Tag: لیسکو

اسلام آباد : کم یونٹس والے صارفین کو 200 سے زائد یونٹس کے بل بھیجے جانے کا انکشاف سامنے آیا، اووربلنگ سے کروڑوں کا اضافی بوجھ پڑا۔

تفصیلات کے مطابق وفاقی تحقیقاتی ادارے ( ایف آئی اے) نے لیسکو کیخلاف پروٹیکٹڈ صارفین کو اوور بلنگ کی شکایات پر ایکشن لیتے ہوئے انکوائری شروع کردی۔

ایف آئی اے نے بتایا کہ لیسکو نے مبینہ طور پر لاکھوں پروٹیکٹڈ صارفین کو اوور بلنگ کی اور کم یونٹس والےصارفین کو200 سے زائد یونٹس کے بل بھیجے گئے۔

ایف آئی اے کا کہنا تھا کہ اووربلنگ سے پروٹیکٹڈ کیٹگری تبدیل ہونے سے کروڑوں کا اضافی بوجھ پڑا۔

ایف آئی اےاینٹی کرپشن سرکل لاہور نےانکوائری کا آغاز کرتے ہوئے لیسکو کے ڈائریکٹرکسٹمرسروسز اور ڈی جی آئی ٹی کونوٹس جاری کردیئے۔

ترجمان کا کہنا ہے کہ لیسکو افسران سے بلنگ کا ڈیٹا اور دیگر تفصیلات طلب کی گئی ہیں۔

یاد رہے رواں سال مئی میں لیسکو کو مالی نقصان پہنچانے پر کارروائی کا آغاز کیا گیا تھا ، اوور بلنگ کی درستگی سے کمپنی پر اضافی اربوں روپے کا بوجھ پڑا۔

ذرائع کے مطابق اوور بلنگ کے وقت اوسط فی یونٹ قیمت 16 روپے تھی، جب کہ رواں ماہ 48 روپے سے قیمت زائد بنتی ہے، جس سے کمپنی کو اربوں روپے کا نقصان برداشت کرنا پڑے گا۔

لاہور: لیسکو اور ایف آئی اے نے میٹرمیں ڈیوائس لگا کر بجلی چوری کرنے پر ایک کروڑ 25 لاکھ روپے کا جرمانہ عائد کردیا۔

تفصیلات کے مطابق لیسکو اور ایف آئی اے نے بڑی کارروائی کرتے ہوئے بجلی چوری کرنے پر ایک کروڑ 25 لاکھ روپے کا جرمانہ کردیا۔

ترجمان لیسکو نے بتایا کہ بجلی چوری کرنے پر 2 ملزمان کیخلاف مقدمہ درج کرلیا گیا ہے ، ملزمان فیکٹری کے میٹر میں ڈیوائس لگا کر بجلی چوری کر رہے تھے۔

ترجمان کا کہنا تھا کہ لاہور لیسکو ٹیم کی جانب سے چیکنگ کرنے پر شدید مزاحمت کی تاہم مزاحمت پرایف آئی اے اور پولیس کی بھاری نفری کو طلب کیا گیا۔

لاہور: لیسکو میں بجلی کا شارٹ فال ریکارڈ سطح پر پہنچ گیا، شہر اور دیہاتوں میں گھنٹوں لوڈشیڈنگ ہونے لگی۔

تفصلات کے مطابق لاہور الیکٹرک سپلائی کمپنی سردیوں میں بھی بجلی کی طلب کو پورا کرنے سے قاصر ہے۔ شہرمیں 6 گھنٹے اور دیہات میں 12 گھنٹے سے زائد کی لوڈشیڈنگ کی جارہی ہے۔

لیسکوحکام کا کہنا ہے کہ سردی کے باعث روزانہ کی طلب 2600 میگاواٹ ہے۔ ہمیں کوٹے میں سے صرف 1600 میگاواٹ بجلی دی جارہی ہے،

حکام نے بتایا کہ ایک ہزار میگاواٹ کا شارٹ فال ہے۔ ایک سے ڈیڑھ ماہ یہی صورتحال رہنے کا امکان ہے۔

ذرائع کا کہنا ہے کہ لاہور ہائیڈل مکمل طور پر بند ہے۔ بیشتر گیس اور تھرمل پاور پلانٹس بھی بند ہیں۔ ملک بھرمیں بدترین لوڈشیڈنگ شروع ہوچکی ہے۔

اس سلسے میں ذرائع نے بتایا کہ تھرمل پاور پلانٹس وافر تعداد میں موجود ہیں لیکن تیل موجود نہیں۔ پاور ہاؤسز کو گیس فراہمی کے لیے بھی پیسے نہیں ہیں۔

لاہور : بجلی چوری والے علاقوں کی بجلی بند رکھنے کا فیصلہ کرلیا گیا، 30 فیصد سے زائد لاسز والے فیڈرز پر بجلی 12 گھنٹے بجلی بند رہے گی۔

تفصیلات کے مطابق لاہور الیکٹرک سپلائی کمپنی (لیسکو ) نے بجلی چوری والے علاقوں کی بجلی بند رکھنے کا فیصلہ کرلیا۔

