لاہور: صوبہ پنجاب میں مائیکرو اسمارٹ لاک ڈاؤن کے تحت کرونا وائرس سے متاثرہ مریضوں کے گھروں کے باہر سرخ رنگ کے اسٹیکر لگائے جا رہے ہیں جن پر درج ہے، خبردار، یہ گھر کرونا مریضوں کے لیے قرنطینہ ہے۔
تفصیلات کے مطابق صوبہ پنجاب میں مائیکرو اسمارٹ لاک ڈاؤن کے حوالے سے محکمہ صحت نے نئی حکمت عملی اپنائی ہے، ذرائع کے مطابق کرونا وائرس سے متاثرہ مریضوں کے گھر اور گلیوں کو سیل نہیں کیا جائے گا۔
ذرائع کا کہنا ہے کہ متاثرہ گھروں کے باہر پولیس اہلکار بھی تعینات نہیں کیے جائیں گے بلکہ متاثرہ گھروں کے باہر سرخ رنگ کے اسٹیکر چسپاں کیے جا رہے ہیں۔
گھروں کے باہر لگائے جانے والے اسٹیکر پر درج ہے: خبردار، یہ گھر کرونا مریضوں کے لیے قرنطینہ ہے۔
مذکورہ اسٹیکر جوہر ٹاؤن، نشاط کالونی، انگوری باغ اور بادامی باغ میں گھروں کے باہر لگائے جارہے ہیں، محکمہ صحت کے ملازمین متاثرہ گھروں کے باہر اسٹیکر لگا رہے ہیں۔
خیال رہے کہ پنجاب کے 6 شہروں کے مختلف علاقوں میں آج سے مائیکرو اسمارٹ لاک ڈاؤن نافذ کردیا گیا ہے، سیکرٹری ہیلتھ کیئر کا کہنا ہے کہ مائیکرو اسمارٹ لاک ڈاؤن کا مقصد آمد و رفت کو محدود کرنا ہے۔
جن علاقوں میں مائیکرو اسمارٹ لاک ڈاؤن نافذ کیا گیا ہے ان میں لاہور، گوجرانوالہ، راولپنڈی، گجرات، اٹک اور سیالکوٹ شمال ہیں۔ مائیکرو اسمارٹ لاک ڈاؤن کے تحت کرونا وائرس کے کیسز سامنے آنے والی گلیوں کو سیل کیا جارہا ہے۔
