Tag: ماں

بینکاک: تھائی لینڈ میں ایک ماں نے بروقت ایکشن لیتے ہوئے اپنے ایک سالہ بچے کو بڑی جسامت والے خطرناک کنکھجورے سے بچا لیا۔

تفصیلات کے مطابق تھائی لینڈ کے شہر بینکاک کے ایک علاقے میں ایک گھر میں ماں فرش پر لیٹ کر فون پر بات کر رہی تھی، پاس ہی ایک سالہ بیٹا کھیل رہا تھا، اچانک ماں نے ایک ایسی خوف ناک چیز دیکھی جس نے اسے اچھلنے پر مجبور کر دیا۔

رپورٹ کے مطابق بدھ کے روز بینکاک میں ڈنسو روڈ پر ایک گھر میں نانگ نامی بچہ اپنی کھلونا بلی کے ساتھ کھیل رہا تھا، جب زہریلی مخلوق اس کی طرف تیزی سے بڑھی، یہ منظر سی سی ٹی کیمرے میں بھی ریکارڈ ہو گیا، فوٹیج میں دیکھا جا سکتا ہے کہ بچہ بڑے کنکھجورے سے بال بال بچا۔

سوشل میڈیا پر پوسٹ ہونے والی ویڈیو میں دیکھا جا سکتا ہے کہ ایک فٹ لمبا کنکھجورا فرش پر رینگتا ہوا تیر کی طرح بچے کی طرف بڑھا تاکہ اس کے گوشت میں اپنے ڈنک پیوست کر دے۔ واضح رہے کہ کنکھجورے کا ڈنک چھوٹے بچوں کے لیے خطرناک ثابت ہو سکتا ہے، اس کے زہر سے بچے کے دل کی دھڑکن تیز ہو کر سانس میں رکاوٹ پیدا ہو سکتی ہے۔

اس واقعے میں ماں خطرناک کنکھجورے سے غافل تھی، اور فرش پر لیٹے فون پر بات کر رہی تھی، اس سے قبل کہ کنکھجورا بچے تک پہنچتا، ماں کو خطرے کا احساس ہو گیا، اور اس نے تیزی سے اٹھ کر بچے کو فوراً اٹھا لیا، تب بچے کی دادی نے بھی تیزی دکھائی اور ایک کپ سے زہریلی مخلوق کو ڈھانپ کر پکڑ لیا۔

بچے کے والد سَنتی کا کہنا تھا کہ مائیں ہرو ہوتی ہیں، جب خطرہ بہت قریب ہوتا ہے، انھیں فوراً احساس ہو جاتا ہے اور وہ اپنے بچوں کو بچا لیتی ہیں، اتنا بڑا کنکھجورا ہم نے پہلے کبھی نہیں دیکھا تھا، وہ میرے بیٹے کے لیے خطرناک ثابت ہو سکتا تھا۔

مذکورہ کنکھجورا 11.8 (30cm) انچ لمبا تھا، اکثر کنکھجورے زہریلے ہوتے ہیں، بڑی جسامت والے کنکھجوروں، جو ویتنامی اور سرخ سر والے چینی کنکھجورے کے طور پر مشہور ہیں، کے ڈنک سے سوجن ہوتی ہے اور شدید درد پانچ دنوں تک رہتا ہے۔