ARYNews.tv | Urdu – Har Lamha Bakhabar

Tag: لڑائی

  • اسرائیل غزہ میں کب تک لڑائی جاری رکھے گا؟ اسرائیلی آرمی چیف کا بڑا اعلان

    اسرائیل غزہ میں کب تک لڑائی جاری رکھے گا؟ اسرائیلی آرمی چیف کا بڑا اعلان

    اسرائیلی آرمی چیف نے اعلان کیا ہے کہ اسیروں کی رہائی تک لڑائی جاری رہے گی، معاہدہ نہ ہوا تو لڑائی بلاتعطل جاری رہے گی۔

    غیرملکی میڈیا رپورٹس کے مطابق اسرائیلی آرمی چیف نے دعویٰ کیا ہے کہ 49 اسیر اب بھی غزہ میں موجود ہیں، غزہ میں موجود اسیروں میں صرف 22 زندہ ہیں، آئندہ دنوں میں معاہدے کی کامیابی واضح ہوجائے گی۔

    اسرائیلی آرمی چیف نے کہا کہ جنگ بندی صرف اس وقت ممکن ہوگی جب اسیر رہا کیے جائیں گے، جنگ بندی مذاکرات ناکام ہوئے تو جنگ مزید تیز کردی جائے گی۔

    دوسری جانب حماس نے اعلان کیا ہے کہ آزاد اور خودمختار فلسطینی ریاست کے قیام تک مزاحمت جاری رہے گی، فلسطین کو آزادی ملنے تک ہتھیار ڈالیں گے نہ سر جھکائیں گے، مسلح جدوجہد قومی حقوق کی بحالی تک جاری رہے گی۔

    حماس نے کہا کہ القدس کو دارالحکومت بناکر ایک آزاد ریاست کا قیام کیا جائے، صدر ٹرمپ کے ایلچی کا غزہ کا دورہ محض دکھاوا تھا، حماس نے امریکی ایلچی کی امداد کی پرامن تقسیم کے دعوے کو جھوٹ قرار دے دیا۔

    فلسطینی تنظیم نے کہا کہ اسٹیو وٹکوف کے دورے کا مقصد حقائق چھپا کر عالمی رائے عامہ کو گمراہ کرنا ہے، وٹکوف کے بیانات زمینی حقائق سے متصادم، محض جھوٹی پروپیگنڈہ مہم ہے۔

    https://urdu.arynews.tv/israeli-soldiers-use-silencers-while-shooting-gaza-aid-seekers/

  • کبوتر بازی کا انجام خوں ریز جھگڑا، لاشیں گر گئیں

    کبوتر بازی کا انجام خوں ریز جھگڑا، لاشیں گر گئیں

    فیصل آباد: پنجاب کے شہر فیصل آباد کے علاقے عبداللہ پل پر کبوتر بازی کا مقابلہ خوں ریز جھگڑے میں تبدیل ہو گیا، فریقین میں فائرنگ کے تبادلے میں 2 افراد ہلاک اور 4 زخمی ہو گئے۔

    تفصیلات کے مطابق فیصل آباد میں کبوتر بازی کے جھگڑے میں ایک خاتون سمیت دو افراد جانوں سے ہاتھ دھو بیٹھے، حملہ آور فائرنگ کر کے موٹر سائیکلوں پر فرار ہو گئے۔

    تھانہ ڈی ٹائپ کالونی کے علاقے عبداللہ پل کے رہائشی اچھو گروپ اور یونس گروپ کے مابین پیر کی صبح کبوتروں کی بازی پر جھگڑا ہو گیا تھا۔ اس رنجش پر رات کو اچھو گروپ کے موٹر سائیکل سوار مبشر، قاسم، مدثر، ٹوڈی، بھالو سمیت 8 افراد نے یونس کے گھر جا کر فائرنگ کر دی۔

    جان کی پروا کیے بغیر جلتا ٹینکر چلا کر آبادی سے دور لے جانے والا بھی دم توڑ گیا

    گولیاں لگنے سے یونس، اس کی بیوی کنیزاں، شفاقت اور ناصر زخمی ہوئے، فائرنگ کے تبادلے میں 2 حملہ آور مبشر اور قاسم بھی زخمی ہوئے۔ ریسکیو ٹیم نے زخمیوں کو جنرل اسپتال سمن آباد منتقل کیا، جہاں کنیزاں اور مبشر دم توڑ گئے۔

