نئی دہلی: معروف روسی ٹینس اسٹار ماریہ شراپوا کیخلاف بھارتی عدالت نے غبن اور فراڈ کے الزامات پر مقدمہ درج کرنے کا حکم دے دیا۔
تفصیلات کے مطابق پانچ مرتبہ گرینڈ سلام جیتنے والی روس کی معروف ٹینس کی کھلاڑی ماریہ شراپوا کیخلاف بھارت کی عدالت نے رئیل اسٹیٹ بزنس میں سرمایہ کاری کرنے پر مقدمہ درج کرنے کا حکم دے دیا ہے۔
حکم پر عمل درآمد کرتے ہوئے نئی دہلی پولیس نے ان کیخلاف مقدمہ درج کرلیا ہے تاہم ابھی تک گرفتاری عمل میں نہیں آئی ہے۔
ماریہ شراپوا پر الزام ہے کہ انہوں نے رہائشی پراجیکٹ بلٹ بائے شراپوا کی تشہیری مہم میں حصہ لیا تھا جبکہ چار سال گزرنے کے باوجود اس پراجیکٹ پر کبھی کام ہی شروع نہیں ہوا، عدالت نے مقدمے کی سماعت 23 نومبر تک ملتوی کردی۔
مزید پڑھیں: روسی ٹینس اسٹارماریہ شراپوا پر 2 سال کی پابندی عائد
یاد رہے کہ ماریہ شراپوا اس سے قبل بھی منفی خبروں کی زد میں رہی ہیں، انٹرنیشنل ٹینس فیڈریشن نے سابق نمبر ون روسی ٹینس اسٹار ماریہ شراپوا کو ممنوعہ ادویات استعمال کرنے پر دو سال کی پابندی عائد کی تھی۔
ماریہ شراپوا کا ڈوپ ٹیسٹ مثبت آیاتھا، شراپوا گزشتہ گیارہ سال کے دوران سب سے زیادہ کمائی کرنے والی خاتون ایتھلیٹ ہیں۔