ذرائع نے بتایا کہ 30 فیصد سے زائد لاسز والے فیڈرز پر بجلی 12 گھنٹے اور 30فیصد سے زائد لاسز والے فیڈرز پر شام چھ سےصبح 6 بجےتک بجلی بند رہے گی۔

لیسکو کے کل 97 فیڈرز کے لاسز 30 فیصد سے زائد ہے، لیسکو کوان فیڈرز سےسالانہ اربوں روپےکا نقصان ہوتا ہے۔

لیسکو کے ہائی لاسز، بجلی چوری میں قصور پہلے نمبر پر ہے، قصور میں 75 فیڈرز پر لاسز 30 فیصد سے زیادہ ہیں جبکہ لیسکو کے ناردرن سرکل میں 11، ایسٹرن سرکل میں 3 فیڈرز سے بجلی زیادہ چوری ہو رہی ہے، شیخوپورہ کے 3 اوکاڑہ کے ایک فیڈر کے لاسز 30 فیصد سے زائد ہیں۔

ساؤتھ سرکل کے 4 فیڈرز پر لاسز 30 فیصد سے زائد ہیں، لیسکو کے سینٹرل اور ننکانہ سرکل میں کسی فیڈرپر 30 فیصد سے زائد لاسز نہیں۔

چوری والے علاقوں کی بجلی بحال کرانے کیلئے قصور کی سیاسی شخصیات متحرک ہو گئیں جبکہ وزارت توانائی نے لیسکو حکام کو کسی بھی دباؤ میں نہ آنے کی ہدایات جاری کی ہیں۔

لاہور : لاہور الیکٹرک سپلائی کمپنی (لیسکو) نے نادہندہ سرکاری اداروں کی فہرست جاری کر دی، جس میں واسا ، ٹاؤن میونسپل اتھارٹی ، محکمہ ریلوے سمیت دیگر ادارے شامل ہیں۔

تفصیلات کے مطابق لاہور الیکٹرک سپلائی کمپنی (لیسکو) کی جانب سے نادہندہ سرکاری اداروں کی فہرست جاری کردی گئی۔

ترجمان نے بتایا کہ واسا لیسکو کی 7ارب 67 کروڑ 98 لاکھ 80 ہزار 169 روپے ، ٹاؤن میونسپل اتھارٹی لیسکو کی 3ارب 63 کروڑ 98 لاکھ 77 ہزار روپے اور پنجاب ایریگیشن اینڈ پاور ڈیپارٹمنٹ لیسکو کی 59 کروڑ 60 لاکھ 53 ہزار روپے کا نادہندہ ہے۔

ترجمان لیسکو کا کہنا تھا کہ محکمہ ریلوے 53 کروڑ 29 لاکھ 82 ہزار 792 روپے ، لاہور رنگ روڈ اتھارٹی 50 کروڑ 2 لاکھ 29 ہزارروپے اور لاہور کی ضلعی حکومت 49 کروڑ 59 لاکھ 62 ہزار 968 روپے کی نادہندہ نکلی۔

ترجمان کے مطابق محکمہ صحت پر 42 کروڑ 44 لاکھ 46 ہزار 903 روپے ، قصور کی ضلعی حکومت پر 34 کروڑ 99 لاکھ 29 ہزار 974 روپے ، ایل ڈی اے پر 32 کروڑ 42 لاکھ 43ہزار 293 روپے واجبات ہیں۔

سروسز اسپتال 16 کروڑ 87 لاکھ 39 ہزار 636 روپے ، محکمہ پولیس 43 کروڑ94 لاکھ 87 ہزار631 روپے ، یونیورسٹی آف پنجاب 16 کروڑ 74 لاکھ 74 ہزار 5 روپے کی نادہندہ ہے۔

چیف ایگزیکٹو لیسکو انجینئر شاہد حیدر کا کہنا ہے کہ نادہندہ سرکاری اداروں سے ریکوری کا عمل مکمل کیا جائے۔

لاہور : لاہور الیکٹرک سپلائی کمپنی ( لیسکو) نے 2 ماہ بقایاجات والے کنکشن فوری کاٹنے کا حکم دے دیا اور کہا صارفین کو چاہیے کہ فوری بل جمع کروائیں۔

تفصیلات کے مطابق لاہور الیکٹرک سپلائی کمپنی ( لیسکو) نے بجلی کے بلوں پر دیا گیا ریلیف ختم کر دیا ، ذرائع نے بتایا کہ 2 ماہ بقایاجات والے کنکشن فوری کاٹنے کا حکم دے دیا گیا ہے۔

ذرائع کا کہنا تھا کہ ٹیموں کو فہرستیں سپرد کر دی گئیں آج بھی کارروائی ہو گی، چند روز سے بقایاجات بلوں کو کاٹنے کا عمل رک گیا تھا، اب صرف رواں ماہ والا بل کٹنے سے بچے گا۔

کابینہ نے بلوں میں ریلیف سے فی الحال انکار کر دیا ہے، صارفین کو چاہیے کہ فوری بل جمع کروائیں، صارفین کو فی الحال اقساط کی سہولت بھی نہیں ملے گی۔