    فائرنگ کے بعد حملہ آور فرار ہو گئے جن کی گرفتاری کے لیے چھاپے مارے جا رہے ہیں، متاثرین کا کہنا ہے کہ پولیس نے بروقت کارروائی نہ کر کے نقصان کو بڑھنے دیا۔

    ادھر گوجرانوالہ میں اڑتالی ورکاں میں سابقہ رنجش پر فائرنگ سے 3 افراد قتل اور 2 زخمی ہو گئے ہیں، پولیس کی بھاری نفری موقع پر پہنچ گئی، اور لاشوں کو پوسٹ مارٹم کے لیے اسپتال منتقل کر دیا، ابتدائی تحقیقات کے مطابق واقعہ پرانی دشمنی کا شاخسانہ ہے۔

  • ’پی پی اور ن لیگ کی لڑائی کا انجام جلد حکومت کا خاتمہ ہے‘

    ’پی پی اور ن لیگ کی لڑائی کا انجام جلد حکومت کا خاتمہ ہے‘

    پاکستان پیپلز پارٹی اور مسلم لیگ ن کے درمیان سیاسی چپقلش اور ایک دوسرے کے خلاف بیان بازی پر پی ٹی آئی رہنما نے ردعمل دیا ہے۔

    پاکستان تحریک انصاف کے رہنما شوکت یوسف زئی نے وفاق میں حکمران جماعت مسلم لیگ ن اور اس کی اتحادی پاکستان پیپلز پارٹی کے درمیان اختلافات اور دونوں جانب سے ایک دوسرے کے خلاف بیانات پر ردعمل کا اظہار کرتے ہوئے اس کو وفاقی حکومت کے جلد خاتمے سے تعبیر کیا ہے۔

    شوکت یوسف زئی نے اپنے بیان میں کہا ہے کہ دونوں جماعتوں کے رہنما ایک دوسرے پر کام نہ کرنے کے الزامات لگا رہے ہیں۔ دونوں جماعتیں اپنے اپنے مفادات کیلیے لڑ رہی ہیں اور اس لڑائی کا انجام جلد حکومت کے خاتمے پر ہونیوالا ہے۔

    پی ٹی آئی رہنما کا کہنا تھا کہ ایک دوسرے کی مخالفت میں دونوں جماعتیں ایک دوسرے کے خلاف بیانات میں سچ کو آشکار کر رہی ہیں۔ دونوں جماعتوں نے ہی ملک کو نقصان پہنچایا ہے اور اس کا ان کو حساب بھی دینا پڑے گا۔

    انہوں نے مزید کہا کہ اپوزیشن کا گرینڈ الائنس بہت جلد بننے والا ہے۔ عید کے بعد گرینڈ اپوزیشن الائنس کی حکومت مخالف تحریک کا آغاز ہوگا۔

  • کتے اور بلی میں آپس میں لڑائی کی وجہ کیا ہے؟

    کتے اور بلی میں آپس میں لڑائی کی وجہ کیا ہے؟

    کیا آپ نے کبھی غور کیا ہے کہ کتا اور بلی آپس میں لڑتے کیوں رہتے ہیں؟ آئیں آج اس کی وجہ جاننے کی کوشش کرتے ہیں۔

    کتا اور بلی انسان کے قریب سمجھے جانے والے جانور ہیں اور اکثر دونوں کو ایک ہی گھر میں رکھا بھی جاتا ہے، لیکن ان کے درمیان دوستی کا وہ رشتہ نہیں بن پاتا جو ہونا چاہیئے اور جب بھی موقع ملتا ہے یہ ایک دوسرے پر غرانے بلکہ لڑنے بھڑنے سے بھی گریز نہیں کرتے۔

    اب اس کی وجہ امریکی سائنس دانوں نے ڈھونڈ لی ہے جن کا کہنا ہے کہ ان کے درمیان خاندانی دشمنی کی جڑیں تاریخی طور پر بہت گہری ہیں۔

    شمالی امریکا کی سائنسدانوں کو کچھ ایسے فوسلز ملے ہیں جن سے پتہ چلتا ہے کہ 1 کروڑ 80 لاکھ سال قبل ان دونوں کے درمیان جنگ چلتی رہی جو اس قدر شدید تھی کہ اس میں کتوں کی 40 قسمیں بھی معدوم ہوئیں۔

