جنیوا: اقوام متحدہ کا کہنا ہے کہ ہماری فضا میں موجود کاربن ڈائی آکسائیڈ پہلے کے مقابلے میں زیادہ خطرناک اور مضر ہوچکی ہے جس سے زمین اور اس پر رہنے والے افراد کی صحت کو مزید خطرات لاحق ہوگئے ہیں۔

اقوام متحدہ کے ادارہ برائے موسمیات کا کہنا ہے کہ ہماری فیکٹریوں سے خارج ہونے والی زہریلی گرین ہاؤس گیسوں کی اثر انگیزی کچھ مہینوں اور کچھ مقامات پر بڑھ گئی ہے۔

مزید پڑھیں: کاربن اخراج کو ٹھوس بنانے کا طریقہ

ماہرین کے مطابق کاربن کی اثر انگیزی میں ریکارڈ اضافہ ہوچکا ہے اور ایسا پچھلی کئی نسلوں میں نہیں ہوا۔ یعنی کاربن گیس اب پہلے سے زیادہ خطرناک اور مضر صحت بن چکی ہے۔

ماہرین نے بتایا کہ کاربن کی اثر انگیزی میں اضافے کی ایک وجہ رواں برس کا ایل نینو بھی ہے۔ ایل نینو بحر الکاہل کے درجہ حرارت میں اضافہ کو کہتے ہیں جس کے باعث پوری دنیا کے موسم پر منفی اثر پڑتا ہے۔

مزید پڑھیں: کاربن سے سڑکوں اور پلوں کی تعمیر ممکن

یہ عمل ہر 4 سے 5 سال بعد رونما ہوتا ہے جو گرم ممالک میں قحط اور خشک سالیوں کا سبب بنتا ہے جبکہ یہ کاربن کو جذب کرنے والے قدرتی ’سنک‘ جیسے جنگلات، سمندر اور دیگر نباتات کی صلاحیت پر بھی منفی اثر ڈالتا ہے جس کے باعث وہ پہلے کی طرح کاربن کو جذب نہیں کرسکتے۔

ماہرین نے واضح کیا کہ یہ بات یاد رکھنے کی ہے کہ ایل نینو ختم ہوچکا ہے، لیکن کلائمٹ چینج تاحال جاری ہے۔

واضح رہے کہ فیکٹریوں سے خارج ہونے والا زہریلا دھواں اور گیسیں جن میں کاربن کی بڑی مقدار موجود ہوتی ہے، ایک طرف تو ہماری فضا کو زہریلا اور آلودہ بنا رہی ہیں، دوسری جانب یہ دنیا بھر کے موسم کو بھی گرم کر رہی ہیں جسے گلوبل وارمنگ (عالمی درجہ حرارت میں اضافہ) کا عمل کہا جاتا ہے۔

مزید پڑھیں: گلوبل وارمنگ سے عالمی معیشتوں کو 2 کھرب پاؤنڈز نقصان کا خدشہ

گزشتہ برس پیرس میں منعقد کی جانے والی کلائمٹ چینج کی عالمی کانفرنس میں پاکستان سمیت دنیا کے 195 ممالک نے اس بات کا عزم کیا کہ وہ اپنی صنعتی ترقی کو محدود کریں گے اور اس بات کو یقینی بنائیں گے کہ ان کی صنعتی ترقی عالمی درجہ حرارت میں 2 ڈگری سینٹی گریڈ سے زائد اضافہ نہ کرے۔

دنیا بھر کے ماہرین سر جوڑ کر بیٹھے ہیں کہ دنیا کو خطرناک موسمیاتی تغیرات یعنی کلائمٹ چینج کے اثرات سے کیسے بچایا جائے۔ اس کے لیے نہ صرف مختلف عملی اقدامات اٹھائے جارہے ہیں بلکہ دنیا کو اس جانب متوجہ کرنے کی کوشش بھی کی جارہی ہے۔

