Tag: لیبیا کشتی حادثہ

اسلام آباد : لیبیا کشتی حادثے میں جاں بحق چھ پاکستانیوں کی میتیں وطن واپس پہنچ گئیں۔

تفصیلات کے مطابق لیبیا کشتی حادثے میں جاں بحق چھ پاکستانیوں کی میتیں وطن واپس پہنچ گئیں، وفاقی وزیر برائے ہاؤسنگ اینڈ ورکس ریاض حسین پیرزادہ نے اسلام آباد ایئرپورٹ پر میتیں وصول کیں۔

اس موقع پر وزیر ہاؤسنگ نے کہا کہ متوفین کے لواحقین سے دلی ہمدردی کا اظہار کرتا ہوں اور اس افسوسناک موقع پر لواحقین کے غم میں شریک ہوں۔

وفاقی وزیر کا کہنا تھا کہ 5 فروری کو پیش آنے والے سانحے نے ملک کے کئی خاندانوں کو سوگ میں ڈال دیا، حکومت متاثرین کے خاندانوں کے ساتھ ہر ممکن سطح پر کھڑی ہے۔

ریاض حسین پیرزادہ نے کہا ہم نے تمام ضروری انتظامات کیے ہیں کہ متوفین کے جسد خاکی ان عزیزوں تک پہنچائے جا سکیں۔

ان کا مزید کہنا تھا کہ لیبیا میں زندہ بچ جانے والے 37 پاکستانیوں کی واپسی کے لیے بھی کوششیں جاری ہیں، باقی جاں بحق افراد کو جلد وطن واپس لائیں گے۔

وفاقی وزیر کا کہنا تھا کہ یہ وقت سبق سکھاتا ہے کہ غیر قانونی ذرائع سے یورپ جانے کی کوشش کتنی خطرناک ہو سکتی ہے۔

انھوں نے نوجوانوں سے اپیل کی کہ وہ ایسے خطرناک راستے اختیار نہ کریں اورقانونی ذرائع کے ذریعے ہی بیرون ملک جانے کی کوشش کریں۔ متوفین کے لواحقین سے دلی ہمدردی کا اظہار کرتا ہوں

اسلام آباد : ترجمان دفترخارجہ نے لیبیا کشتی حادثہ میں 16 پاکستانیوں کی موت کی تصدیق کرتے ہوئے کہا 10 لاپتہ ہے اور 37 افراد زندہ بچ گئے۔

تفصیلات کے مطابق غیرقانونی طریقے سے بیرون ملک جانے کی لالچ آئے روز جانیں لے رہی ہے۔

لیبیا کشتی حادثے میں جاں بحق پاکستانیوں کے نام، اور جاں بحق پاکستانیوں کی سفری تفصیلات سامنے آگئی ہیں۔

دفترخارجہ کا کہنا تھا کہ حادثےکی اطلاع پر طرابلس میں پاکستانی سفارتخانےکی ٹیم نےزاویہ شہرکادورہ کیا، جہاں مقامی حکام اور اسپتال انتظامیہ سےملاقات کے بعد معلومات اکٹھی کیں۔

ترجمان نے بتایا کہ حادثے کا شکار کشتی میں تریسٹھ پاکستانی سوار تھے، جن میں سے سولہ پاکستانی اپنی جان سے گئے، جبکہ سینتیس افراد زندہ بچ گئے اور 10 کے قریب پاکستانی لاپتہ ہیں۔

ترجمان نے مزید کہا کہ جاں بحق 16پاکستانیوں کی تفصیلات کے مطابق ثقلین حیدر ،سراج الدین،شعیب حسین ، نصرت حسین ، جاں بحق شعیب علی ،سید شہزاد حسین ، عابدحسین ، شاہد، آصف علی ،مصور،عابد حسین،مصائب حسین،اشفاق حسین کا تعلق کرم ایجنسی سے تھا۔

اس کے علاوہ محمد علی شاہ کا تعلق اورکزئی ایجنسی،انیس خان کا تعلق پشاور سے تھا۔

دفترخارجہ نے بتایا کہ تیرہ افراد کا تعلق ضلع کرم سے تھا تاہم زخمیوں میں سے ایک اسپتال میں، تینتیس مقامی پولیس کی تحویل میں اور تین طرابلس میں ہیں۔

ترجمان کا کہنا تھا کہ جاں بحق ایک پاکستانی تافتان بارڈر سے جبکہ دیگر چھے کراچی، کوئٹہ، پشاور، اسلام آباد اور فیصل آباد ایئر پورٹس سے الگ الگ تاریخوں میں روانہ ہوئے تھے، بعد میں کس طرح کشتی تک پہنچے اور کہاں سے اس سفر کا آغاز کیا، اس کے بارے میں معلومات جمع کی جا رہی ہیں۔

ایف آئی اے گجرانوالہ زون نے بڑی کارروائی کرتے ہوئے لیبیا کشتی حادثے میں ملوث ریڈ بک کے بدنام زمانہ اشتہاری ملزم کو گرفتار کرلیا۔

  ایف آئی اے کے مطابق اشتہاری ملزم بشیر احمد کے خلاف 10 سے زائد مقدمات درج تھے، ملزم کے خلاف کمپوزٹ سرکل گجرات نے سال 2022 میں مقدمات درج کئے۔

ایف آئی اے حکام کا کہنا ہے کہ ملزم کا نام ریڈ بک کے انتہائی مطلوب افراد کی فہرست میں شامل ہے، گرفتار ملزم نے متاثرین کو یورپ بھجوانے کے نام کروڑوں روپے ہتھیائے، ملزم نے 12 متاثرین سے فی کس 18 لاکھ روپے وصول کئے تھے۔

حکام کا کہنا ہے کہ ملزم نے گینگ کے دیگر ملزمان کی مدد سے متاثرین کو غیر قانونی طور پر نائیجریا اور لیبیا میں محصور رکھا، ملزم نے متاثرین کو کشتی کے ذریعے لیبیا سے اٹلی بھجوانے کی کوشش کی، کشتی حادثے میں متاثرہ شہریوں کی موت واقع ہوئی۔

ایف آئی اے کا کہنا ہے کہ ملزم کو جدید ٹیکنالوجی کو بروئے کار لاتے ہوئے حافظ آباد سے گرفتار کیا گیا ملزم کو گرفتار کر کے تفتیش کا آغاز کر دیا گیا دیگر ملزمان کی گرفتاری کے لئے چھاپے مارے جا رہے ہیں۔