Tag: لٹیرے

کراچی: شہر قائد میں خاتون سے لوٹ مار کے دوران اسے بچانے کے لیے آنے والا شہری لٹیروں کی گولی سے زخمی ہو گیا۔

تفصیلات کے مطابق کراچی کے علاقے گلشن اقبال بلاک 13 سی میں دن دہاڑے اسٹریٹ کرائم کی واردات میں ایک شہری ندیم گولی لگنے سے شدید زخمی ہو گیا۔

اسٹریٹ کرائم کی سی سی ٹی وی فوٹیج اے آر وائی نیوز پر بھی چلائی گئی، خاتون جیسے ہی ہائی روف میں بیٹھنے کے لیے گاڑی کے دروازے پر پہنچیں، انتظار میں پہلے سے موجود موٹر سائیکل سوار 2 ملزمان نے گاڑی کو گھیر لیا۔

ایک ملزم نے ہیلمٹ پہن رکھا تھا جب کہ دوسرے کا چہرہ کھلا تھا، دونوں نے پوری دیدہ دلیری کے ساتھ واردات کی اور موٹر سائیکل پر بیٹھ کر فرار ہو گئے۔

خاتون سے لوٹ مار کے دوران ایک راہ گیر نے دوڑتے ہوئے آ کر اسے بچانے کی کوشش کی تاہم مسلح لٹیرے نے اس پر فائر داغ دیا، جس سے اس کی ٹانگ زخمی ہو گئی اور وہ گر کر تڑپنے لگا۔

واقعے میں زخمی شخص ندیم کو بعد ازاں جناح اسپتال منتقل کیا گیا جہاں ان کا علاج جاری ہے۔

سی سی ٹی وی فوٹیج میں دیکھا گیا کہ لوٹ مار کے بعد شہری کو زخمی کر کے دونوں ڈاکو موٹر سائیکل پر بیٹھ کر فرار ہو گئے، خاتون بھی ہائی روف گاڑی میں جلدی سے بیٹھ کر چلی گئیں، جب کہ زخمی شہری زمین پر پڑا تڑپتا رہا، جسے بعد ازاں لوگوں نے طبی امداد کے لیے اسپتال منتقل کیا۔

واضح رہے کہ کرونا وائرس کی وجہ سے کراچی میں لگائے جانے والے لاک ڈاؤن کے بعد اسٹریٹ کرائمز میں نمایاں اضافہ ہو گیا ہے۔

کراچی: شہر قائد کے علاقے بلدیہ ٹاؤن میں لٹیروں نے امام مسجد کو بھی نہ بخشا، 2 مسلح ملزمان امام مسجد کو لوٹ کر فرار ہو گئے۔

تفصیلات کے مطابق کراچی میں اسٹریٹ کرائمز کا سلسلہ جاری ہے، پولیس تا حال ان جرائم کو کنٹرول نہیں کر سکی ہے، آج بلدیہ ٹاؤن میں لٹیروں نے امام مسجد کو بھی لوٹ لیا۔

واقعے کی سی سی ٹی وی فوٹیج بھی سامنے آ گئی ہے، جس میں ملزمان  امام مسجد کو لوٹتے ہوئے نظر آتے ہیں۔

2 موٹر سائیکل سوار ملزمان نے امام مسجد کا بینک سے پیچھا کیا، گھر کے پاس اترتے ہی ملزمان نے امام مسجد سے 90 ہزار روپے چھین لیے۔

یہ بھی پڑھیں:  کراچی میں بد امنی کبھی واپس نہیں آنے دیں گے: ایڈیشنل آئی جی کراچی

یاد رہے کہ دو دن قبل کورنگی میں بھی بینک سے رقم نکلوانے والے شہری کو گھر کے باہر لوٹ لیا گیا جس کی ویڈیو بھی منظر عام پر آ گئی تھی۔

ایڈیشنل آئی جی ڈاکٹر امیر احمد شیخ نے کہا تھا کہ کراچی میں اسٹریٹ کرائمز میں پڑھے لکھے نوجوان ملوث ہیں، بد امنی کا خاتمہ ہو چکا ہے اب ریکوری کے مرحلے سے گزر رہے ہیں، کراچی میں بد امنی کبھی واپس نہیں آنے دیں گے۔

ڈاکٹر امیر شیخ کا کہنا تھا کہ غربت اور بے روزگاری کے باعث جرائم بڑھ رہے ہیں، نوکری پیشہ نوجوان موبائل چھینتے ہیں، غربت اور بے روزگاری جرائم بڑھنے کی وجوہات ہیں، نوجوانوں سے جیلیں بھری ہوئی ہیں۔