    رپورٹ میں بتایا گیا ہے کہ بلیوں کی موجودہ شکل سے مماثل جانوروں نے امریکی براعظم میں ان جانوروں کو بری طرح متاثر کیا تھا جن کے ڈھانچے موجودہ شکل کے کتوں سے بہت حد تک ملتے جلتے ہیں۔

    اس وقت کتے بھی بڑی تعداد میں شمالی امریکا میں موجود تھے جن کے ساتھ بلیوں کی خصوصی چپقلش رہی۔

    جانوروں کی ملنے والی باقیات سے سائنس دانوں پر یہ بات منکشف ہوئی ہے کہ کتوں کی بعض اقسام موسمیاتی تبدیلیوں سے بھی معدوم ہوئیں جبکہ بلیاں موسم کے مقابلے میں ان سے زیادہ سخت جان ثابت ہوئیں۔

    دونوں کے درمیان جنگیں خوراک کے حصول کے معاملے پر ہوتی رہیں۔

    رپورٹ میں بتایا گیا ہے کہ تقریباً 2 کروڑ سال قبل شمالی امریکہ میں کتوں کی 30 سے زائد اقسام رہتی تھیں جبکہ اس وقت بلیاں ایشیا اور الاسکا کے درمیانی علاقوں میں موجود رہیں۔

    تاہم قدیم بلیوں کی چند اقسام شمالی امریکا میں بھی تھیں جو شکار کو پکڑنے میں کتوں سے زیادہ طاق تھیں، جبکہ کتے بھی گوشت خور تھے اور دونوں کے شکار ملتے جلتے تھے، پھر ایک موقع پر بلیوں نے کتوں کو اپنے شکار کے لیے خطرہ سمجھتے ہوئے ان کے خلاف اعلان جنگ کر دیا۔

    ایک خیال یہ بھی ظاہر کیا جاتا ہے کہ اس وقت کی جنگلی بلیوں میں موجودہ چیتے اور شیر جیسے جانور بھی شامل تھے جنہوں نے کتوں پر بے پناہ حملے کیے اور ان کے نتیجے میں ان کی 40 قسمیں معدوم ہو گئیں اور صرف 9 قسم کے کتے رہ گئے۔

    ماہرین کتوں اور بلیوں کے درمیان کشمکش کو اسی دور سے جوڑتے ہیں۔

  • دو خونخوار جانوروں کی لڑائی میں فتح کس کی ہوئی؟

    دو خونخوار جانوروں کی لڑائی میں فتح کس کی ہوئی؟

    شیر اور مگر مچھ دو ایسے جانور ہیں جن کے بارے میں طے کرنا مشکل ہے کہ کون زیادہ خطرناک ہے، لیکن اگر یہ دونوں جانور آپس میں بھڑ جائیں تو کیا ہوگا؟

    سوشل میڈیا پر وائرل ایک ویڈیو میں دیکھا جاسکتا ہے کہ کچھ شیر ایک مگرمچھ پر کئی بار شدید حملہ کرتے ہیں اور کس طرح ایک شیر، مگر مچھ کو اپنے پاؤں سے گھسیٹنے کی کوشش کرتا ہے۔

    یہ ویڈیو ایک 15 سالہ طالب علم کونور ڈاؤس نے اپنے اہل خانہ کے ساتھ جنوبی افریقہ میں ایک گیم ریزرو کا دورہ کرتے ہوئے ویڈیو بنائی اور اسے کروگر نیشنل پارک کے سیاحوں کے انسٹاگرام پیج پر پوسٹ کیا۔

    انہوں نے کہا کہ ہم نے ایک شیر کو ڈیم کے ساتھ کچی سڑک پر جاتے ہوئے دیکھا، پھر چند دوسرے شیر بھی سامنے آئے۔ یہ سب چلتے ہوئے دھوپ میں پڑے ایک مگرمچھ کے پاس پہنچے۔

    ان میں سے ایک شیر نے مگرمچھ کو گھسیٹںے کی کوشش کی مگر وہ بھرپور مزاحمت کرتا رہا۔

    آخر میں مگرمچھ بھاگنے میں کامیاب ہوگیا، مگرمچھ تیر کر دور چلا گیا اور شیر ایسے لیٹ گئے جیسے کچھ ہوا ہی نہیں۔

  • بھارت: ریسلنگ کے مقابلے کے دوران ریسلر ہلاک

    بھارت: ریسلنگ کے مقابلے کے دوران ریسلر ہلاک

    نئی دہلی: بھارت میں ایک پہلوان لڑائی کے دوران ہلاک ہوگیا، پہلوان کو مدمقابل نے زمین پر پٹخا تھا جس سے اس کی گردن ٹوٹ گئی۔

