نئی دہلی: بھارتی ریاست چھتیس گڑھ میں ماؤ نواز باغیوں نے بی جے پی کے قافلے پر حملہ کرکے رکن اسمبلی سمیت 6 افراد کو قتل کردیا۔
غیرملکی خبررساں ادارے کے مطابق بھارتی ریاست چھتیس گڑھ میں رکن اسمبلی بھیما منداوی کی گاڑی کو دھماکا خیز مواد سے اڑا دیا گیا جس کے نتیجے میں رکن اسمبلی اور 5 سیکیورٹی اہلکار ہلاک ہوگئے۔
رپورٹ کے مطابق رکن اسمبلی بھیما منداوی الیکشن مہم کے لیے ایک جلسے میں شرکت کرنے جارہے تھے۔
پولیس کا کہنا ہے کہ ابتدائی طور پر دھماکا ریموٹ کنٹرول ڈیوائس کا لگتا ہے جبکہ حملے کی تحقیقات جاری ہیں، دھماکے کے نتیجے میں گاڑی مکمل طور پر تباہ ہوگئی۔
مزید پڑھیں: بھارت: ماؤ نواز باغیوں کا حملہ، 13فوجی ہلاک
واضح رہے کہ یہ حملہ ایسے وقت میں کیا گیا ہے جب عام انتخابات کے انعقاد میں صرف دو دن باقی رہ گئے ہیں، بھارتی سیاست دان الیکشن سے پہلے اس طرح کے حملوں کا خدشہ ظاہر کرچکے ہیں۔
چھتیس گڑھ میں عام انتخابات کے تین مراحل ہیں، انتخابات 11، 18 اور 23 اپریل کو ہوں گے۔
یاد رہے کہ بھارتی ریاست چھتیس گڑھ میں تیس سالوں سے مسلح جدوجہد جاری ہے اور ماؤ نواز باغیوں کے سیکیورٹی فورسز پر حملے عام ہیں۔
