Tag: لوک کہانی

صدیوں پہلے کسی شہر میں ایک بے اولاد جوڑا رہتا تھا۔ دونوں بوڑھے ہوچکے تھے اور گزر بسر مشکل سے ہوتی تھی، لیکن بڑے میاں کی بیوی اب بھی جوانی کی طرح بد مزاج اور ناشکری ہی تھی۔ اپنے شوہر پر طنز کے تیر برسانا اور کسی نہ کسی بات پر جھگڑا کرنا جیسے اس کا وظیفہ تھا۔

یہ دونوں غربت کے مارے ہوئے تھے اور انہیں ایک پرانی پن چکی میں رہنا پڑ رہا تھا جس کا ڈھانچا خستہ حال تھا اور بارش ہوتی تو چھٹ ٹپکنے لگتی۔ ایک روز بوڑھے کے ہاتھ بہت ہی خوب صورت سنہری پرندہ لگا اور وہ اسے اپنے ٹھکانے پر لے آیا۔ بڑی بی نے اس پر بھی خوب جھگڑا کیا مگر پھر چپ ہو رہیں۔ اگلے دن بوڑھا جب اس پرندے کے پاس گیا تو حیران رہ گیا۔ وہ انسانوں کی طرح بوڑھے سے مخاطب ہوا اور کہنے لگا، ’’بڑے میاں! میرے چھوٹے بچّے بھوکے ہوں گے، میں انہیں چوگا کھلاتا ہوں، مہربانی کر کے مجھے چھوڑ دیجیے، میں آپ کو ایک ایسا تحفہ دوں گا کہ اس کی مدد سے جو چاہیں گے وہ ہوجائے گا۔‘‘ بوڑھا یہ سن کر بہت خوش ہوا اور اس سنہری پرندے کو آزاد کرتے ہوئے کہا، میں اپنی زندگی کی تکالیف سے نجات چاہتا ہوں، میری خواہش ہے کہ اپنی بیوی کے ساتھ کسی اچھے گھر میں پرسکون طریقے سے رہوں۔

سنہری پرندے نے کہا، یہ کون سا مسئلہ ہے۔ آپ دونوں‌ میرے پیچھے آئیے۔ وہ سنہری پرندہ انہیں جنگل میں لے گیا، وہاں درختوں میں گھرا ایک دروازہ دکھائی دیا۔ پرندے نے پروں کے اشارے سے دروازہ کھولا۔ تینوں اندر گئے تو دیکھا کہ اندر ایک بڑا بڑا سجا سجایا حسین کمرہ تھا۔ لمبا چوڑا صحن، جس میں بہت سے پھولدار اور پھل دار درخت پودے لگے ہوئے تھے۔ بڑے کمرے میں شکاریوں کا ایک لباس بھی لٹکا ہوا تھا۔ غرض ضرورت کی ہر چیز گھر میں موجود تھی۔ پرندے نے کہا کہ یہ آپ کا نیا گھر ہے، یہاں آرام سے رہیں۔ اس کے بعد اس نے اپنا ایک پَر انہیں دیا اور کہا کہ جب بھی مجھ سے کوئی کام ہو، اس پر کو ذرا سا جلا دیجیے، میں فوراً حاضر ہوجاؤں گا۔ دونوں نے اس سنہری پرندے کو رخصت کیا اور ہنسی خوشی اس خوب صورت گھر میں رہنے لگے۔ ان کی زندگی اب بدل گئی تھی۔ بڑے میاں روزانہ شکاریوں والا لباس پہن کر جنگل میں جاتے اور کوئی نہ کوئی اچھا شکار مل جاتا، وہ گوشت بھون کر کھاتے اور موج کرتے۔ یہاں کوئی دور تک دکھائی نہ دیتا تھا اور جب چند برس گزرے تو بڑھیا آہستہ آہستہ اکتانے لگی۔ ایک دن اس میں وہی پرانی عورت جیسے گھس آئی ہو۔ خاوند پر برس پڑی، ’’آخر ہم لوگ کب تک اس بیاباں میں رہتے رہیں؟ جنگل کی زندگی بھی کوئی زندگی ہے بھلا؟ ہم جنگلی ہوتے جا رہے ہیں، جیسے یہ پرندے اور جانور ہمارے دوست، رشتہ دار ہوں۔‘‘ بڑے میاں نے اسے سمجھایا کہ اب تو سکون سے زندگی گزر رہی ہے، تم یہی چاہتی تھیں، اس ٹوٹی چھت والی چکی میں کیا گزرتی تھی؟

بڑھیا نے کہا، یہ کوئی بات نہیں، انسان کو بہتر سے بہترین کی طرف جانا چاہیے۔ تم کو یاد ہے نا سنہری پرندے کا وہ پَر؟ ابھی اسے جلاؤ اور پرندے کو حاضر کرو تاکہ وہ ہمارا کچھ اور بندوبست کرے۔ بڑے میاں نے تنگ آ کر وہ پَر نکالا، اسے ذرا سا جلایا، چند ہی لمحوں میں سنہری پرندہ آن پہنچا اور پوچھا کہ کیا مسئلہ ہے۔

بوڑھے نے اپنی بیوی کی طرف اشارہ کیا کہ اب اپنی خواہش بتائے۔ وہ عورت پھٹ پڑی، کہنے لگی کہ ہم جنگل میں پڑے ہیں، زندگی کا خاک مزہ ہے، کوئی انسان ہی نہیں جس سے دو گھڑی بات کی جاسکے۔ ہمیں کسی شہر میں لے جاؤ تاکہ ہم شہری زندگی سے لطف اندوز ہوں۔ سنہری پرندے نے کہا، کوئی مسئلہ نہیں، وہ انہیں ایک شہر میں لے گیا، وہاں پہلے سے زیادہ خوب صورت گھر موجود تھا۔ اس گھر میں نوکر چاکر سب موجود تھے۔ ان کی شہری زندگی شروع ہوگئی۔ کچھ عرصہ یوں گزر گیا، دونوں میاں بیوی مزے کرتے رہے۔ پھر بڑی بی کو لگا کہ یہ زندگی کچھ بھی نہیں، انہیں اختیارات اور طاقت کا مزہ بھی چکھنا چاہیے۔ اس نے اپنے خاوند کو کہا کہ پرندے کو بلا کر اس سے کہو کہ ہمیں شہر کا حاکم بنوا دو، ہمارے پاس تمام اختیارات ہوں، سب پر ہمارا حکم چلے۔ بوڑھے نے پھر سنہری پرندے کو اسی طریقے سے پَر جلا کر بلایا۔ پرندے نے اس بار بھی انکار نہ کیا اور انہیں ایک قلعے میں لے گیا۔ وہاں کے حاکم پر جانے کیا جادو ہوا تھا کہ ان کو دیکھا تو محل میں لے گیا اور اعلان کیا کہ آج سے یہ دونوں یہاں کے حاکم ہیں، سب وزیر، مشیر، درباری اس بوڑھے جوڑے کے سامنے آداب بجا لائے۔ حکومت تو خیر انہوں نے کیا کرنی تھی۔ وزیر ذمہ داریاں سنبھالتا اور سارے مشیر وغیرہ ہی انتظام چلاتے۔ بڑھیا کا کام یہ تھا کہ وہ ملازموں، درباریوں پر حکم چلاتی اور اپنی طاقت اور اختیار سے تسکین پاتی۔ ایک روز کنیزوں نے بڑھیا کو غسل دیا اور بڑی بی دھوپ میں بال سکھانے بیٹھ گئیں کہ اچانک ایک بادل سورج کے سامنے آگیا اور دھوپ کی راہ میں حائل ہوگیا۔ تنک مزاج بڑھیا جھنجھلا گئی۔ اس نے اپنے شوہر کو خوب باتیں سنائیں اور بولی کہ فوری طور پر سنہری پرندے کو بلایا جائے، وہ مزید طاقت حاصل کرنا چاہتی ہے تاکہ ان بادلوں کو سبق سکھا سکے۔ بوڑھے نے یہ سنا تو پریشان ہو کر اسے سمجھانے کی کوشش کی اور کہا کہ طاقت کی ہوس ٹھیک نہیں، غیر مشروط، لامحدود اختیارات اور قوت کسی کو حاصل نہیں ہوسکتی۔ جو میسر ہے، اس پر گزارہ کرو۔ بلکہ یہ سب تو ہمارے لیے اس عمر میں عظیم الشان نعمت سے کم نہیں ہے۔