    بھارتی میڈیا کے مطابق ریاست اتر پردیش کے ایک گاؤں میں ریسلنگ کا مقابلہ منعقد ہوا جس میں ساجد اور مہیش نامی دو مقامی پہلوانوں نے حصہ لیا۔

    مقابلے کی ویڈیو سوشل میڈیا پر وائرل بھی ہوگئی جس میں ایک پہلوان کو زمین پر گرتے دیکھا جاسکتا ہے۔

    ویڈیو میں دیکھا جاسکتا ہے کہ ساجد نے مہیش کو اٹھا کر زور سے زمین پر پٹخا، اس دوران مہیش کی گردن مڑ کر ٹوٹ گئی۔

    داؤ کے بعد مہیش بے ہوش ہوگیا جس پر مجمع خوشی سے چلانے لگا، تاہم جلد ہی یہ خوشی تشویش میں بدل گئی جب ساجد نے زمین پر گرے مہیش کو اٹھانے کی کوشش کی لیکن وہ بے حس و حرکت پڑا رہا۔

    اس دوران مزید افراد بھی دونوں کے گرد جمع ہوگئے اور مہیش کو ہوش میں لانے کی کوشش کرنے لگے۔ اسپتال لے جائے جانے کے بعد مہیش کو مردہ قرار دے دیا گیا۔

    مقامی پولیس کے مطابق انہیں اس واقعے کے حوالے سے کوئی اطلاع نہیں نہ ہی کسی نے کوئی رپورٹ درج کروائی ہے، اگر کوئی واقعے کی رپورٹ درج کرواتا ہے تو وہ اپنی کارروائی کا آغاز کریں گے۔

  • میاں بیوی ویلنٹائن ڈے پر 3 ماہ کے لیے ہتھکڑیوں میں جکڑ گئے

    میاں بیوی ویلنٹائن ڈے پر 3 ماہ کے لیے ہتھکڑیوں میں جکڑ گئے

    خارکیف: یوکرین میں ایک جوڑے نے روز روز کے لڑائی جھگڑوں سے تنگ آ کر انوکھا قدم اٹھا لیا، دونوں نے خود کو تین ماہ کے لیے ہتھکڑیاں لگا دیں۔

    تفصیلات کے مطابق یوکرین میں ایسے میاں بیوی کی تصاویر سامنے آئی ہیں، جنھیں دیکھ کر پہلی نظر میں ایسا لگتا ہے کہ کہ یہ جیل سے فرار قیدی ہوں گے، لیکن آپ کو یہ جان کر حیرت ہوگی کہ یہ لڑائی جھگڑے سے بے زار میاں بیوی ہیں، جنھوں نے جھگڑوں سے چھٹکارے کے لیے یہ عجیب ترکیب نکالی ہے۔

    روز روز کی لڑائی سے تنگ آ کر الیگزینڈر کوڈلے اور ان کی بیوی وکٹوریا پسٹوویٹووا نے ویلنٹائن ڈے پر تین ماہ کے لیے خود کو ہتھکڑیوں میں جکڑ لیا، جوڑے کا یہ منفرد تجربہ سوشل میڈیا پر خوب وائرل ہو رہا ہے۔

    رپورٹس کے مطابق 33 سالہ آن لائن کار سیلز مین الیگزینڈر اور 28 سالہ بیوٹیشن وکٹوریا خارکیف کے رہائشی ہیں، دونوں کے درمیان کچھ مسائل تھے جن کی وجہ سے ان کا رشتہ خطرے میں پڑ گیا تھا، اس پر انھوں نے فیصلہ کیا کہ آئندہ تین ماہ تک ہر لمحہ وہ ساتھ گزاریں گے، اور اس طرح اپنا رشتہ ٹوٹنے سے بچا لیں گے۔

    معلوم ہوا کہ یہ آئیڈیا الیگزینڈر کا تھا، ایک دن وکٹوریا نے اس سے کہا کہ وہ اسے چھوڑنا چاہتی ہے، تو الیگزینڈر نے یہ آئیڈیا پیش کر دیا، جسے پہلے تو وکٹوریا نے مسترد کیا لیکن پھر مان گئی۔

