Tag: لوڈشیڈنگ

کراچی (25 جولائی 2025): سندھ ہائیکورٹ نے غیر اعلانیہ لوڈشیڈنگ پر کے-الیکٹرک اور نیپرا حکام پر شدید برہمی کا اظہار کیا جبکہ اتھارٹی کو بجلی کمپنی کے مکمل سروے کا حکم دے دیا۔

سندھ ہائیکورٹ کے جسٹس فیصل کمال اور جسٹس حسن اکبر نے جماعت اسلامی کی غیر اعلانیہ لوڈشیڈنگ کے خلاف درخواست پر سماعت کی۔ اس موقع پر ان کا کہنا تھا کہ 2020 میں سی ای او کے-الیکٹرک نے کہا تھا کہ صفر لوڈشیڈنگ کی جا رہی ہے، اب 2025 میں تو کہیں لوڈشیڈنگ نہیں ہو رہی ہوگی؟

فاضل جج صاحبان نے ریماکس دیے کہ کراچی میں تھوڑی سی بارش کیا ہوتی ہے بجلی 3، 3 گھنٹے بند ہو جاتی ہے، نجکاری کے بعد کے ای نے اپنے انفراسٹرکچر میں کیا بہتری کی؟ بتایا جائے کے-الیکٹرک نے اپنے یوٹیلٹی سروس میں کیا بہتری کی ہے؟

یہ بھی پڑھیں: لوڈشیڈنگ پر سڑک بند کرنے سے کیا بجلی بحال ہو جائے گی؟

اس پر نیپرا کے وکیل نے بتایا کہ ہمارا جو اختیار ہے وہ کرتے ہیں۔ فاضل جج صاحبان نے کہا کہ نیپرا کیا کر رہا ہے کراچی میں 12، 12 اور 18، 18 گھنٹے کی لوڈشیڈنگ ہو رہی ہے۔

وکیل نیپرا نے بتایا کہ نیپرا نے کے-الیکٹرک کو شوکاز نوٹس جاری کیے اور جرمانہ بھی عائد کیا گیا، حال ہی میں کے-الیکٹرک پر 20 ملین روپے کا جرمانہ عائد کیا گیا۔

عدالت نے استفسار کیا کہ شوکاز اور جرمانوں سے لوڈشیدنگ پر کیا فرق پڑا، کراچی والوں کی صحت پر کیا فرق پڑا؟ کیا کراچی میں بجلی کی لوڈشیڈنگ کا مسلہ حل ہوگیا ہے؟

جسٹس فیصل کمال نے استفسار کیا کہ نیپرا کے پاس ٹیکنکل ٹیم ہے یا نہیں؟ جب سے کے ای پرائیویٹ ہوا ہے کتنا انفراسٹرکچر بہتر کیا گیا ہے؟

سندھ ہائیکورٹ نے نیپرا کو کے-الیکٹرک کا مکمل سروے کرنے کی ہدایت کرتے ہوئے کہا کہ معلوم کیا جائے بجلی کمپنی کی نجکاری کے بعد انفراسٹرکچر میں کیا بہتری آئی؟

عدالت نے 12 اگست 2025 کو نیپرا اور کے-الیکٹرک سے پیشرفت رپورٹ طلب کر لی۔

کراچی: کے الیکٹرک نے شہر میں ایک اور علاقے کو لوڈشیڈنگ سے مستثنٰی قرار دے دیا،لوڈشیڈنگ کا خاتمہ کے ای اور علاقہ مکینوں کے اشتراک سے ممکن ہوا۔

تفصیلات کے مطابق کے الیکٹرک حکام نے کراچی میں فوارہ چوک کے علاقے میں لوڈشیڈنگ مکمل طور پر ختم کردی۔

چیف ڈسٹری بیوشن اینڈ مارکوم آفیسر سعدیہ دادا نے کہا کہ فوارہ چوک کے مکین مبارکباد کے مستحق ہیں، لوڈشیڈنگ کا خاتمہ کےالیکٹرک اور علاقہ مکینوں کےاشتراک سے ممکن ہوا۔

ان کا مزید کہنا تھا کہ کےالیکٹرک 2030 تک95 فیصدکراچی میں لوڈشیڈنک ختم کرنے کیلئے پُرعزم ہے۔

مزید پڑھیں : کے الیکٹرک نے کن علاقوں کو لوڈشیڈنگ سے مستثنیٰ قرار دے دیا

یاد رہے دو ماہ قبل کے الیکٹرک نے بجلی چوری کے خلاف موثر کارروائیوں کے بعد متعدد علاقے لوڈشیڈنگ سے مستثنیٰ قرار دیئے تھے۔

ترجمان نے بتایا تھا کہ نصرت بھٹو موڑ، منگھوپیر روڈ، ہالاری میمن سوسائٹی، مسلمانانِ پنجاب سوسائٹی، کٹھیاوار سوسائٹی اسکیم 33، سائمہ ولاز سپر ہائی وے، چپل اپ ٹاؤن، ندیم ایونیو، وی آئی پی ویو، علی ریزیڈنسی، الغفور ایٹریئم ٹاور، صباء ایمپیریل اور نارتھ کراچی کے سیکٹرز 5-سی3، 5-سی4 اور 11-اے کو لوڈشیڈنگ سے مکمل استثنیٰ حاصل ہو چکا ہے۔