یہ سن کر بڑی بی کی تیوریاں چڑھ گئیں۔ تیکھی نظروں سے اس نے خاوند کو دیکھا اور کہا کہ جو بول رہی ہوں وہی کرو ورنہ مجھ سے برا کوئی نہ ہوگا۔ تب بوڑھے نے بڑبڑاتے ہوئے سنہری پرندے کو بلایا اور بڑھیا نے اس کے سامنے کہا کہ بادل نے میری دھوپ کا راستہ روکا، میں چاہتی ہوں کہ زمین و آسمان کی ہر چیز پر میرا حکم چلے۔

یہ جان کر سنہری پرندے نے انہیں اپنے پیچھے پیچھے آنے کو کہا۔ وہ دونوں چل پڑے۔ اچانک آندھیاں چلنے لگیں، اندھیرا چھا گیا، ایسا کہ ہاتھ کو ہاتھ سجھائی نہ دے۔ کچھ دیر میں جب وہ دونوں کچھ دیکھنے کے قابل ہوئے تو پرندے کا کچھ پتا نہ تھا، اور وہ اپنی پرانی، خستہ حال پن چکی میں پہنچ چکے تھے۔ اب تو بڑھیا بہت پچھتائی اور اسے معلوم ہوگیا کہ اس مرتبہ پرندے نے اس کی ناجائز اور فضول فرمائشوں سے تنگ آکر سزا کے طور پر وہیں پہنچا دیا ہے جہاں تکلیفیں اور مشکلات اس کا مقدر تھے۔ اب کیا ہوسکتا تھا، بڑھیا رو دھو کر چپ ہورہی۔ اس نے نہ صرف خود کو تکلیف میں ڈالا بلکہ اپنے ساتھ بوڑھے شوہر کو بھی مشکل میں پھنسا دیا۔ بدمزاجی اور ناشکری کا انجام یہی ہوتا ہے۔

عرب دنیا اور خاص طور پر ہزاروں سال پہلے کا مصر جداگانہ اور بھرپور تہذیب و ثقافت کا حامل رہا ہے جس کا لوک ادب بھی بہت اہمیت کا حامل ہے۔ لوک کہانیاں گویا دھرتی کے سینے سے پیدا ہوتی ہیں۔ اور نگری نگری پھرتے مسافر انھیں آگے پہنچاتے ہیں۔ یہ اس دور کی بات ہے جب آج کی طرح ذرایع ابلاغ اور طرح طرح کے وسائل انسان کو میسر نہ تھے۔ ہر دور کا لوک ادب اور داستانیں‌ زیادہ تر کوئی پیغام پہنچانے کا ذریعہ بنی ہیں اور یہ انسان کو سیدھے راستے پر چلتے ہوئے برائی سے دور رہنے کی تلقین کرتی ہیں۔ یہ لوک کہانیاں زندگی کی تلخ و شیریں حقیقتوں کے بطن سے پھوٹتی ہیں۔

خیر اور شر کی جنگ، سچ اور جھوٹ کا بیان ہمیشہ سے دنیا کے انسانوں‌ کا موضوع رہا ہے۔ یہ ایک ایسی ہی خوب صورت لوک داستان ہے جس میں‌ ہمارے لیے سبق پوشیدہ ہے۔

یہ جھوٹ اور سچ کی کہانی ہے۔ جھوٹ نے ایک مرتبہ اپنے بھائی سچ کو ایک جال میں پھنسانا چاہا اور اس برے ارادے کی تکمیل کے لیے اس نے اپنا خنجر اپنے بھائی سچ کے پاس امانتاً چھوڑ دیا۔ پھر جھوٹ نے موقع دیکھ کر وہ خنجر چرا لیا اور اپنے بھائی (سچ) کے پاس گیا اور اس سے خنجر طلب کیا تو سچ نے اس کو خنجر کے گم ہوجانے کا بتاتے ہوئے اپنے بھائی (جھوٹ) سے معافی مانگی۔ لیکن جھوٹ نے اس کا عذر قبول نہیں کیا اور دیوتاؤں سے شکایت کی۔ اور دعویٰ کیا کہ اس کا خنجر بہت بڑا ہے، پہاڑ کی اونچائی تک اور اس کی مٹھی ایک درخت کی بلندی تک ہے۔ تو دیوتاؤں نے جھوٹ کو خنجر کے معاوضہ یا بدلہ لینے کی تجویز دی۔ جھوٹ نے اپنے بھائی (سچ) کو اندھا کرنے اور اپنے گھر پر ایک اندھا دربان مقرر کرنے کا کہا۔

ایک مقررہ مدت تک سچ اپنے بھائی (جھوٹ) کے دروازے پر پہرے دار کے طور پر کھڑا رہا۔ لیکن جھوٹ نے اس میں صبر و تحمل اور استقامت دیکھی تو بہت برہم ہوا۔ وہ اس کی خوبی سے حسد کرنے لگا تھا۔ اس نے اپنے بھائی کو قتل کرنے کا فیصلہ کیا۔ اپنے دو غلاموں کو حکم دیا کہ اسے بھوکے شیر کے پاس پھینک دیں تاکہ وہ اسے کھا جائے۔ لیکن سچ کو غلام پسند کرتے تھے اور انھوں نے جھوٹ کے حکم پر عمل نہ کیا۔ بلکہ اسے جنگل میں چھوڑ کر آگئے اور جھوٹ کو بتایا کہ شیر اسے کھا گیا ہے۔

سچ جو جنگل میں اکیلا رہ گیا، اسے ایک دن ایک خوبصورت عورت نے دیکھا اور محبت میں گرفتار ہوگئی اور سچ سے شادی کر لی۔ تاہم لوگوں کو خبر نہ ہونے دی بلکہ سچ کو الگ مقام پر رہنے کا پابند کردیا۔ ان کے یہاں ایک صحت مند اور ذہین بیٹا پیدا ہوا، وہ بہادر اور ذہین شہسوار بنا۔ جب وہ بڑا ہوا تو اس نے اپنی ماں سے اپنے باپ کے بارے میں پوچھا۔ اس کی ماں نے بتایا کہ اس کا والد تو وہ اندھا دربان ہے جس کے بارے میں تم نے سن رکھا ہے۔ جب اسے اپنے باپ کی کہانی سمجھ آئی تو اس نے بدلہ لینے کا فیصلہ کیا، چنانچہ اس نے ایک بیل خرید لیا۔ اور اسے اپنے چچا (جھوٹ) کے چرواہے میں سے ایک کو دے دیا، تاکہ جھوٹ کی بھیڑ بکریوں کے درمیان ایک معمولی رقم کے عوض اس کی پرورش ہو، جب تک کہ چچا (جھوٹ) جو کہیں‌ گیا ہے، اپنے سفر سے واپس آجائے۔

