Tag: ماسکو

ماسکو: روسی بحریہ کی ایٹمی آبدوز میں اچانک آگ بھڑک اٹھی جس کے نتیجے میں عملے کے 14 افراد ہلاک ہوگئے۔

غیرملکی خبررساں ادارے کے مطابق روسی وزارت دفاع کی جانب سے جاری بیان میں کہا گیا ہے کہ آبدوز کو اس وقت آگ لگی جب وہ روسی سمندری حدود میں کچھ تجربات کررہی تھی، عملے کی جانب سے آگ پر قابو پالیا گیا۔

رپورٹ کے مطابق ہلاک ہونے والے افراد زہریلے دھوئیں کے باعث اپنی جان سے ہاتھ دھو بیٹھے۔

غیرملکی میڈیا کے مطابق اگرچہ یہ ایٹمی آبدوز تھی لیکن عموماً یہ جاسوسی کے مشن پر کام کرتی تھی، اس پر زیادہ سے زیادہ 25 افراد کی گنجائش ہوتی ہے اور یہ سمندر کی گہرائی میں 3.7 میل تک جاسکتی ہے۔

مزید پڑھیں: روس میں مسافر طیارہ ایمرجنسی لینڈنگ کے دوران عمارت سے ٹکرا گیا، 2 افراد ہلاک

حادثے کا شکار ہونے والی آبدوز اس وقت روس کے شمالی فلیٹ کے بیس سیورومارسک میں موجود ہے، آگ لگنے کی وجوہات معلوم کرنے کے لیے تحقیقات کا آغاز کردیا گیا ہے۔

روسی آبدوز میں آگ بھڑکنے کے حوالے سے متضاد خبریں موصول ہورہی ہیں، 4 سے 5 اہلکاروں کو زندہ نکالنے کی اطلاعات بھی ہیں تاہم اس کی تصدیق نہیں ہوسکی ہے۔

یاد رہے کہ اگست 2000 میں روس کی ایٹمی آبدوز کرسک کو بیرنٹس کے سمندر میں حادثہ پیش آیا تھا جس کے باعث عملے کے تمام 118 افراد ہلاک ہوگئے تھے۔

ماسکو: روس میں بلند عمارت سے سیلفی لینے کے شوق میں 2 طالبات ہلاک ہوگئیں۔

غیرملکی خبررساں ادارے کے مطابق روس میں 2 طالبات بلند عمارت سے سیلفی لینے کی کوشش میں گر کر ہلاک ہوگئیں، 14 سالہ اینی لیونا فیکٹری کی عمارت سے سیلفی لے رہی تھی جبکہ 13 سالہ پولینا کیوالیوا اپارٹمنٹ کی عمارت سے سیلفی لینے کی کوشش کررہی تھی۔

دونوں لڑکیاں آپس میں دوست تھیں جبکہ پولیس نے فوری طور پر جائے وقوعہ پر پہنچ کر دونوں لڑکیوں کو اسپتال منتقل کیا جہاں ڈاکٹرز نے ان کی موت کی تصدیق کردی۔

پولیس نے دونوں معاملات کی تحقیقات اور لڑکیوں کی موت کے بارے میں تمام ممکنہ پہلوؤں کو مدنظر رکھتے ہوئے تحقیقات کا آغاز کردیا ہے۔

مزید پڑھیں: سیلفی کے جنون سے ہلاکتوں میں بھارت سب سے آگے نکل گیا

واضح رہے کہ رواں ماہ کے اوائل میں روس میں ایک نوجوان لڑکی میلینا نے اپنی پندرہویں سالگرہ کو یادگار بنانے کے لیے بلند عمارت سے سیلفی لینا چاہی جہاں اس کا پیر سلپ ہوا اور وہ گر گئی۔

رپورٹ کے مطابق میلینا کو اسپتال میں طبی امداد دی جارہی ہے، ڈاکٹرز کے مطابق وہ کوما میں جاچکی ہے۔

سیلفی لینے کے دوران میلینا نے دو دوست بھی موجود تھے جو اسے بچانے کی کوشش کررہے تھے لیکن اسے بچانے میں کامیاب نہیں ہوسکے۔

یاد رہے کہ اس طرح کے واقعات پہلے بھی رونما ہوچکے ہیں، خطرناک انداز میں‌ سیلفی لینے کا رجحان تیزی سے بڑھ رہا ہے جس کے نتیجے میں نوجوان لڑکے لڑکیاں اپنی قیمتی جانیں گنوا بیٹھتے ہیں۔

ماسکو: روس میں ٹیک آف سے قبل مسافر طیارے کے انجن میں آگ لگ گئی جس نے مسافروں کو خوف زدہ کردیا۔