اس کے ساتھ ساتھ مانو میرانی گوٹھ، شاہ لطیف ٹاؤن تا گلشنِ حدید، منگھوپیر، نصرت بھٹو کالونی، علیزے گارڈن، گلستانِ احمد، باغِ حسن کالونی، قاسم آباد، قصبہ، اسلامیہ، ایم پی آر کالونی، صدیقِ اکبر محلہ اور اقبال گوٹھ سمیت دیگر کئی علاقے شامل تھے۔

کراچی: میٹرک امتحانات کے دوران امتحانی مراکز میں لوڈشیڈنگ کے باعث طلبہ گرمی میں پرچے حل کرنے پر مجبور ہیں، جس سے شدید مشکلات کا سامنا ہے۔

تفصیلات کے مطابق کراچی میں میٹرک امتحانات کے دوران شدید لوڈشیڈنگ جاری ہے، مختلف امتحانی مراکز میں بجلی غائب ہونے کی وجہ سے طلبا و طالبات کو شدید مشکلات کا سامنا کرنا پڑا۔

جہانگیر روڈ، جمشید روڈ، لیاری اور اورنگی کے مراکز بجلی سے محروم رہے ، جس کے باعث گرمی میں طلبہ پرچے حل کرنے پر مجبور ہوگئے۔

امتحانی مراکز میں پنکھے بند، کلاسز اندھیرے میں ڈوبی رہی جبکہ امتحانی عملہ بھی بجلی کی بندش سے شدید متاثر ہیں۔

والدین اور اساتذہ نے مطالبہ کیا ہے کہ امتحانی اوقات میں بجلی فراہم کی جائے، لیاری، اورنگی، بن قاسم ٹاؤن میں 6 سے 8 گھنٹے کی لوڈشیڈنگ کی جارہی ہے۔

گذشتہ روز امتحانی مراکز کے حوالے سے ترجمان کے الیکٹرک نے بتایا تھا کہ کراچی میٹرک بورڈ کی جانب سے امتحانی مراکز کی تفصیلی لسٹ موصول ہوئی ہے، کےالیکٹرک محکمہ تعلیم کے ساتھ مکمل تعاون کریگا تاکہ امتحانات کے دوران طلبہ کو کسی قسم کی کوئی رکاوٹ پیش نہ آئے۔

امتحانات کے اوقات میں امتحانی مراکز کو لوڈشیڈنگ سے مستثنیٰ رکھنے کا عمل پہلے ہی شروع کر دیا گیا ہے جبکہ امتحانی مراکز پر بجلی سپلائی کے حوالے سے محکمہ تعلیم سے کوئی شکایت موصول نہیں ہوئی۔

ترجمان کا کہنا تھا کہ محکمہ تعلیم سے اس سلسلے میں مکمل رابطے میں ہیں اور کےالیکٹرک بطور ذمہ دار سماجی ادارہ، امتحانات کے انعقاد کے حوالے سے ہر ممکن تعاون فراہم کر رہا ہے۔

کراچی : کے الیکٹرک سی ای او مونس علوی نے خبر دار کیا ہے کہ جہاں پر بل جمع نہیں ہوگا وہاں 18 گھنٹے بھی لوڈشیڈنگ ہوسکتی ہے۔

تفصیلات کے مطابق سندھ اسمبلی کی خصوصی کمیٹی کا فیاض بٹ کی زیرصدارت اجلاس ہوا، اجلاس میں کے الیکٹرک، حیسکو اور سیپکو کے چیف ایگزیکٹو شریک ہوئے، اجلاس میں سندھ اسمبلی میں اپوزیشن لیڈر علی خورشیدی نے بھی شرکت کی۔

چیئرمین کمیٹی فیاض بٹ نے کہا کہ پاورکمپنیوں کوہدایت دی ہے ایم پی ایزسےملاقاتیں کریں، سی ای او کے ای کارویہ ٹھیک نہیں تھا، ہم پاور کمپنیوں کے ساتھ بیٹھ کرمسائل حل کرنا چاہتے ہیں۔

اپوزیشن لیڈرسندھ اسمبلی علی خورشیدی کا کہنا تھا کہ کے الیکٹرک میں کالی بھیڑیں موجودہیں، سی ای او کے الیکٹرک کو بتایا 18 گھنٹے لوڈشیڈنگ ہورہی ہے۔

علی خورشیدی کا کہنا تھا کہ بجلی چوری اور جنریٹر مافیا کے ساتھ کے ای کاعملہ ملا ہوا ہے، رات کو2  بجے بھی لوڈشیڈنگ ہوتی ہے، مسائل حل نہ ہوئے تو لوگ آؤٹ آف کنٹرول ہو جائیں گے۔

اجلاس میں کے ای کے سی ای او سے ارکان اسمبلی کی تلخ کلامی بھی ہوئی، عامر صدیقی نے کہا کہ کراچی میں 14 گھنٹے لوڈ شیڈنگ ہورہی ہے، کوئی قانون ہی نہیں، نیپرا قانون پرعمل نہیں کرارہا ہے۔

سی ای او کے ای نے واضح کیا کہ جہاں پر بل جمع نہیں ہوگا 18 گھنٹے بھی لوڈشیڈنگ ہوسکتی ہے، ہم بجلی کاٹنے جاتے ہیں ہمارے ملازمین پر حملے ہوتے ہیں۔