چونکہ بیل بڑا اور خوبصورت تھا تو جب جھوٹ نے بڑے بیل کو دیکھا تو اسے بہت اچھا لگا، کھانے کے لئے اس نے بیل کو ذبح کر دیا۔ جب سچ کے بیٹے کو اس کا علم ہوا تو اس نے اپنے دیوتاؤں سے شکایت کی اور ان سے کہا: میرے بیل کی طرح کوئی بیل نہیں ہے۔ اس کے سینگ مشرق اور مغرب کے پہاڑ تک پہنچ جاتے تھے۔ دیوتاؤں نے اس پر مبالغہ آرائی اور جھوٹ بولنے کا الزام لگایا، تو سچ کے بیٹے نے دیوتاؤں سے کہا: کیا تم نے پہلے ایک بڑا خنجر دیکھا ہے جو پہاڑ کی اونچائی تک اور اس کی مٹھی ایک درخت کی بلندی تک ہو۔ اور اس نے یوں اپنے چچا (جھوٹ) کو بے نقاب کر دیا۔ اور دیوتاؤں سے عدالت قائم کرنے کی گزارش کی۔ دیوتاؤں کے حکم پر جھوٹ کو سو کوڑے مارے گئے۔ وہ شدید زخمی ہوگیا۔ پھر اس کو اندھا کر دیا گیا اور یہ حکم دیا کہ اب وہ اپنے بھائی (سچ) کا دربان بن جائے۔

حقیقت یہی ہے کہ جھوٹ ہمیشہ ذلت اٹھائے گا اور وہ سچ پر غالب نہیں آسکتا۔

صدیوں پہلے یونان کے شہر ایتھنز میں ڈیڈیلس نامی ایک شخص رہتا تھا جو لکڑی، پتھر اور دھاتوں کے کام میں اتنا ماہر تھا کہ دور دور سے لوگ اس کے پاس مختلف قسم کا سامان بنوانے کے لیے آتے تھے۔ وہ ایک شان دار اور نہایت باکمال کاری گر تھا۔

اسی نے لوگوں کو بتایا کہ مضبوط اور خوب صورت مکان کیسے بنائے جاتے ہیں، دروازے مضبوط اور عالی شان کیسے بنتے ہیں اور ستونوں کے سہارے چھت کیسے بنائی جاتی ہے۔ وہ پہلا شخص تھا جس نے چیزوں کو گوند سے جوڑنا سیکھا تھا۔ اس نے بہت سی چیزیں ایجاد کی تھیں۔ اسے یونان کے مشہور ترین موجد اور عظیم فن کار ہونے کا اعزاز حاصل تھا۔

ڈیڈیلس کا ایک یتیم بھتیجا تھا جس کا نام پرڈکس تھا۔ ڈیڈیلس نے اسے ساتھ کام کرنے کے لیے رکھ لیا تھا۔ اس طرح وہ ڈیڈیلس کا شاگرد بھی تھا۔ پرڈکس اتنا ذہین تھا کہ تیزی سے کام سیکھتا گیا اور کچھ عرصہ میں اپنے چچا سے زیادہ ماہر ہوگیا۔ اسے جنگل، پہاڑ اور سمندر بہت پسند تھے۔ وہ اکثر ان مقامات پر چہل قدمی کرتا اور یہاں نظر آنے والی اشیاء سے کچھ ایجاد کرنے کی کوشش کرتا۔ ایک دن ساحل پر اس نے ایک بڑی مچھلی کی ریڑھ کی ہڈی اٹھائی اور اس سے آری ایجاد کی۔ پرندوں کو درختوں کے تنوں میں سوراخ کرتے دیکھ اس نے چھینی بنائی اور اسے استعمال کرنے کا طریقہ بھی سیکھا۔ پھر اس نے کمہار کا پہیہ ایجاد کیا جس پر مٹی کے برتن بنائے جاتے ہیں۔ اس نے کانٹے والے قطب نما کے علاوہ کم عمری میں کئی دل چسپ اور مفید چیزیں ایجاد کر لیں۔

پرڈکس کی مہارت دیکھ کر ڈیڈیلس کی راتوں کی نیند حرام ہوگئی۔ اس نے سوچا کہ اگر یہ لڑکا اسی طرح کام سیکھتا رہا اور ایجادات کرتا رہا تو یہ ایک دن مجھ سے بڑا آدمی بن جائے گا اور دنیا مجھے نہیں بلکہ اسے یاد رکھے گی۔ بس پھر کیا تھا، دن بہ دن ڈیڈیلس کے دل میں پرڈکس کے لیے نفرت پروان چڑھتی گئی۔

ڈیڈیلس، ایتھنز کے نوجوان بادشاہ ایجیئس کے لیے پتھر کا ایک عالیشان محل بنا رہا تھا جس میں اس نے ایتھینا (یونانی دیوی) کا ایک خوبصورت مندر بھی بنایا تھا۔ یہ محل شہر کے وسط میں ایک بڑی چٹان پر تعمیر کیا جارہا تھا۔ اس کی تزئین و آرائش کا کام ڈیڈیلس اور پرڈکس مل کر کررہے تھے۔ ایک دن ڈیڈیلس کے ذہن میں اچانک ایک ترکیب آئی۔

ایک صبح جب دونوں ایتھینا کے مندر کی بیرونی دیواروں پر نقاشی کر رہے تھے تو ڈیڈیلس نے بھتیجے کو دیوار کے ایک تنگ حصے پر جانے کے لیے کہا جس کے نیچے انتہائی پتھریلی چٹانیں تھیں۔ پرڈکس نے سوچا کہ وہ دبلا پتلا ہے اور تنگ حصے پر باآسانی کھڑا ہو کر نقاشی کرسکتا ہے لہٰذا وہ وہاں پہنچ گیا۔ تبھی ڈیڈیلس نے ایک ہتھوڑی اس کی جانب بڑھائی اور کہا کہ دیوار کی سطح ہموار کر دو۔ پرڈکس نے جیسے ہی وزنی ہتھوڑی اٹھائی، اپنا توازن برقرار نہ رکھ سکا اور سہارے کے لیے بنائی گئی پتلی پٹی سے اس کا پاؤں پھسل گیا۔ ایتھینا جو بظاہر مجسمہ مگر درحقیقت دیوی تھی، کو پرڈکس کا یہ انجام منظور نہیں تھا، لہٰذا پرڈکس کے چٹان پر گرنے سے قبل ہی ایتھینا نے اسے ایک تیتر میں بدل دیا جو ہوا میں اُڑتا ہوا جنگل اور پہاڑوں کی جانب نکل گیا۔ اس طرح پرڈکس کی جان بچ گئی۔ جنگلوں اور پہاڑوں سے عشق کرنے والا اب انہی مقامات کا باسی بن گیا۔ یونانی آج بھی کہتے ہیں کہ موسم گرما میں جب پھول کھلتے ہیں اور ہوائیں چلتی ہیں تو پرڈکس کی میٹھی آوازیں جنگل میں سنائی دیتی ہیں۔