    الیگزینڈر نے بتایا کہ ابتدا میں تو بہت مشکل پیش آئی لیکن اب ہر گزرتے دن کے ساتھ ہم ہر لمحہ ایک ساتھ رہنے کی حالت کے ساتھ عادی ہوتے جا رہے ہیں، دراصل ہفتے میں ایک یا دو بار ہم رشتہ توڑنے کی باتیں کیا کرتے تھے، جب بھی وکٹوریا یہ کہتی تو میں جواب دیتا کہ میں تمھیں خود سے جوڑ لوں گا۔

    الیگزینڈر کا کہنا تھا کہ اب تقریباً ایک ماہ سے ہمیں ہر کام ایک ساتھ کر کرنا پڑتا ہے، وکٹوریا نے بتایا کہ ہتھکڑیوں نے میری زندگی میں مجھے نئے جذبات سے آشنا کر دیا ہے۔

    واضح رہے کہ اب یہ جوڑا سوشل میڈیا پر اپنی تصاویر پوسٹ کر رہا ہے، اور ایک دوسرے کو سمجھنے اور ایک دوسرے کے احترام کے حوالے سے دوسروں کو سبق بھی دے رہے ہیں، یہ جوڑا یوکرین کے ٹی وی پر ایک ٹاک شو میں بھی نمودار ہوا۔

    الیگزینڈر نے دل چسپ بات یہ بتائی کہ ان کے درمیان لڑائی جھگڑا اب بھی ختم نہیں ہوا ہے، اور وہ اب بھی جھگڑتے ہیں، لیکن فرق یہ آیا ہے کہ جب ہمارا جھگڑا بند گلی میں داخل ہو جاتا ہے تو اب ہم صرف ایک دوسرے سے بات کرنا چھوڑ دیتے ہیں، پہلے ہم اپنا سامان باندھنے لگ جاتے تھے۔

  • بچے کی عمر کا پہلا سال والدین کے لڑائی جھگڑوں کی نذر

    بچے کی عمر کا پہلا سال والدین کے لڑائی جھگڑوں کی نذر

    والدین بننا زندگی میں تبدیلیاں لانے والا عمل ہے جو ساتھ ہی والدین کی ذمہ داریوں میں بھی اضافہ کردیتا ہے۔ تاہم اکثر والدین اس ذمہ داری کو سنبھالنے میں مشکلات کا شکار ہوجاتے ہیں۔

    حال ہی میں ایک سروے سے علم ہوا کہ بچے کی پیدائش کا پہلا سال والدین کے لڑائی جھگڑوں کی نذر ہوجاتا ہے۔

    امریکا میں کیے جانے والے اس سروے کے لیے 2 ہزار والدین کا جائزہ لیا گیا جس میں دیکھا گیا والدین ایک دن میں کم از کم 7 باتوں پر اختلاف کرتے ہیں جس کا اختتام چھوٹی یا بڑی لڑائی پر ہوتا ہے۔

    یہ اختلافات بچے کی پرورش، اس کی دیکھ بھال اور بچے کے حوالے سے دیگر امور پر ہوتے ہیں۔

    والدین کے درمیان اس بات پر بھی لڑائی ہوتی ہے کہ دونوں میں سے کون زیادہ تھکا ہوا ہے اور رات کے وقت کون بچے کے لیے جاگے گا۔ دونوں کے درمیان گھریلو کام بھی لڑائی کی وجہ بنتے ہیں۔

    سروے میں دیکھا گیا کہ ایسا جوڑا جو بات چیت کے ذریعے تمام مسائل حل کرنے پر یقین رکھتا ہے وہ بھی اس ایک سال کے دوران غلط فہمیوں اور لڑائی جھگڑوں سے نہیں بچ سکتا۔

    ماہرین کے مطابق بچے کی عمر کے پہلے سال میں والدین مسلسل دیکھ بھال کی وجہ سے نیند کی کمی کا شکار بھی ہوتے ہیں اور یوں وہ چڑچڑے ہو کر ذرا ذرا سی بات پر آپس میں لڑنے لگتے ہیں۔

    سروے میں یہ بھی دیکھا گیا کہ اکثر والدین کو محسوس ہوتا ہے کہ انہوں نے بچے کی پیدائش میں جلد بازی کی اور انہیں مزید وقت لینا چاہیئے تھا، 10 میں سے 4 والدین کا خیال ہوتا ہے کہ انہیں والدین بننے سے قبل مزید تیاری کرنی چاہیئے تھی۔

