Tag: لوڈشیڈنگ

کراچی : شہر قائد میں قیامت خیز گرمی میں لوڈشیڈنگ کا دورانیہ بڑھ کر 15گھنٹے تک جا پہنچا، شہری بلبلا اٹھے، حکومت اور کے الیکٹرک کو کھری کھری سنادیں۔

تفصیلات کے مطابق کراچی میں بجلی کی لوڈشیڈنگ کا بحران مزید سنگین ہوگیا اور لوڈشیڈنگ کا دورانیہ بڑھ کر 15گھنٹے تک جا پہنچا، جس سے شہریوں کے صبر کے پیمانہ لبریز ہونے لگا۔

ترجمان کا کہنا ہے کہ کے الیکٹرک کا بجلی کا شارٹ فال 800 میگاواٹ تک پہنچ گیا ہے ، بجلی کی کمی کو لوڈ شیڈنگ کے دورانیےمیں اضافے سے پورا کیا جارہا ہے۔

نارتھ کراچی ، سرسید ٹاون، شاہنواز بھٹو کالونی، یوسف گوٹھ ، گڈاپ، کاٹھور، لانڈھی، ملیر ۔ شاہ فیصل کالونی، ہجرت کالونی ، لیاقت آباد، رنچھوڑلائن، پی آئی بی کالونی، جمشید روڈ ، اورنگی ٹاؤن، شاہ فیصل کالونی، بلدیہ اور اتحاد ٹاون میں بجلی معطل ہے۔

ترجمان کے الیکٹرک نے دعویٰ کیا ہے کہ کراچی میں غیراعلانیہ لوڈشیڈنگ نہیں کی جارہی ، لوڈ شیڈنگ کی جو صورتحال کراچی میں ہے، اس کا تعلق ملکی سطح پر بجلی کے شارٹ فال سے ہے۔

ترجمان نے بتایا کہ 24 گھنٹے کے دوران کراچی کو2700 میگاواٹ بجلی فراہم کی گئی، نیشنل گرڈ سے حاصل ایک ہزار میگا واٹ بجلی بھی شامل ہے، گرمی کی شدت بڑھنے کے باعث بجلی کی طلب میں اضافہ ہوا۔

کے الیکٹرک کے ترجمان نے کہا کہ شارٹ فال کے باعث رات کے اوقات میں مجبوراً لوڈشیڈنگ کی جارہی ہے کیونکہ قدرتی گیس کی عدم فراہمی کے باعث 2پاور پلانٹس بند ہیں۔

شہریوں کا کہنا ہے کہ سو فیصد ریکوری والے علاقوں میں بھی دن رات بجلی نہیں رہتی، کے الیکٹرک کو کوئی پوچھنے والا نہیں۔

یاد رہے گذشتہ روز ماڑی پور میں لوڈشیڈنگ کےخلاف علاقہ مکینوں نے شدید احتجاج کیا تھا، جن پر پولیس نے نہ صرف گلیوں میں گھس کر تشدد کیا تھا بلکہ بے انتہا شیل بھی فائر کیےگئے تھے۔

کراچی : شہر قائد میں لوڈ شیڈنگ کا دورانیہ 12 گھنٹے تک پہنچ گیا جبکہ مستثنی علاقوں میں بھی ایک گھنٹے کی لوڈ شیڈنگ تین سے 4 بار ہورہی ہے۔

تفصیلات کے مطابق کراچی کے مختلف علاقوں میں بدترین لوڈشیڈنگ جاری ہے ، کےالیکٹرک نے لوڈشیڈنگ کے دورانیہ میں اضافہ کردیا ہے۔

نئے شیڈول کے مطابق شہر میں سحری کے اوقات میں بھی لوڈشیڈنگ کی جائے گی ، کے الیکٹرک نے سحری کے وقت صارفین کو لوڈ شیڈنگ کے ایس ایس ایم بھی بھیجے ، جس میں صارفین سے لوڈ شیڈنگ کے دورانیے میں اضافے میں معزرت بھی کی گئی ہے۔