جب ایتھنز کے لوگوں کو معلوم ہوا کہ ڈیڈیلس نے اپنے بھتیجے کے ساتھ کس قدر گھناؤنا فعل انجام دیا ہے تو ان کے دل میں اس کے خلاف غم و غصہ بھر گیا۔ پرڈکس ایک محبت کرنے والا لڑکا تھا جسے پورا شہر پسند کرتا تھا مگر اپنے بد اخلاق چچا (جسے صرف خود سے محبت تھی) کے سبب وہ ان کے درمیان سے غائب ہوگیا تھا۔ سبھی چاہتے تھے کہ ڈیڈیلس کو سزائے موت دی جائے لیکن جب انہیں یاد آیا کہ اس نے ان کے گھروں کو خوب صورت اور ان کی زندگیوں کو آسان بنانے کے لیے کیا کچھ کیا ہے تو انہوں نے اسے زندہ رہنے دیا مگر ایتھنز سے نکال دیا۔

بندرگاہ پر ایک بحری جہاز لنگر انداز تھا جس کا سفر چند منٹوں بعد ہی شروع ہونے والا تھا۔ اس جہاز میں ڈیڈیلس اپنے تمام قیمتی آلات اور اپنے جوان بیٹے اِیکروس کے ساتھ سوار ہوگیا۔ جہاز سمندر کی لہروں پر آہستہ آہستہ جنوب کی طرف بڑھتا رہا۔ آخر کار کریٹ نامی مشہور جزیرے پر پہنچ گیا۔ وہاں اترتے ہی لوگوں میں بات پھیل گئی کہ ایتھنز کا مشہور کاری گر ڈیڈیلس ان کی سرزمین پر آیا ہے۔ کریٹ کے بادشاہ نے پہلے ہی اس کی غیر معمولی مہارت کے قصے سن رکھے تھے۔ اس نے ڈیڈیلس کا والہانہ استقبال کیا اور اسے اپنا ایک محل بطور رہائش پیش کر دیا۔ بادشاہ نے وعدہ کیا کہ اگر وہ یہاں کے لوگوں کی زندگیاں آسان بنانے کے لیے اچھا کام کرے تو اسے مالا مال کر دیا جائے گا۔

کریٹ کے بادشاہ کا نام مائنوز تھا۔ اس کے دادا کا نام بھی مائنوز تھا۔ کہتے ہیں کہ اس کے دادا ’’یوروپا‘‘ (یونانی دیوی) کے بیٹے تھے۔ یوروپا ایک نوجوان شہزادی تھی جو ایک سفید بیل پر بیٹھ کر ایشیاء سے کریٹ آئی تھی۔ براعظم یورپ اسی سے موسوم ہے۔ دادا مائنوز کو مردوں میں عقلمند ترین خیال کیا جاتا تھا۔ وہ اتنا عقلمند تھا کہ زیوس (یونانی دیوتا) نے اسے دنیا کے ججوں میں سے ایک مقرر کیا تھا۔ نوجوان مائنوز بھی اپنے دادا ہی کی طرح عقلمند تھا۔ وہ بہادر اور دور اندیش بھی تھا۔ اس کے بحری جہاز دنیا کے ہر حصے میں تھے جہاں سے بے شمار دولت کریٹ کی سرزمین پر آتی تھی۔ ڈیڈیلس نے بادشاہ مائنوز کے لیے سنگ مرمر کے فرش اور گرینائٹ کے ستونوں والا سب سے شان دار محل بنایا۔ محل میں ایسے سنہری مجسمے نصب کئے جو بات کرسکتے تھے۔ اس محل سے خوبصورت دنیا میں کوئی دوسری عمارت نہیں تھی۔

ہر سال بادشاہ مائنوز، یوروپا کی کریٹ آمد اور اس شہر کی بنیاد رکھنے کی یاد میں ایک دیوتاؤں کو ایک بیل کی قربانی پیش کرتا تھا لیکن اس سال مائنوز نے بیل قربان نہیں کیا۔ یہ بات پوسائڈن (یونانی اسے قربانی کا دیوتا کہتے ہیں) کو سخت ناگوار گزری۔ اس نے مائنوز کو سزا دینے کے لیے اس کی بیوی پاسیفائی کے دل میں یہ بات ڈال دی کہ وہ ایک بیل سے شادی کر لے۔ بس پھر پاسیفائی پر عجیب پاگل پن سوار ہوگیا۔ مائنوز کے لاکھ سمجھانے کے بعد وہ نہ مانی اور اس نے ڈیڈیلس سے خفیہ ملاقات کرکے گزارش کی کہ وہ اس کے لیے ایک ایسا بیل تیار کرے جس سے وہ شادی کرسکے مگر یہ بات مائنوز کو معلوم نہ پڑے۔ ڈیڈیلس حکم کا غلام تھا۔ اس نے ملکہ پاسیفائی کے لیے ایک بیل تیار کردیا۔ پاسیفائی نے چھپ کر اس سے شادی کرلی۔ کچھ عرصہ بعد جب مائنوز کو یہ بات معلوم ہوئی تو وہ طیش میں آگیا۔ اس دوران پاسیفائی نے ایک بیٹے کو جنم دیا۔ اگر مائنوز کو ڈیڈیلس سے شان دار عمارتوں کی غرض نہ ہوتی تو وہ اسی وقت اسے موت کے گھاٹ اتار دیتا۔

اس کے علاوہ مائنوز کو اپنے نوزائیدہ بیٹے ’’مینی تور‘‘ کے لیے ایک ایسی عمارت بنوانی تھی جس میں وہ اسے قید کرسکے۔ مینی تور ایک وحشی درندہ تھا۔ چند عرصے ہی میں اس کا ڈیل ڈول کافی بڑھ گیا تھا۔ وہ تیزی سے تندرست ہوتا جارہا تھا۔ کہتے ہیں کہ دنیا میں آج تک اس جیسا خطرناک انسان کوئی نہیں پیدا ہوا۔ اس کا جسم ایک آدمی کا تھا لیکن چہرہ اور سر جنگلی بیل جیسا تھا۔ اس کی گرج نے پوری مملکت کو ہلا کر رکھ دیا تھا۔ تقریباً ہر روز وہ کسی نہ کسی انسان کو پکڑ کر کھا جاتا تھا۔

بادشاہ نے ڈیڈیلس سے کہا ’’اس عفریت کے ذمہ دار تم ہو۔ یہ میرا بیٹا ہے۔ میں اسے قتل نہیں کرواسکتا لیکن تم اپنی حکمت سے اس پر قابو پاسکتے ہو۔‘‘

’’میں اس کے لیے ایک ایسا محل بناؤں گا کہ وہ اس میں سے کبھی نکل نہیں سکے گا۔‘‘ ڈیڈیلس نے کہا۔

