔
تفصیلات کے مطابق وزیراعظم شہبازشریف لندن میں موجود نوازشریف سے ملاقات کے لئے حسن نواز کے دفتر پہنچے، شہبازشریف کو برطانوی سیکیورٹی پروٹوکول میں لایا گیا۔
وزیراعظم اور نوازشریف کے درمیان ملاقات ساڑھے تین گھنٹے جاری رہی، سابق وزیرخزانہ اسحاق ڈار، حسن نواز، سلیمان شہبازبھی ملاقات میں موجود تھے۔
ملاقات میں سیلاب، اہم ملکی معاملات اور پنجاب کی سیاست پر تبادلہ خیال کیا گیا۔
ملاقات میں پنجاب حکومت کی ممکنہ تبدیلی کے بعد وزیراعلی کے لئے حمزہ شہباز اوردیگر ناموں پر بھی غور کیا گیا۔
دونوں رہنماؤں نے اتفاق کیا کہ جنرل الیکشن مقررہ وقت پرہی کرائے جائیں۔
خیال رہے وزیر اعظم شہباز شریف آج آنجہانی ملکہ الزبتھ دوم کی آخری رسومات میں شرکت کریں گے، جس کے بعد وہ جنرل اسمبلی اجلاس میں شرکت کیلئے نیویارک روانہ ہوں گے۔
