کراچی: ایس ایس پی ایسٹ ڈاکٹر فرخ رضا نے شاہراہ فیصل تھانے کو ماڈل تھانہ بنانے کا فیصلہ کر لیا ہے، جس کے لیے ایک ماہر آرکیٹیکٹ کو تھانے بلوایا گیا۔
تفصیلات کے مطابق ڈسٹرکٹ ایسٹ پولیس نے شاہراہ فیصل پر قائم تھانے کو ماڈل تھانہ بنانے کے لیے کام شروع کر دیا ہے، پولیس حکام کا کہنا ہے کہ ایک ماہ کے عرصے میں تھانے کی شکل تبدیل کر دی جائے گی۔
ترجمان ایسٹ ڈسٹرکٹ کے مطابق تھانے کی ابتر صورت حال کو بدلنے کے لیے ایک خاتون آرکیٹیکٹ کو تھانے بلوایا گیا، آرکیٹکیٹ نے ایس ایس پی اور ایس پی کے ہمراہ عمارت کا جائزہ لیا، اس موقع پر ایس ایس پی ڈاکٹر فرخ رضا نے آرکیٹیکٹ کو مکمل بریفنگ دی، اور تھانے کو جاذب نظر اور ماڈل بنانے کے لیے مشاورت کی گئی۔
ترجمان کا کہنا ہے کہ آرکیٹیکٹ نے گراؤنڈ سے پہلی منزل تک تمام کمرے دیکھے، جدل ہی اب تھانے کی تزئین و آرائش کا کام شروع کر دیا جائے گا، ابتدائی کام شروع کے پانچ دن میں مکمل کیا جائے گا، جب کہ کوشش ہوگی کہ ایک ماہ میں تھانے کی شکل تبدیل ہو جائے، اور سائلین کو تھانے میں اچھا ماحول فراہم ہو۔
ترجمان کے مطابق شاہراہ فیصل تھانے کی عمارت پرانی اور بڑی ہے، تھانے کی دیوار کے ساتھ بھی کیس پراپرٹی موجود ہے، جب کہ اندر کی جانب بھی کاریں اور موٹر سائیکلیں موجود ہیں۔ تھانے کی اہمیت کا اس سے بھی اندازہ لگایا جا سکتا ہے کہ روزانہ لاکھوں شہری شاہراہ فیصل پر سفر کرتے ہیں۔