شہر کے مختلف علاقوں میں لوڈ شیڈنگ کا دورانیہ 12 گھنٹے تک پہنچ گیا جبکہ لوڈ شیڈنگ سے مستثنی علاقوں میں بھی ایک گھنٹےکی لوڈ شیڈنگ تین سے 4 بار کی جا رہی ہے۔

لوڈشیڈنگ سے متاثرہ علاقوں میں گلستان جوہر،بھینس کالونی،میٹروول سائٹ،رزاق آباد ، میمن گوٹھ،گڈاپ،گلشن معمار،ماڈل کالونی،شاہ فیصل کالونی شامل ہیں۔

اس کے علاوہ کھوکھراپار،کورنگی،خواجہ اجمیرنگری،ملیر،اخترکالونی منظورکالونی،کشمیرکالونی،نیوکراچی،سرجانی ٹاؤن،تیسرٹاؤن میں لوڈشیڈنگ جاری ہے۔

شہر میں ہائی لاس ایریاز میں لوڈ شیڈنگ کا دورانیہ 12 گھنٹے سے زائد کر دیا گیا جبلپ کم چوری والے علاقوں میں بھی لوڈ شیڈنگ کا دورانیہ 6 گھنٹے سے زائد ہوگیا ہے۔

شہریوں کا کہنا ہے گرمیاں شروع ہوتے ہی کے الیکٹرک اپنا رنگ دکھانا شروع کر دیتی ہے۔

کراچی: فردوس شمیم نے وفاقی حکومت سے کراچی میں بجلی و گیس لوڈشیڈنگ پر سخت ایکشن لینے کا مطالبہ کر دیا ہے۔

تفصیلات کے مطابق قائد حزب اختلاف فردوس شمیم نقوی نے آج وفاقی وزرا علی زیدی اور شیریں مزاری سے وفد کے ہمراہ ملاقات کی، جس میں سندھ کی سیاسی صورت حال اور دیگر سیاسی امور پر تبادلہ خیال کیا گیا۔

فردوس شمیم نقوی نے وفاقی وزرا کو بلدیاتی ایکٹ کا مسودہ بھی پیش کیا اور اس حوالے سے مسائل سے آگاہ کیا۔ انھوں نے بتایا کہ شہر میں بلدیاتی مسائل شدت اختیار کر چکے ہیں، سندھ حکومت شہر کی ترقی میں سب سے بڑی رکاوٹ ہے۔

انھوں نے کہا کہ بلدیاتی مسائل کے علاوہ کراچی میں بجلی اور گیس کا مسئلہ بھی شدت اختیار کر رہا ہے، وفاقی حکومت شہر میں بجلی اور گیس کی لوڈ شیڈنگ پر سخت ایکشن لے۔

واضح رہے کہ شہر قائد میں کے الیکٹرک کی جانب سے 12 سے 18 گھنٹے طویل لوڈ شیڈنگ کی جا رہی ہے جس نے شہریوں کی زندگی اجیرن بنا دی ہے، دن کے ساتھ ساتھ رات 12 بجے سے 4 بجے بھی لوڈ شیڈنگ کا سلسلہ شروع کر دیا گیا ہے، جس کی وجہ سے شہریوں کی رات کی نیند اور دن کا چین غارت ہو چکا ہے۔

خیال رہے کہ چیف جسٹس سپریم کورٹ اور نیپرا کے احکامات کے باوجود کے الیکٹرک شہر بھر میں لوڈ شیڈنگ کر رہا ہے۔ اس کے ساتھ ساتھ اب گیس کی لوڈ شیڈنگ بھی شروع ہو گئی ہے، مختلف علاقوں میں جیسے ہی بجلی جاتی ہے، گیس بھی بند ہو جاتی ہے۔