اسی طرح کی ایک کوشش امریکا میں کوہ پیماؤں کی ایک ٹیم نے بھی کی جو اپنی جان جوکھم میں ڈال کر دنیا کے طویل ترین درختوں پر چڑھے۔

مزید پڑھیں: کلائمٹ چینج کی طرف توجہ دلانے کے لیے پیانو کی پرفارمنس

ان کا مقصد ان نادر و نایاب درختوں کا کلون تیار کرنا ہے۔

دنیا کے یہ طویل ترین درخت امریکی ریاست کیلیفورنیا میں واقع ہیں جنہیں سیکوئیا ریڈ ووڈز کہا جاتا ہے۔ ان کی عمومی قامت 300 فٹ یا 91 میٹرز ہے جس کا مطلب ہے کہ یہ اپنے اندر بے تحاشہ کاربن جذب کرنے کی صلاحیت رکھتے ہیں۔

ان درختوں کی عمر بھی کئی ہزار سال ہے اور اس دوران یہ مختلف آتش زدگیوں، خشک سالیوں اور بیماریوں کو جھیل چکے ہیں اس کے باوجود یہ قائم رہے۔

امریکا میں درختوں کے تحفط کے لیے کام کرنے والے ادارے ’آرک اینجل اینشینٹ ٹری آرکائیو‘ کے بانی ڈیوڈ کلارک کا کہنا ہے کہ ہم نے یہ قدم بہت تاخیر سے اٹھایا ہے اور ہمارے پاس زیادہ وقت نہیں ہے۔ ’ان قدیم اور طویل ترین درختوں کی جینیات اکٹھی کرنے کا مقصد یہ ہے کہ اس کو محفوظ کیا جائے اور دوبارہ کام میں لایا جائے‘۔

ادارے کے ایک اور رکن جیکب ملر کا کہنا ہے کہ ان درختوں کی جینیات میں کوئی ایسی خاصیت موجود ہے جو سینکڑوں سال سے موسمیاتی تغیر اور گلوبل وارمنگ یعنی عالمی حدت میں اضافے کے اثرات کو برداشت کر سکتی ہے اور ان کے خلاف مزاحمت کر سکتی ہے۔

اس پروجیکٹ کے لیے کوہ پیماؤں نے ان درختوں پر چڑھ کر ان کی ٹہنیاں اور پتے حاصل کیے۔ اس کے بعد ان کو مشی گن کی ایک لیبارٹری میں لے جایا گیا اور وہاں ان کو دوبارہ زمین میں بویا گیا۔ یہ پودے اب کچھ ہی عرصہ میں جڑ پکڑ لیں گے اور اس کے بعد ان کی افزائش شروع ہوجائے گی۔

ادارے کا کہنا ہے کہ انہوں نے اس درخت کے 3 لاکھ کلون بوئے ہیں اور وہ اس سلسلے کو مزید وسعت دینے کا ارادہ رکھتے ہیں۔

واضح رہے کہ ماہرین کا کہنا ہے کہ کلائمٹ چینج کے خطرات سے نمٹنے کا آسان حل ہے کہ زیادہ سے زیادہ درخت اگائے جائیں۔ یہ ان علاقوں کے لیے اور بھی ضروری ہے جو کلائمٹ چینج کے باعث شدید موسموں جیسے ہیٹ ویو کا شکار ہیں۔

مزید پڑھیں: ہیٹ ویو سے مطابقت کیسے کی جائے؟

پاکستان کی معاشی رگ شہر کراچی پچھلے 2 سال سے ہیٹ ویو برداشت کررہا ہے اور اس کے باعث درجنوں افراد اپنی جانوں سے ہاتھ دھو چکے ہیں، تاہم ابھی تک شجر کاری کے کسی سنجیدہ اور طویل المدت منصوبے پر کام نہیں کیا گیا جو کراچی کے شہریوں کو شدید گرمی سے بچا سکے۔