چنانچہ ڈیڈیلس نے اپنے ماہر کاری گروں کو اکٹھا کیا اور کریٹ کے نوسوس شہر میں ایک محل بنانے کا آغاز کیا جس میں بے شمار کمرے اور اتنے چکر دار راستے تھے کہ جو بھی اس میں جاتا، اسے باہر نکلنے کا راستہ نہیں ملتا۔ اس کی تعمیر مکمل ہوجانے کے بعد مینی تور کو اس محل میں داخل کردیا گیا۔ جلد ہی وہ محل کی بھول بھلیوں میں کھو گیا۔ لیکن اس کی خوف ناک گرج کی آواز دن رات سنی جا سکتی تھی۔ وہ اس بھول بھلیاں سے نکلنے کی بے کار کوششوں میں دن رات دندناتا پھرتا تھا۔

اس کے بعد بادشاہ نے ڈیڈیلس کو طلب کیا۔ ’’تم نے اپنی مہارت سے مجھے بہت کچھ دیا ہے۔ میں تمہار احترام کرتا ہوں لیکن تم نے مجھے اور میری بیوی کو دھوکہ دیا، اور اب تم ہمیشہ کے لیے میرے غلام رہو گے۔‘‘

پھر بادشاہ نے شہر کے دروازوں پر محافظوں کا سخت پہرہ لگا دیا کہ ڈیڈیلس اور اس کے بیٹے اِیکروس کو شہر سے نکلنے نہ دیا جائے۔ بندرگاہ کی نگرانی بڑھا دی گئی۔ بادشاہ نے کریٹ جیسے عظیم جزیرے میں دنیا کے سب سے ماہر اور شان دار فن کار کو قیدی بنا لیا تھا۔ ڈیڈیلس ہمیشہ یہی سوچتا رہتا کہ وہ اپنی آزادی کیسے حاصل کرے۔

ایک دن اس نے اپنے بیٹے ایکروس سے کہا کہ ’’میری اب تک کی تمام ایجادات دوسرے لوگوں کو خوش کرنے کے لیے تھی۔ مگر اب میں اپنی خوشی کے لیے ایک نایاب چیز ایجاد کروں گا۔‘‘
چنانچہ دن بھر وہ بادشاہ کے لیے کام کرتا اور رات میں اپنے آپ کو ایک کمرے میں بند کر کے موم بتی کی روشنی میں چھپ کر محنت کرتا رہتا۔ کوئی نہیں جانتا تھا کہ عظیم فن کار اپنے لئے کیا بنارہا ہے۔

دن اور سال گزرتے چلے گئے، اور ڈیڈیلس نے اپنے لیے پَروں کا ایک مضبوط جوڑا تیار کرلیا۔ یہ پَر کندھوں پر چڑھائے جاسکتے تھے۔ اس نے ایک جوڑا ایکروس کے لیے بھی بنایا تھا۔ آدھی رات کو جب کریٹ کے تمام لوگ سو رہے ہوتے تو ڈیڈیلس اور ایکروس پروں کو پہن کر پرواز کی مشق کرتے۔ ابتداء میں وہ زیادہ دور تک نہیں اڑان بھر پاتے تھے مگر انہیں اتنا یقین ہوگیا تھا کہ وہ ان پروں کی مدد سے لمبی پرواز کرسکتے ہیں۔ بس تھوڑی مشق کی ضرورت ہے۔ یہ مشق ہر رات کی جاتی۔ ایک صبح بادشاہ مائنوز کے بیدار ہونے سے پہلے ہی دونوں نے پَر پہنے اور ہوا میں چھلانگ لگا دی۔ لوگوں نے ڈیڈیلس اور ایکروس کو پرندوں کی طرح ہوا میں اڑتے دیکھا تو حیران رہ گئے۔ ان کی پرواز تیز تھی۔ مہینوں کی مشق رنگ لائی تھی۔ کوئی بھی انہیں نہیں روک سکا۔ وہ دونوں پرندوں کی طرح آرام سے اڑتے ہوئے سسلی کی طرف بڑھنے لگے جو وہاں سے سیکڑوں میل دور تھا۔

کچھ دیر تک سب ٹھیک رہا۔ سمندر کی بپھرتی لہروں پر دو افراد جرأت مندی سے پرواز کررہے تھے۔ دوپہر ہوگئی اور سورج سر پر آگیا۔ ڈیڈیلس نے پیچھے پلٹ کر ایکروس کو دیکھا اور کہا ’’سورج کی تمازت بڑھ رہی ہے۔ سورج کے قریب مت جاؤ بلکہ لہروں سے تھوڑا اوپر پرواز کرو۔ جیسا میں کررہا ہوں، ویسا کرو۔ ‘‘ مگر نوجوان ایکروس کو اپنی پرواز پر ناز تھا۔ وہ بڑی مہارت سے اڑ رہا تھا۔ جب اس نے سورج کی طرف دیکھا تو اس نے سوچا کہ نیلے آسمان کی بلندی پر اڑنے میں بہت لطف آئے گا۔

اس نے سوچا، ’’مجھے تھوڑا اور اوپر جانا چاہئے تاکہ میں دیکھ سکوں کہ سورج کہاں طلوع اور کہاں غروب ہوتا ہے۔ ‘‘ چنانچہ اس کی پرواز بلند ہوتی گئی۔ آگے اڑتے باپ ڈیڈیلس نے نہیں دیکھا کہ اس کا بیٹا پیچھے کیا کر رہا ہے۔ جوں جوں ایکروس سورج کے قریب جارہا تھا، اس کی تپش اسے اپنے چہرے پر محسوس ہورہی تھی۔ تبھی اسے احساس ہوا کہ وہ اُڑ نہیں پا رہا ہے بلکہ آہستہ آہستہ نیچے گر رہا ہے۔ چند لمحوں کے بعد اس نے اپنے آپ کو ہوا میں گرتا محسوس کیا۔ اس کے کندھوں سے پنکھ ڈھیلے ہوگئے تھے۔ اس نے چیخ کر باپ کو پکارا مگر بہت دیر ہو چکی تھی۔

ڈیڈیلس کو اس کی آواز سنائی دی تو اس نے پلٹ کر دیکھا اور اپنے بیٹے ایکروس کو لہروں میں گرتے اور پھر ڈوبتے دیکھا۔ یہ وہی منظر تھا جب اس نے برسوں پہلے اپنے بھتیجے پرڈکس کو سازش کر کے بلندی سے گرایا تھا۔ گہرے سمندر کی طاقتور لہروں نے ایکروس کو ڈبو دیا۔ ماہر اور عظیم کاری گر اپنے بیٹے کو سمندر کے غضب سے نہیں بچا سکا۔ وہ سوگوار اور نم آنکھوں سے لہروں کو دیکھتا رہا۔ پھر اس نے سسلی تک تنہا پرواز کی۔ ڈیڈیلس نے دن رات محنت کر کے پرندوں کے پَر جمع کئے تھے جنہیں گوند سے چپکا کر اس نے پرندوں جیسے بڑے بڑے پَر بنائے تھے۔ جب ایکروس کی پرواز بلند ہوئی تو سورج کی تپش سے گوند پگھلنے لگا اور ایک ایک کرکے سارے پَر گرنے لگے، اس طرح ایکروس سمندر میں ڈوب گیا۔

سسلی کے لوگ بتاتے ہیں کہ ڈیڈیلس کئی سال تک زندہ رہا مگر اس نے کریٹ کی بھول بھلیاں اور پروں کے بعد کوئی قابلِ ذکر چیز نہیں بنائی۔ جس سمندر میں ایکروس ڈوبا تھا، آج اسے ایکارین سمندر کے نام سے جانا جاتا ہے۔

