راولپنڈی: پاکستان تحریک انصاف (پی ٹی آئی) کی جانب سے جلسے کی دائر درخواست واپس لینے کے باوجود ضلعی انتظامیہ نے لیاقت باغ کے داخلی دروازوں کو تالے لگا دیے۔
ضلعی انتظامیہ نے لیاقت باغ کو چاروں اطراف سے مکمل سیل کرنے کا فیصلہ کیا ہے اور داخلی دروازوں کو سیل کرنے کے بعد سرکاری ملازمین تعینات کر دیے۔
انتظامیہ نے اس کے اطراف سرکاری دفاتر کے ملازمین کو کارڈز ہمراہ رکھنے کی ہدایت کر دی۔
اس سے کچھ دیر قبل پنجاب حکومت نے راولپنڈی، جہلم، چکوال اور اٹک میں دفعہ 144 نافذ کرنے کا نوٹیفکیشن جاری کر دیا جس کے مطابق راولپنڈی کے چاروں اضلاع میں جلسہ، جلوس اور اجتماع پر پابندی عائد ہوگی۔
پی ٹی آئی نے 28 ستمبر کو راولپنڈی میں جلسے کیلیے درخواست دائر کی تھی جو انہوں نے آج واپس لے لی۔ لاہور ہائیکورٹ راولپنڈی بینچ میں لیاقت باغ کے مقام پر پی ٹی ائی کے جلسے کی درخواست پر سماعت ہوئی۔
جسٹس چوہدری عبدالعزیز نے درخواست پر سماعت کی جبکہ پی ٹی آئی کی جانب سے ایڈوکیٹ محمد فیصل مالک عدالت میں پیش ہوئے اور عدالت کے روبرو کہا کہ پارٹی قیادت کی ہدایت پر ہم یہ درخواست واپس لے رہے ہیں۔
اس پر جسٹس چوہدری عبدالعزیز نے کہا کہ یہ کیا آپ درخواست دائر کر کے واپس بھی لے رہے ہیں کل تو آپ کا راولپنڈی میں جلسہ ہے۔
جسٹس چوہدری عبدالعزیز نے وکیل پی ٹی آئی سے استفسار کیا کہ درخواست ہم نے تین روز قبل لاہور ہائیکورٹ راولپنڈی بینچ میں دائر کی تھی، آج سماعت کیلیے مقرر ہوئی ہے اس سے قبل ڈپٹی کمشنر راولپنڈی کو درخواست دی جو مسلسل ٹال مٹول کرتے رہے ہیں تاہم پارٹی کی اعلی قیادت نے یہ فیصلہ کیا ہے۔
وکیل محمد فیصل ملک نے کہا کہ ہم اپنی دائر درخواست واپس لیتے ہیں، بعد ازاں پی ٹی ائی قیادت کی ہدایت پر پی ٹی ائی کے وکیل محمد فیصل ملک نے دائر درخواست فی الحال واپس لے لی۔
