ڈھاکہ: بنگلہ دیش میں ایک لڑکا آنکھ مچولی کھیلنے کے دوران کنٹینر میں جا چھپا جس نے اسے دوسرے ملک پہنچا دیا۔
بین الاقوامی ویب سائٹ کے مطابق بنگلہ دیش میں شپنگ کنٹینر میں چھپ کر آنکھ مچولی کھیلنے والا لڑکا ایک دوسرے ملک پہنچ گیا۔
مذکورہ لڑکا بنگلہ دیش کے ساحلی شہر اور بندر گاہ چٹاگانگ میں کھیل کے دوران ایک کنٹینر میں چھپا تھا، اس دوران کنٹینر جہاز پر لاد دیا گیا تاہم لڑکے کی خوش قسمتی یہ رہی کہ وہ چھ روز تک کنٹینر میں مقفل رہنے کے باوجود زندہ بچ گیا۔
17 جنوری کو جب یہ کنٹینر ایک بنگلہ دیشی جہاز سے جنوب مشرقی ایشیائی ملک ملائیشیا کی بندر گاہ کلانگ پر ان لوڈ کیا گیا تو وہاں موجود ملائیشیائی عملہ لڑکے کو متعدد مقفل کنٹینرز میں سے ایک میں دیکھ کر حیران رہ گیا۔
لڑکا مقامی زبان نہیں جانتا تھا جس کی وجہ سے حکام کوئی معلومات نہیں لے پائے، انہیں شک ہوا کہ یہ انسانی اسمگلنگ کے جرائم کا شکار ہے، جس پر انہوں نے پولیس کو طلب کرلیا۔
بعد ازاں معلوم ہوا کہ لڑکا اپنے دوستوں کے ساتھ چٹاگانگ کی بندر گاہ کے قریب آنکھ مچولی کھیلنے کے دوران کنٹینر میں چھپا، تاہم اندر جاکر وہ اس میں لاک ہوگیا اور چھ روز بند رہنے کے بعد ملائیشیا پہنچ گیا۔
اسے باہر نکالنے کے موقع پر پورٹ ورکرز نے جو تصاویر اور ویڈیوز بنائیں اس میں لڑکا امتہائی کمزور اور لاغر حالت اور ایک اجنبی ماحول میں پریشان نظر آیا، بعد ازاں اسے ایک ایمبولینس میں مقامی اسپتال منتقل کیا گیا۔
بعد ازاں اسے فہیم کے نام سے شناخت کیا گیا، لڑکے نے ملائیشین حکام کو بتایا کہ وہ کھیل کے دوران کنٹینر میں سوگیا تھا، جاگنے کے بعد خوف اور پریشانی میں وہ کافی چیخا اور رویا لیکن کوئی اس کی مدد کو نہ آیا اور اگلے 6 روز کنٹینر میں بند رہا اور 2 ہزار میل دور ملائیشیا پہنچا دیا گیا۔
