جسم میں خون کی کمی کی وجوہات کے باعث بہت سی بیماریاں جنم لیتی ہیں جبکہ خون کی کمی جسمانی افعال کو تیزی سے متاثر کرسکتی ہے، جس سے متعدد مسائل جنم لیتے ہیں۔
اے آر وائی نیوز کے پروگرام با خبر سویرا میں بات کرتے ہوئے ماہر غذائیات کا کہنا تھا کہ پاکستان کی اگر بات کی جائے تو تقریباً 15 فیصد افراد خون کی کمی کا شکار ہیں جبکہ یہ ایک عالمی مسئلہ بن چکا ہے۔
انہوں نے کہا کہ بالخصوص خواتین اور بچوں میں خون کی کمی کی شکایات بہت زیادہ عام ہوتی ہیں، اس کی جو سب سے عام علامت ہے وہ آپ کے جسم میں آئرن کی کمی کا ہونا ہے۔
ماہر غذائیات نے خون کی کمی کی وجوہات سے متعلق کہا کہ اگر آپ کا کسی وجہ سے بہت زیادہ خون بہہ گیا ہے یا آپ ایسی غذائیں استعمال نہیں کررہے جن میں آئرن پایا جاتا ہے، تو آپ خون کی کمی کا شکار ہوسکتے ہیں۔
انہوں نے کہا بچوں میں گروتھ کی وجہ سے آئرن کی طلب بہت زیادہ بڑھ جاتی ہے۔اس لئے عموماً بچوں میں خون کی کمی کا ہونا عام طور پر زیادہ ہوتا ہے۔
اس کے علاوہ اگر آپ کا وزن زیادہ ہے تو جسم کو آئرن کی زیادہ مقدار چاہئے ہوتی ہے، اس کے مطابق آئرن نہ ملے تو خون کی کمی ہوسکتی ہے جبکہ خواتین میں عام طور پر حمل کے دوران خون کی کمی شکار ہوجاتی ہیں، ماہر غذائیات کا کہنا تھا کہ مردوں کی اگر بات کی جائے تو زیادہ تر بزرگ افراد میں خون کی شکایت ہوتی ہے۔
ماہر غذائیات کا کہنا تھا کہ اگر آپ اچھی خوراک، پھل اور جوسز وغیرہ بھی استعمال کررہے ہیں اور اس کے باوجود بھی اگر آپ خون کی کمی کا شکار ہیں تو اس حوالے سے آپ کو جانچنے کی ضرورت ہے کہ آیا کہیں آپ کسی دوسری بیماری کا شکار تو نہیں کہ جس کی وجہ سے جسم میں آئرن نہیں بن رہا۔
ماہر غذائیات کا مزید کہنا تھا ہمیں چاہئے کہ ایسی غذائیں استعمال کریں کہ جس میں وافر مقدار میں آئرن پایا جاتا ہو۔ جیسے گوشت، کلیجی، مختلف اقسام کی دالیں اور سبزیاں ان میں آئرن وافر مقدار میں پایا جاتا ہے۔ یہ استعمال کرکے آپ اپنے جسم میں آئرن کی کمی پورا کرسکتے ہیں۔