آپ کے گھر سے بے شمار ایسی غذائی اجزا نکلتی ہوں گی جو کوڑے کے ڈرم میں پھینکی جاتی ہوں گی۔ یہ اشیا خراب، ضائع شدہ اور پلیٹوں میں بچائی ہوئی ہوتی ہیں۔

دنیا بھر میں خوراک کو ضائع کرنا ایک بڑا مسئلہ ہے۔ ایک اندازے کے مطابق دنیا بھر میں سالانہ جتنی خوراک اگائی جاتی ہے، ہم اس کا ایک تہائی حصہ ضائع کردیتے ہیں۔

مزید پڑھیں: ضائع شدہ غذائی اشیا فروخت کرنے والی سپر مارکیٹ

دوسری جانب ایک رپورٹ کے مطابق دنیا کے کل 70 کروڑ 95 لاکھ افراد بھوک کا شکار ہیں۔ صرف پاکستان میں کل آبادی کا 22 فیصد حصہ غذا کی کمی کا شکار ہے اور 8.1 فیصد بچے غذائی قلت کے باعث 5 سال سے کم عمر میں ہی وفات پا جاتے ہیں۔

اس صورتحال کو دیکھتے ہوئے دنیا بھر میں ضائع شدہ غذا کو دوبارہ قابل استعمال بنانے کے طریقوں پر کام کیا جارہا ہے اور اس کی ایک بہترین مثال سنگاپور کے ننھے طالب علموں نے دی۔

سنگاپور کے یونائیٹڈ ورلڈ کالج آف ساؤتھ ایشیا کے پانچویں جماعت کے طالب علموں نے ڈرموں میں پھینکی جانے والی خوراک کو قابل استعمال بنانے کا بیڑا اٹھایا۔ اس کے لیے انہوں نے اس پھینکی جانے والی غذائی اشیا کو کھاد میں تبدیل کرنے کا منصوبہ شروع کیا۔

مزید پڑھیں: اولمپک ویلج کا بچا ہوا کھانا بے گھر افراد میں تقسیم

یہ بچے ہر روز اپنے اسکول کی کینٹین سے 50 لیٹر کے قریب غذائی اشیا جمع کرتے ہیں۔ ان میں پھلوں، سبزیوں کے چھلکے، ادھ پکی اشیا، بچائی جانے والی چیزیں اور خراب ہوجانے والی اشیا شامل ہیں۔ ان اشیا کو سوکھے پتوں اور پانی کے ساتھ ملایا گیا۔

اس کے بعد اس کو اسی مقصد کے لیے مخصوص ڈرموں میں ڈال دیا گیا جس کے بعد 5 ہفتوں کے اندر بہترین کھاد تیار ہوگئی۔ طالب علموں نے اس کھاد کو اسکول کے گارڈن میں استعمال کرنا شروع کردیا۔ بچی ہوئی کھاد، کسانوں اور زراعت کا کام کرنے والے افراد کو دے دی گئی۔

منصوبے پر کام کرنے والے بچوں کا کہنا ہے کہ انہیں اس بات کا بالکل اندازہ نہیں تھا کہ وہ بھی خوراک کو ضائع کرنے کے نقصان دہ عمل میں شامل ہیں۔ ’جب ہم اس میں شامل ہوئے تو ہمیں چیزوں کی اہمیت کا احساس ہوا اور اس کے بعد ہم نے بھی کھانے کو ضائع کرنا چھوڑ دیا‘۔

مزید پڑھیں: امریکی عوام کا ’بدصورت‘ پھل کھانے سے گریز، لاکھوں ٹن پھل ضائع

یہ بچے غذائی اشیا کی اس ناقد ری پر اداس بھی ہوتے ہیں اور وہ چاہتے ہیں کہ لوگ کھانے کو ضائع نہ کیا کریں۔

اس منصوبے کی کامیابی کو دیکھتے ہوئے اب پورے سنگاپور کی یونیورسٹیز، کالجز اور دیگر اسکول ایسے ہی منصوبے شروع کرنے پر غور کر رہے ہیں۔