غیرملکی خبررساں ادارے کے مطابق روس کے دارالحکومت ماسکو جانے والی فلائٹ کے ٹیک آف مرحلہ مکمل ہونے کے قریب تھا کہ اچانک جہاز کے انجن میں آگ بھڑک اٹھی جس نے مسافروں کو خوف زدہ کردیا۔

ایک مسافر نے یہ خوفناک منظر کیمرے کی آنکھ میں قید کرلیا، پائلٹ نے بروقت جہاز کو ٹیک آف کرنے سے روکا جس کے بعد مسافروں کو بحفاظت جہاز سے باہر نکال لیا گیا۔

ایئرپورٹ انتظامیہ کے مطابق تمام مسافروں کو دوسرے طیارے کے لیے ماسکو کے لیے روانہ کردیا گیا تھا۔

مزید پڑھیں: روسی فضائیہ کا طیارہ لینڈنگ کے دوران تباہ، 3 افراد ہلاک

واضح رہے کہ رواں سال جنوری میں روسی ایئرفورس کا بمبار طیارہ خراب موسم کے دوران ایمرجنسی لینڈنگ کرتے ہوئے تباہ ہوگیا تھا جس کے نتیجے میں عملے کے 3 ارکان ہلاک ہوگئے تھے۔

روسی وزارت دفاع کا کہنا تھا کہ بمبار سپر سونک طیارہ آرٹیک کے علاقے میں معمول کے گشت کے بعد واپس لوٹ رہا تھا جبکہ شدید سرد موسم کے باعث حد نگاہ انتہائی کم تھی جس کی وجہ سے حادثہ پیش آیا۔

یاد رہے کہ گزشتہ سال ستمبر میں شام میں تعینات روسی فوجیوں کو ایئربیس لانے والا طیارہ بحیرہ روم میں پرواز کے دوران میزائل حملے میں تباہ ہوگیا تھا جس کے نتیجے میں 15 روسی فوجی ہلاک ہوئے تھے۔

ماسکو: روس میں موڈ خراب ہونے پر 21 سالہ ماں نے اپنی دوسالہ بیٹی کو اپارٹمنٹ کے 9ویں فلور سے نیچے پھینک دیا۔

غیرملکی خبررساں ادارے کے مطابق روس میں 21 سالہ ماں نے اپنا موڈ خراب ہونے پر دو سالہ بیٹی کو 9ویں منزل پر واقع فلیٹ کی کھڑکی سے نیچے پھینک دیا اور خود بھی چھلانگ لگالی، خوش قسمتی سے سڑک پر برفباری کی وجہ سے دونوں کی زندگیاں بچ گئیں۔

اکیس سالہ روسی خاتون کا نام ظاہر نہیں کیا گیا لیکن مذکورہ خاتون کو پولیس نے گرفتار کرلیا ہے، خاتون کو عدالت میں پیش کیا جائے گا اگر ان پر جرم ثابت ہوجاتا ہے تو 5 سالہ قید کی سزا بھگتنی ہوگی۔

خاتون کے اہل خانہ کا کہنا ہے کہ ‘وہ صبح سے ہی پریشان تھی اور اس کا موڈ بہت خراب تھا۔‘

مزید پڑھیں: پارٹی میں جانے کی جلدی، ماں نے بچی کو موت کے منہ میں دھکیل دیا

اکیس سالہ خاتون کی نند کا کہنا ہے کہ وہ بہت پریشان تھی، وہ صبح سے ہی مجھ پر بلاوجہ چیخ رہی تھی، میں نے اس سے کہا کہ بچی کو لے کر قریبی کلینک روٹین چیک اپ کے لیے چلتے ہیں جس پر وہ مجھ سے لڑنے لگی۔

انہوں نے کہا کہ میں کچھ دیر کے لیے کچن میں چلی گئی اور 2 سالہ بھتیجی اور اپنی بھابی کو کمرے میں اکیلے چھوڑ دیا تاکہ ان کا غصہ ٹھنڈا ہوسکے۔

خاتون کا کہنا تھا کہ جب میں واپس آئی تو دونوں کمرے میں موجود نہیں تھے، میں نے کھڑکی کھول کر دیکھی تو دونوں نیچے سڑک پر پڑے تھے میں نے فوراً ایمبولینس کو کال کی۔

عینی شاہد بختیار کے مطابق بچی کا سر زمین پر جاکر لگا اور برفباری کی وجہ سے جسم اندر دھنس گیا صرف ٹانگیں باہر نظر آرہی تھیں۔

انہوں نے کہا کہ میں نے بچی کو برفباری سے نکالا اور دوسری طرف بچی کی ماں درد کی وجہ سے چیخ رہی تھی، بچی آئی سی یو میں زیر علاج ہے جبکہ بچی کی ماں بھی اسپتال میں زیر علاج ہے۔