(ایک دل چسپ یونانی لوک کہانی جسے کئی مصنّفین نے اپنے انداز میں بیان کیا ہے اور اردو سمیت متعدد زبانوں میں اس کا ترجمہ کیا جاچکا ہے)

فارس کا سلطان بڑا دانا مشہور تھا۔ اسے مسئلے سلجھانے کرنے، پہلیاں بوجھنے اور معمّے حل کرنے کا بھی شوق تھا۔ ایک دن اسے کسی کا بھیجا ہوا تحفہ ملا۔ بھیجنے والا سلطان کے لیے اجنبی تھا۔

سلطان نے تحفے کو کھولا، اُس میں سے ایک ڈبہ نکلا۔ ڈبے کے اندر لکڑی کی تین خوبصورت گڑیاں نظر آئیں جنہیں بڑے سلیقے سے تراشا گیا تھا۔ اس نے ایک ایک کر کے تینوں گڑیوں کو اٹھایا اور ہر ایک کی کاری گری کی خوب تعریف کی۔ اس کا دھیان ڈبہ پر گیا جہاں ایک جملہ تحریر تھا: ’’ان تینوں گڑیوں کے درمیان فرق بتائیے۔‘‘

ان تینوں گڑیوں کے درمیان فرق بتانا سلطان کے لیے ایک چیلنج بن گیا۔ اس نے پہلی گڑیا کو اٹھایا اور اس کا مشاہدہ کرنے لگا۔ گڑیا کا چہرہ خوبصورت تھا اور وہ ریشم کے چمکیلے کپڑوں میں ملبوس تھی۔ پھر اس نے دوسری گڑیا کو اٹھایا۔ وہ بھی پہلی گڑیا جیسی ہی تھی اور تیسری بھی ویسی ہی تھی۔ پھر سلطان نے گڑیا کا نئے سرے سے مشاہدہ کرنا شروع کیا۔ وہ سب ظاہراََ یکساں تھیں لیکن سلطان نے سوچا شاید تینوں میں سے آنے والی بُو مختلف ہو۔ چنانچہ اس نے تینوں گڑیوں کو باری باری سونگھ کر دیکھا۔ تینوں میں سے صندل کی خوشبو آرہی تھی جس سے اس کا سانس معطّر ہوگیا۔ صندل کی لکڑی سے انھیں بڑی نفاست سے بنایا گیا تھا۔

سلطان نے سوچا شاید یہ اندر سے کھوکھلی ہوں۔ انھیں کان کے پاس لے جا کر ہلانا شروع کیا لیکن تینوں گڑیاں ٹھوس تھیں اور تینوں ہم وزن بھی تھیں۔ سلطان نے دربار بلایا۔ دربار میں سلطان بڑا ہی متذبذب نظر آرہا تھا۔ لوگ اسے دیکھ کر حیران تھے۔ اس نے دربار کے سامنے اعلان کیا کہ جو تم میں سے جو دانا ہو وہ آگے آئے۔ جس نے زندگی بھر کتابیں‌ پڑھی ہوں وہ بھی آگے آئے۔ ایک اسکالر اور ایک قصّہ گو سلطان کے حکم پر سامنے آئے۔

سب سے پہلے اسکالر نے گڑیوں کا مشاہدہ کرنا شروع کیا۔ اس نے انھیں سونگھا، ان کا وزن کیا اور انھیں ہلایا اور کچھ فرق معلوم کرنے کی کوشش کی لیکن وہ کسی طور بھی کوئی فرق نہ پاسکا۔ وہ دروازے کے پاس گیا اور الگ الگ زاویوں سے انھیں دیکھنا شروع کیا۔ پھر اس نے گڑیوں کو ہاتھ میں اٹھایا اور ان پر جادو ٹونے کی طرح ہاتھ ہلانے لگا۔ تھوڑی دیر بعد وہ اکتا گیا اور گڑیوں کو میز پر رکھ کر وہاں سے ہٹ گیا اور اپنی ناکامی کا اعتراف کیا۔

اب سلطان نے قصّہ گو کی طرف دیکھتے ہوئے کہا، ’’کیا تم گڑیوں کے درمیان کوئی فرق شناخت کر سکتے ہو!‘‘ قصّہ گو نے پہلی گڑیا اٹھائی اور بڑی احتیاط سے اس گڑیا کا مشاہدہ کرنا شروع کیا۔ پھر اچانک اسے نہ جانے کیا خیال آیا۔ وہ آگے کی طرف بڑھا اور سلطان کی داڑھی کا ایک بال نوچ لیا۔ اس بال کو اس نے گڑیا کے کان میں ڈالا۔ وہ بال گڑیا کے کان میں چلا گیا اور غائب ہو گیا۔ قصّہ گو نے کہا، ’’ یہ گڑیا اس اسکالر کی طرح ہے جو سب کچھ سنتا ہے اور اپنے اندر رکھ لیتا ہے۔‘‘ اس سے پہلے کہ سلطان اسے روکتا پھر قصّہ گو نے آگے بڑھ کر بڑی جرأت کی اور اس کی داڑھی کا دوسرا بال نوچ لیا۔ سلطان کچھ نہ بولا۔ اس پر تو گڑیوں کا راز جاننے کا بھوت سوار تھا۔ اس نے دوسری گڑیا کے کان میں بال ڈالا۔ دھیرے دھیرے بال اس کے کان میں چلا گیا اور دوسرے کان سے نکلا۔سلطان یہ منظر دیکھ کر حیران رہ گیا۔

اب قصّہ گو نے کہا ’’یہ گڑیا احمق جیسی ہے جو ایک کان سے سن کر دوسرے کان سے نکال دیتا ہے۔‘‘ اس سے پہلے کہ سلطان اسے روک پاتا اس نے سلطان کی ٹھوڑی سے تیسرا بال توڑ لیا۔ پھر اس نے داڑھی کے بال کو تیسری گڑیا کے کان میں ڈالا۔ بال اندر چلا گیا۔سلطان غور سے دیکھنے لگا کہ اس بار بال کا دوسرا سرا کہاں سے باہر آئے گا۔ بال گڑیا کے منھ سے باہر آیا۔ لیکن جب بال باہر آیا تو وہ کافی مڑا ہو اتھا۔

اب قصّہ گو نے کہا، ’’یہ گڑیا قصّہ گو کی طرح ہے۔ وہ جو کچھ سنتا ہے اسے وہ تھوڑی سی تبدیلی کے ساتھ دوبارہ سنا دیتا ہے۔ ہر قصّہ گو کہانی میں تھوڑی سی تبدیلی اس لیے کرتا ہے تا کہ وہ اس کا اپنا شاہکار لگے۔‘

(فارسی ادب سے انتخاب)

‎ایک فوجی لڑائی کے میدان سے چھٹی لے کر اپنے گھر واپس جا رہا تھا۔ راستے میں وہ ایک گاؤں کے قریب سے گزرا۔ ‎ٹھنڈی ہوا چل رہی تھی۔ آسمان پر بادل چھائے ہوئے تھے، جب کہ سپاہی شدید بھوکا تھا۔

