بشنوئی گینگ کی دھمکیوں کے باوجود سلمان خان اپنا ووٹ کاسٹ کرنے پہنچ گئے، انھیں چاروں طرف سے باڈی گارڈز نے گھیرا ہوا تھا۔
بھارتی ذرائع ابلاغ کے مطابق سلمان خان حال ہی میں لوک سبھا الیکشن 2024 کے پانچوں فیز کے لیے اپنا ووٹ ڈالنے ممبئی میں واقع پولنگ اسٹیشن پہنچے۔ اس دوران دبنگ خان نے گرے رنگ کی ٹی شرٹ اور کالی پینٹ پہنی ہوئی تھی جبکہ سیا سن گلاسز بھی لگائے ہوئے تھے۔
اداکار ممبئی میں ہونے والے انتخابات میں اپنا حق رائے دہی استعمال کرنے کے لیے گاڑی سے باہر نکلے تو ان کے ہمراہ سخت سیکیورٹی تھی جبکہ پاپا رازی فوٹو گرافرز نے ان کی فوٹوز کھینچنا شروع کردیں۔
ٹائیگر 3 اسٹار نے چند روز قبل اپنے مداحوں سے بھارتی لوک سبھا کے الیکشن میں ووٹ کا حق استعمال کرنے کی اپیل کی تھی۔
انھوں نے اپنے ٹوئٹر پوسٹ میں لکھا تھا کہ ’میں سال میں 365 دن ورزش کرتا ہوں، چاہے کچھ بھی ہو اور اب میں 20 مئی کو اپنے ووٹ کا حق استعمال کرنے جا رہا ہوں، چاہے کچھ بھی ہو۔‘
انھوں نے مزید لکھا تھا کہ ’اس لیے جو کچھ کرنا ہے کرو یار، لیکن جاؤ اور ووٹ دو اور اپنی بھارت ماتا کو پریشان نہ کرو .. بھارت ماتا کی جے‘۔
خیال رہے کہ کچھ دنوں پہلے بشنوئی کمیونٹی کے صدر دیویندر بودیا نے کہا تھا کہ سلمان خان اگر آکر ہم سے خود معافی مانگتے ہیں تو ہم انھیں معاف اور ان کی جان بخشی کر سکتے ہیں۔
بشنوئی کمیونٹی کے صدر کا یہ بیان سلمان خان کی سابقہ دوست سومی علی کی جانب سے معافی نامہ جاری کرتے ہوئے اداکار کو معاف کرنے کی اپیل کرنے کے بعد سامنے آیا تھا۔
اس سے قبل لارنس بشنوئی نے نیشنل انویسٹی گیشن ایجنسی حکام کے سامنے اس بات کا انکشاف کیا ہے کہ وہ سُپر اسٹار کے قتل کی منصوبہ بندی کر چکا تھا۔
گینگسٹر نے بتایا کہ سلمان خان کا نام میرے 10 اہم ٹارگیٹس کی فہرست میں تھا، ہم ممبئی میں اداکار کی رہائش گاہ کی ریکی بھی کر چکے تھے لیکن مجھے گرفتار کرلیا گیا۔
