شام میں بشار الاسد کے اقتدار کا سورج غروب ہونے کے بعد شامی عوام نے جشن منایا ساتھ ہی صدارتی محل پر دھاوا بول کر قیمتی اشیا بھی لوٹ لیں۔
شام میں بشار الاسد کے 24 سالہ اقتدار کے خاتمے اور حریف فورسز کی جانب سے دمشق کا کنٹرول سنبھالنے کے بعد ہزاروں کی تعداد میں عوام سڑکوں پر نکل آئی۔
لوگوں نے جشن منانے کے بعد بشار الاسد کے اقتدار میں ہونے والی زیادتیوں کا غصہ توڑ پھوڑ اور صدارتی محل میں لوٹ مار کر کے نکالا۔
دمشق اور حلب میں مشتعل عوام نے بشار الاسد کے والد حافظ الاسد کے مجسمے گرا دیے اور فوج کے چھوڑے ہوئے ٹینکوں پر چڑھ گئے۔
شامی عوام جھنڈے کے ساتھ فوجی ٹینکوں پر کھڑے ہوکر تصاویر بناتے رہے۔ لوگوں کی ایک بڑی تعداد صدارتی محل میں داخل ہو گئی۔
اس موقع پر عوام نے وہاں سیلفییز اور ویڈیوز بھی بنائیں جب کہ کئی لوگ وہاں قیمتی اشیا جن میں ملبوسات، فرنیچر، ہینڈ بیگز، فانوس ودیگر سامان لوٹ کر لے جاتے دکھائی دیے۔
عوام کے ساتھ باغی فورس بھی محل میں داخل ہوگئی اور رپورٹ کے مطابق باغیوں نے عمارت میں توڑ پھوڑ کی اور اسد خاندان کی تصویروں کو بھی نقصان پہنچایا۔
واضح رہے کہ اس سے قبل جب شامی باغی فوج نے نے دمشق پر قبضہ کیا تب بشار الاسد شہر چھوڑ کر فرار ہو گئے تھے اور کوئی بھی نہیں جانتا تھا کہ وہ کہاں گئے۔ بعد ازاں روسی میڈیا کی جانب سے اطلاع سامنے آئی ہے اسد اور ان کا خاندان ماسکو میں موجود ہے، جہاں روس نے سیاسی پناہ فراہم کی ہے۔
دوسری جانب گزشتہ روز بشار الاسد کے اقتدار کا سورج غروب ہوتے اور مفرور ہوتے ہی مختلف شہروں میں عوام سڑکوں پر نکل آئے۔ عوام نے صدارتی محل پر دھاوا بول دیا۔
مظاہرین نے ایران کے سفارتخانے پر بھی حملہ کرکے غصہ نکالا اور توڑ پھوڑ کی، تاہم ایران کا سفارتی عملہ پہلے ہی لبنان جا چکا تھا۔