وہ گاؤں کے سرے پر ایک مکان کے سامنے رک گیا اور کچھ کھانے کے لیے مانگا۔ گھر والوں نے کہا کہ ہمارے پاس کچھ بھی نہیں ہے، لہٰذا وہ آگے بڑھ گیا۔
‎
وہ دوسرے گھر پر رُکا اور وہی سوال دہرایا۔ یہاں بھی گھر والوں نے جواب دیا کہ ہمارے پاس کھانے کو کچھ بھی نہیں ہے، اگر ذرا ٹھہر کر آؤ تو شاید کوئی انتظام ہو جائے۔

‎تب سپاہی نے سوال کیا ”تمھارے پاس ہنڈیا تو موجود ہے؟“ ‎گھر والوں نے کہا، ”بے شک! ہمارے پاس ہنڈیا موجود ہے۔“

‎پھر اس نے معلوم کیا ”تمھارے ہاں پانی بھی ہو گا۔“

”ہاں، پانی جتنا چاہو لے لو۔“ اسے جواب ملا۔ ‎سپاہی بولا، ”ہنڈیا کو پانی سے بھرو اور چولھے پر چڑھا دو۔ میرے پاس شوربہ تیار کرنے کا پتھر موجود ہے۔ بس ابھی کام بن جائے گا۔“

‎”کیا کہا؟“ ان میں سے ایک شخص نے تعجب سے پوچھا ”شوربہ بنانے کا پتھر! وہ کیا چیز ہے؟“

‎”بس ایک خاص قسم کا پتھر ہے، جسے پانی میں ڈال لینے سے مزے دار شوربہ تیار ہوجاتا ہے۔“

‎وہ سب لوگ، اس عجیب و غریب چیز کو دیکھنے کے لئے جمع ہو گئے۔ گھر کی مالکہ نے ایک بڑی ہنڈیا کو پانی سے بھرا۔ وہ عام سا پتھر تھا جیسے اکثر سڑکوں پر اِدھر اُدھر پڑے نظر آتے ہیں۔ وہ پتھر اس نے ہنڈیا میں ڈال دیا اور کہا ”بس اب اسے اُبلنے دو۔ پھر دیکھو کہ کیا بنتا ہے۔“ ‎لہٰذا وہ سب چولھے کے آس پاس بیٹھ گئے اور انتظار کرنے لگے کہ کب پانی گرم ہوکر ابلنے لگتا ہے اور کیسا شوربہ تیار ہوتا ہے۔

‎سپاہی نے کہا ”تمھارے پاس نمک تو ضرور ہوگا۔ مٹھی بھر نمک اس میں ڈال دو۔“

‎عورت نے کہا ”بہت اچھا۔“ اور یہ کہہ کر وہ نمک کا ڈبہ اٹھا لائی۔ سپاہی نے خود ہی ایک مٹھی بھر کر نمک پانی میں ڈال دیا۔ پھر سب لوگ انتظار کرنے لگے۔ ‎پھر سپاہی نے کہا ”اگر چند گاجریں ہوں تو شوربے کا ذائقہ اچھا ہو جائے گا۔“

‎”ہاں۔“ عورت بولی۔ ”گاجریں تو ہمارے ہی کھیت میں اگتی ہیں۔“ اور یہ کہہ کر اس نے چند گاجریں ٹوکری میں سے نکالیں۔ دراصل سپاہی نے ترکاریوں سے بھری ہوئی ٹوکری دیکھ لی تھی جس میں گاجریں بھی رکھی ہوئی تھیں۔
‎پانی میں گاجریں ڈال دینے کے بعد سپاہی نے اپنی بہادری کے قصّے بیان کرنے شروع کیے اور ایک دم رک کر پوچھا ”تمھارے پاس آلو بھی تو ہوں گے؟“

‎گھر کی مالکہ بولی ”ہاں! آلو بھی ہیں۔“ تو پھر اس میں ڈال دو شوربہ تھوڑا گاڑھا ہو جائے گا۔ ‎عورت نے آلو چھیل کر ہنڈیا میں ڈال دیے۔ ‎سپاہی نے کہا ”اگر ذائقے کو زیادہ لطیف بنانا ہو تو پیاز بھی کتر کر ملا دو۔“

‎کسان نے اپنے چھوٹے لڑکے سے کہا ”بیٹا! ذرا پڑوسی کے گھر جاؤ اور تھوڑی سی پیاز مانگ لاؤ۔ وہ بھی کبھی کبھی ہمارے گھر سے لے لیتے ہیں۔“ بچّہ بھاگ کر پڑوسی کے گھر گیا اور پیاز مانگ لایا۔ پس اُنہوں نے پیاز چھیلی اور کتر کر پانی میں ڈال دی۔ ‎پھر کچھ لطیفے سنائے گئے۔ انتظار کا وقت گزرتا ہوا محسوس نہیں ہوا تو سپاہی نے بڑی حسرت سے کہا، ”لڑائی کے میدان میں کرم کلہ نہیں ملتا۔ اپنے وطن سے روانہ ہونے کے بعد سے اب تک میں نے کرم کلے کی شکل بھی نہیں دیکھی۔“

‎”ارے منّے“ گھر کی مالکہ نے اپنے لڑکے سے کہا ”بھاگ کر کھیت میں جاؤ۔ دو چار ابھی باقی ہیں۔ ایک کرم کلہ لے آؤ۔“

‎”بس اب زیادہ دیر نہیں لگے گی۔“ سپاہی نے اطمینان دلایا اور واقعی ہنڈیا میں سے خوب بھاپ اٹھنے لگی۔ ‎عین اسی وقت کسان کا بڑا بیٹا شکار پر سے واپس آیا۔ وہ ایک خرگوش مار کر ساتھ لایا تھا۔ سپاہی نے خوش ہو کر کہا ”واہ واہ! کیا کہنے، یہ تو سونے پر سہاگے کا کام دے گا۔ بہت اچھے موقع پر آیا ہے۔“

‎نوجوان شکاری نے ہنڈیا کی طرف دیکھ کر ناک کو حرکت دی اور سر کھجا کر کہا ”معلوم ہوتا ہے کہ مزیدار شوربہ تیار ہو رہا ہے۔“

‎”ہاں! اس کی ماں نے فوراً اسے آگاہ کیا۔ اس سپاہی کے پاس ایک عجیب و غریب پتھر تھا۔ ہم اُسے ابال کر شوربہ بنا رہے ہیں۔ تم اچھے موقع پر آئے ہو۔ ایک پیالہ تم بھی پی لو گے۔“

‎اس دوران میں جلدی جلدی خرگوش کی کھال اتار کر اور اس کے چھوٹے چھوٹے ٹکٹر ے کر کے فوراً ہنڈیا میں ڈال دیے۔ کچھ دیر بعد ہنڈیا سنسانے لگی اور پھر تیزی سے بھاپ نکلنے لگی۔ اور جب شکاری لڑکا اپنے کپڑے بدل کر اور ہاتھ منہ دھو کر واپس آیا تو شوربہ تیار ہوگیا تھا۔ سارے گھر میں اس کی خوشبو پھیل رہی تھی۔

‎وہ شوربہ سب گھر والوں کے لئے کافی تھا کیونکہ ہنڈیا اوپر تک بھری ہوئی تھی۔ سپاہی، کسان، اس کی بیوی، بڑا لڑکا، لڑکی، چھوٹا لڑکا اور لڑکی۔ سب پیالے بھر کر بیٹھ گئے۔ سب سے پہلے کسان نے شوربے سے چسکی لی۔ اُس نے خوش ہو کر کہا”بھئی واقعی! بہت مزے دار ہے، ایسا شوربہ تو ہم نے اپنی زندگی میں کبھی نہیں پیا۔“

‎بیوی نے بھی ایک گھونٹ پی کر ہاں میں ہاں ملائی اور کہا ”یہ عجیب قسم کا پتھر ہے۔ شوربہ کتنا مزے دار ہوگیا ہے۔ ہم اس کا ذائقہ کبھی نہیں بھولیں گے۔“

‎سپاہی بولا ”کمال کی بات ہے، یہ پتّھر کبھی گھل کر ختم نہیں ہوتا۔ آج والی ترکیب پر جب بھی عمل کیا جائے گا تو اتنا ہی خوش ذائقہ شوربہ تیار ہوسکتا ہے۔
‎
اپنا حصّہ ختم کر لینے کے بعد سپاہی نے رخصت چاہی اور خدا حافظ کہتے ہوئے اس نے شوربے کا پتھر گھر کی مالکہ ہی کو تحفے کے طور پر دے دیا اور کہا ”یہ تمھاری مہمان نوازی کا صلہ ہے۔ اسے اپنے پاس ہی رکھو اور جب بھی چاہو اسی ترکیب سے شوربہ تیار کر لیا کرو۔“

‎تازہ دَم ہو کر سپاہی نے اپنی راہ لی۔ خوش قسمتی سے تھوڑے سے فاصلے پر ویسا ہی ایک اور پتّھر سڑک پر پڑا ہوا مل گیا۔ سپاہی نے اٹھا کر اپنے جھولے میں رکھ لیا کہ شاید گھر پہنچنے سے پہلے کسی اور گاؤں میں وہ کام آجائے اور اس کی بہ دولت مزے دار شوربہ نصیب ہوجائے۔

(بیلجیئم کی ایک لوک کہانی کا اردو ترجمہ)

ایک ندی تھی اور اس کے کنارے انار کا ایک درخت۔ درخت پر کچھ انار لگے ہوئے تھے اور ندی میں کچھ مچھلیاں بھی دُمیں ہلاتی رہتی تھیں۔

زمین کے نیچے سے درخت کی جڑیں ندی میں پاؤں پھیلانے لگی تھیں۔ مچھلیوں نے کئی بار اناروں سے کہا تھا کہ ہمارے گھر میں ٹانگیں نہ پھیلائیے لیکن انہوں نے سنی ان سنی کر دی تھی۔ مچھلیوں نے طے کر لیا کہ درخت کی جڑیں چبا ڈالی جائیں۔ مچھلیوں نے جڑیں چبانا شروع کر دیا۔

اناروں نے آسمان سر پر اٹھا لیا کہ یہ کیا حرکت ہے؟ اب کی بار مچھلیوں نے سنی ان سنی کر دی۔ اناروں نے سخت دھمکیاں دیں۔ مچھلیوں نے کہا: جو کرنا ہے، کر لیجیے۔ اناروں نے آپس میں صلاح مشورہ کیا اور ان میں سے ایک انار نے خود کو ایک مچھلی پر گرا لیا۔ مچھلی کا سر پھٹ گیا۔ خون بہنے لگا۔ ساری ندی سرخ ہو گئی۔

مچھلیوں نے انار کو پکڑ کے باندھ لیا۔ اناروں نے احتجاج کیا کہ تمہیں ہمارے ساتھی کو گرفتار کر لینے کا کوئی حق نہیں پہنچتا۔ آخر ہم ایک ملک میں رہتے ہیں، جس کا کوئی قانون ہے، قاضی ہے۔ ایک مچھلی نے کہا: تمہیں کس نے حق دیا تھا کہ ہمارے گھر میں ٹانگیں پھیلاؤ؟ ایک انار کہنے لگا: پانی صرف تمہارا تھوڑی ہے؟ ہمارا بھی تو ہے۔ یہ ندی تمہاری پیدائش سے پہلے کی موجود ہے اور ہم بھی اسی وقت سے موجود ہیں۔ مچھلیاں کہتی رہیں کہ تم اناروں نے زیادتی کی ہے۔ تم نے ہماری ساتھی بے چاری کا سر پھوڑ دیا ہے۔

بات کسی طرف نہ لگی اور ان میں تُو تکار بڑھ گئی۔ آخر کار قاضی کے پاس پیش ہونا طے پایا۔ سر پھٹی مچھلی اور ہاتھ بندھا انار قاضی کے ہاں جا پہنچے۔ قاضی کے پاس کئی اور مدعی اور ملزم بھی جمع تھے۔ انہیں دیکھتے ہی قاضی کی رال ٹپکنے لگی اور اس نے کہا: آئیے آئیے، کہیے کیا مسئلہ ہے؟ دونوں نے اسے ماجرا کہہ سنایا۔ قاضی نے کہا : آپ ذرا انتظار کر لیجیے، میں پہلے دوسروں کے معاملے نمٹا لوں۔

انار اور ننھی مچھلی ایک کونے میں کھڑے ہو کر لگے انتظار کرنے۔ قاضی کام ختم کر کے ان کے پاس آیا۔ اس نے دونوں کے منہ ماتھے پر ہاتھ پھیرا۔ بہت دلاسا دیا اور پھر اپنی بیوی کو آواز دے کر کہا: بیگم! توے پر خوب گھی ڈال کر چولھے پر چڑھا دو، دوپہر کو ہم مچھلی کھائیں گے۔ اور ہاں سنو! یہ انار بھی لے جاؤ، اس کا رس مچھلی پر چھڑکیں گے تو اور ہی مزہ آئے گا۔ انار اور مچھلی کے ہاتھ پاؤں ٹھنڈے پڑ گئے۔ انہوں نے ایک دوسرے سے کھسر پھسر کی کہ دیکھو تو ہم کس مصیبت میں پھنس گئے ہیں۔ انہوں نے قاضی کی بیگم کی بہتیری منت سماجت کی کہ ہمیں ایک دوسرے سے کوئی شکایت نہیں، ہمیں جانے دیجیے مگر بیگم نے کہا: فیصلہ تو قاضی ہی کا چلتا ہے۔ مجھے تو اس پر عمل کرنا ہے اور بس۔ یہ کہہ کر اس نے مچھلی کی کھال اتاری اور اسے توے پر چڑھا دیا۔ مچھلی بے چاری تڑپتی پھڑکتی رہی۔ پھر اس نے انار کو پکڑ کر اس کا رس نکالا اور تلی ہوئی مچھلی پر چھڑک دیا۔ قاضی اور اس کے بیوی بچوں نے خوب ڈٹ کر کھانا کھایا۔

خبر اناروں اور مچھلیوں تک بھی پہنچ گئی۔ وہ دکھ اور درد میں ڈوب گئے اور انہوں نے دونوں کا سوگ منایا۔ سوگ کے دنوں ہی میں وہ اس نتیجے پر پہنچ گئے کہ قاضی اگر باہر کا ہوا تو ان کے لیے کبھی کچھ نہیں کرے گا۔ انہوں نے ایک دوسرے سے معاہدہ کر لیا کہ ایک دوسرے کے حقوق کی خلاف ورزی نہیں کیا کریں گے۔

(کتاب سفید پرندہ سے منتخب کردہ کہانی)