  • افغانستان میں داعش کےخلاف کارروائی‘2امریکی فوجی ہلاک

    افغانستان میں داعش کےخلاف کارروائی‘2امریکی فوجی ہلاک

    کابل: امریکہ محکمہ دفاع کاکہناہےکہ افغانستان میں داعش کےخلاف ایک کارروائی میں دو امریکی فوجی ہلاک جبکہ ایک زخمی ہوگیا۔

    تفصیلات کےمطابق پیٹاگون کےترجمان کیپٹن جیف ڈیوس کا کہنا تھا کہ فوجی اہلکار صوبہ ننگرہار میں لڑائی کے دوران مارے گئے۔

    پیٹاگون کےمطابق یہ فوجی کارروائی افغان نیشنل ڈیفینس اور سکیورٹی فورسز کے اشتراک کے ساتھ کی گئی تھی۔

    محکمۂ دفاع کاکہناہےکہ ہلاک ہونے والے فوجیوں کے خاندانوں کو اس بارے میں مطلع کر دیا گیا ہے تاہم ان کے نام عارضی طور پر ذرائع ابلاغ میں جاری نہیں کیے گئے۔

    داعش کےخلاف کارروائی میں امریکی فوجی ہلاک

    خیال رہےکہ اس سے قبل رواں ماہ کے آغاز میں امریکی فوج کے اسٹاف سارجنٹ مارک ڈی الینسر کی اسی صوبے میں ہلاکت ہوئی تھی۔

    روس طالبان کو ہتھیار فراہم کررہاہے‘جنرل نکلسن

    یاد رہےکہ افغانستان میں امریکی فوج کے کمانڈر جنرل جان نکلسن کا کہنا ہے کہ ’داعش کے خلاف جنگ دنیا کے لیے اہم ہے،لیکن افسوسناک بات یہ ہے کہ یہ قربانی سے خالی نہیں ہے۔‘

    امریکا نے افغانستان پر دنیا کا سب سے بڑا بم گرادیا

    واضح رہےکہ یہ فوجی کارروائی ننگرہار صوبے کے ضلع اچین کے قریب کی گئی جہاں حال ہی میں امریکہ نے’بموں کی ماں‘ کہلایا جانے والا 9800 کلوگرام وزنی بم گرایا تھا۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں

  • طالبان اور داعش کے درمیان جھڑپیں‘101جنگجو ہلاک

    طالبان اور داعش کے درمیان جھڑپیں‘101جنگجو ہلاک

    کابل: شمالی افغانستان میں افغان طالبان اور داعش کے درمیان جھڑپوں کے دوران 101کے قریب جنگجو ہلاک ہوگئےہیں۔

    تفصیلات کےمطابق شمالی افغانستان کے ضلع درزاب میں طالبان اور داعش کےدرمیان جاری لڑائی کےدوران اب تک 101جنگجو ہلاک جبکہ مزید ہلاکتوں کا خدشہ ہے۔،

    شمالی افغانستان کےگورنرکے ترجمان محمد رضا غفوری کاکہناہےکہ طالبان اور داعش کے درمیان منگل سے جاری جھڑپوں کےدوران 76طالبان اور15داعش کے جنگجو مارے گئے ہیں۔

    دوسری جانب شمالی افغانستان کے ضلع درزاب کی مقامی حکومت کا حوالہ دیتے ہوئے افغان میڈیا کا کہنا ہے کہ طالبان اور داعش کی لڑائی میں کم ازکم 91 جنگجو مارے ہو چکے ہیں۔

    افغانستان میں فوجی ہیڈکوارٹر پرحملہ‘140فوجی ہلاک

    خیال رہےکہ21اپریل کو افغان صوبہ بلخ میں ہونے والے طالبان کے حملے میں 140فوجی ہلاک اور متعدد زخمی ہوئے تھے۔

    افغان آرمی چیف ‘وزیردفاع عہدے سےدستبردار

    بعدازاں رافغان آرمی چیف جنرل قدم شاہ شاہم اور وزیردفاع عبداللہ خان حبیبی اپنے عہدے سے دستبرار ہوگئے تھے۔صدر اشرف عنی نے دونوں کے استعفے قبول کرلیےتھے۔

    واضح رہےکہ افغان حکام کا کہنا تھاکہ 13 اپریل کوامریکی نان نیو کلیئر بم حملے میں داعش کے 36جنگجو ہلاک ہوئےتھے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں