کراچی: رویت ہلال کمیٹی نے ماہ ربیع الاوّل 1441 ہجری کا چاند نظر آنے کا اعلان کردیا۔
تفصیلات کے مطابق مفتی منیب الرحمان کی زیر صدارت رویت ہلال کمیٹی کا اجلاس ہوا جس میں تمام مکاتب فکر کے علماء، سائنسی اور محکمہ موسمیات کے ماہرین نے شرکت کی۔
مرکزی اجلاس کے علاوہ پاکستان کے بڑے شہروں میں بھی رویت ہلال کمیٹی کی زونل کمیٹیوں کے اجلاس ہوئے۔ ملک بھر سے شہادتیں موصول ہونے اور تصدیق کے بعد چیئرمین مفتی منیب الرحمان نے ربیع الاوّل کا چاند نظر آنے کا اعلان کیا۔
رویت ہلال کمیٹی کے اعلان کے مطابق یکم ربیع الاول 30 اکتوبر بروز بدھ اور اسی طرح 12 ربیع الاول 10 نومبر بروز اتوار کو ہوگی۔ملک بھر میں جشن عید میلاد النبیﷺ اتوار کے روز مذہبی عقیدت و احترام کے ساتھ منایا جائے گا۔
یاد رہے کہ ماہ ربیع الاوّل اسلامی سال کا تیسرا مہینہ ہے جس میں آقائے دو جہاں حضرت محمد مصطفیٰ ﷺ کی ولادت ہوئی جس کے بعد دنیا سے جہالت کا خاتمہ شروع ہوا۔
پیغمبر اکرم صلی اللہ علیہ والٰہ وسلم پوری دنیا کے لئے عملی نمونہ بن کر آئے اور وہ ہر شعبے میں اس اوج کمال پر فائز ہیں کہ ان جیسا کوئی تھا اور نہ ہی قیامت تک آسکتا ہے۔
یکم ربیع الاول سے ہی مساجد اوردیگرمقامات پرمیلاد النبیﷺ اورنعت خوانی اور مدحِ رسول صلی اللہ علیہ و آلہ وسلم کی محافل شروع ہو جاتی ہیں جن میں علمائےکرام آنحضرت صلی اللہ علیہ و آلہ وسلم کی ولادت با سعادت، آپ کی ذات مبارکہ اور سیرتِ طیبہ کے مختلف پہلوؤں پرروشنی ڈالتے ہیں، اسی طرح مختلف شعرا اورثنا خوانِ رسول آنحضرت صلی اللہ علیہ و آلہ وسلم کی شان اقدس میں نعتیہ گلہائے عقیدت اوردرودوسلام پیش کرتے ہیں۔
