Tag: لوڈ شیڈنگ

کراچی: شہر قائد کے مختلف علاقوں میں بجلی کی عدم فراہمی پر شہری سراپا احتجاج بن گئے۔

تفصیلات کے مطابق نارتھ کراچی میں رات گئے علاقہ مکینوں نے کے الیکٹرک آفس کے سامنے دھرنا دیا، قائد آباد، داؤد چورنگی اور ملیر معین آباد میں بھی بجلی کے ستائے شہری سڑکوں پر نکل آئے۔

کراچی میں بارش کے موسم میں بھی 10 سے 14 گھنٹے لوڈ شیڈنگ نے بجلی کے ستائے شہریوں کو دھرنا دینے پر مجبور کر دیا، احتجاج کے دوران مظاہرین نے کے الیکٹرک کے خلاف شدید نعرے بازی کی۔

قائد آباد داؤد چورنگی کے قریب بجلی کی بندش کے خلاف مکینوں نے احتجاج کرتے ہوئے سڑک پر ٹائر جلائے اور سڑک کو ٹریفک کے لیے بند کر دیا۔

کراچی کے مختلف علاقوں میں رات گئے بجلی کی لوڈ شیڈنگ کا سلسلہ بھی جاری ہے، مظاہرین کا کہنا تھا کہ رات 11 سے صبح 5 بجے تک لوڈ شیڈنگ کا سلسلہ جاری رہتا ہے، جس نے ہماری زندگی اجیرن بنا دی ہے۔

احتجاج کے دوران نارتھ کراچی سیکٹر فائیو سی 2،3، سیکٹر الیون سی ون، ٹو میں لوڈ شیڈنگ کی جا رہی تھی، لیاری، رامسوامی، لانڈھی، ملیر، معین آباد، ناظم آباد، نارتھ ناظم آباد میں بھی بجلی بند رہی۔

کورنگی، لیاقت آباد، پاک کالونی، پی ای سی ایچ ایس، کلفٹن، ڈی ایچ اے، قیوم آباد اور بھٹائی کالونی میں بھی بجلی کی لوڈ شیڈنگ کا سلسلہ جاری ہے۔

کراچی: کے الیکٹرک نے شہر میں رات کو اچانک لوڈ شیڈنگ کے دورانیے میں اضافہ کر دیا۔

تفصیلات کے مطابق شہر کراچی میں درجہ حرارت میں اضافے اور بن قاسم پاور پلانٹ 3 بند ہونے کے بعد لوڈ شیڈنگ میں بھی اضافہ ہو گیا ہے۔

کے الیکٹرک نے لوڈ شیڈنگ سے مستٹنیٰ علاقوں میں لوڈ شیڈنگ کا دورانیہ ڈیڑھ گھنٹے سے بڑھا کر 2 گھنٹے کر دیا، ان علاقوں میں دو گھنٹے کی 3 بار یعنی 6 گھنٹے کی لوڈ شیڈنگ کی جا رہی ہے۔

جن علاقوں میں رات کے وقت لوڈ شیڈنگ کی جا رہی ہے ان میں لیاری، جیل روڈ، حیدر آباد کالونی، پرانی سبزی منڈی، لیاقت آباد ڈاکخانہ، پی آئی بی کالونی، جمشید روڈ، اختر کالونی، محمود آباد، کشمیر کالونی، اعظم بستی، اسکیم 33 کے مختلف علاقے، کاٹھور، گلستان جوہر، رضویہ سوسائٹی، گلبہار، پاک کالونی، منگھو پیر، منظور کالونی، پہاڑ گنج، قصبہ، اورنگی، کورنگی لانڈھی، سائٹ میٹروول، نارتھ کراچی، یو پی موڑ، کلیانہ ٹاؤن، بہادر آباد طارق روڈ، احسن آباد، گلشن معمار، رزاق آباد، گلشن حدید، شاہ لطیف ٹاؤن، کیماڑی اور ماریپور شامل ہیں۔

ذرائع کا کہنا ہے کہ وفاقی حکومت اور نیپرا کی ہدایت کے خلاف رات کو بلا تفریق مختلـف علاقوں میں بجلی بند کی جا رہی ہے۔

ادھر بن قاسم کا نیا پلانٹ بند ہونے کی وجہ سے پرانے بن قاسم ون پاور پلانٹ سے صرف 250 سے 300 میگا واٹ بجلی پیداوار حاصل ہو رہی ہے۔

ذرائع کے مطابق کے الیکٹرک کی بلنگ کی مکمل ریکوری والے علاقوں میں بھی بجلی بند کی جا رہی ہے، شہر کے مختلف علاقوں دن اور رات میں لوڈ شیڈنگ کا دورانیہ 10 سے 15 گھنٹے سے بھی تجاوز کر گیا ہے۔

دوسری جانب سے حسب معمول کے الیکٹرک نے تردید کی ہے کہ شہر میں کہیں بھی اضافی لوڈ شیڈنگ نہیں کی جا رہی ہے۔