جماعت اسلامی نے اسرائیل کی مظلوم فلسطینیوں پر بربریت اور قتل عام کیخلاف 11 اپریل کو پورے پاکستان میں مارچ کا اعلان کیا ہے۔
امیر جماعت اسلامی پاکستان حافظ نعیم الرحمان نے منصورہ لاہور میں پریس کانفرنس کرتے ہوئے اسرائیل کے خلاف ملک گیر احتجاج کا اعلان کیا۔ اس کے ساتھ ہی اس معاملے پر اقوام متحدہ کے سیکریٹری جنرل کے نام پٹیشن دائر کرنے کا بھی اعلان کیا۔
حافظ نعیم الرحمان نے کہا کہ عید پر بھی اسرائیل نے فلسطینی بچوں پر بمباری کی۔ غزہ کو پہلے ہی 90، 80 فیصد تباہ کر دیا گیا تھا۔ کھانا، پانی بند اب کہا جا رہا ہے کہ غزہ خالی کرو۔ اس صورتحال میں مغرب کے چہرے سے نقاب اتر چکا۔
حماس کے ہاتھوں 4 بچے بھی مر جاتے تو دنیا میں کہرام ہوتا، لیکن غزہ کی صورتحال پر کوئی بولنے کو تیار نہیں۔ چند ممالک کو چھوڑ کر پوری دنیا بےحسی کا مظاہرہ کر رہی ہے۔ افسوس مسلم ممالک بھی اس ظلم اور بربریت پر خاموش ہیں۔
دنیا میں ایک ارب 90 کروڑ مسلمان بستے ہیں۔اب وہ وقت آگیا ہے کہ پوری امت کو بیدار کرنے کی ضرورت ہے۔ پاکستان کی پوری قوم کو متحد کرنے والی چیز صرف اسلام ہے۔ پوری دنیا کے باضمیر لوگ غزہ کیلیے آواز اٹھا رہے ہیں۔ اس ظلم کے خلاف کل امریکا اور یورپ میں بھی احتجاج ہوا۔
امیر جماعت اسلامی نے غزہ معاملے پر اپنی تمام معمول کی سرگرمیاں معطل کرنے اور ملک گیر عوامی مہم شروع کرنے کا اعلان کرتے ہوئے 11 اپریل کو پاکستان بھر میں مارچ کرنے اور اقوام متحدہ کے سیکریٹری جنرل کے نام پٹیشن دائر کرنے کے اعلانات بھی کیے۔
حافظ نعیم نے کہا کہ 11 اپریل کو پورے پاکستان میں مارچ ہوگا۔ 13 اپریل کو کراچی میں شارع فیصل، 20 اپریل کو اسلام آباد میں امریکی سفارتخانے کی طرف مارچ کرینگے۔
انہوں نے 20 اپریل کے مارچ کے لیے پنجاب سمیت پورے خیبر پختونخوا کے عوام کو دعوت دیتے ہوئے کہا کہ اس دن امت کا سیلاب پوری دنیا کو پیغام دے گا۔
امیر جماعت اسلامی نے کہا کہ اسرائیل جانیوالے وفد سے متعلق وزارت خارجہ کی وضاحت قابل قبول نہیں۔ جو لوگ اسرائیل گئے، ان کو گرفتار کرنا چاہیے۔
