لاہور : داتا دربار دھماکے کا ایک اور زخمی زخموں کی تاب نہ لاتے ہوئے میو اسپتال میں دم توڑ گیا، جس کے بعد مرنے والوں کی تعداد تیرہ ہوگئی ہے، پولیس نے زیر حراست نوجوان کو تفتیش کے بعد رہا کردیا۔
تفصیلات کے مطابق داتا دربار دھماکے کے بعد لاہور کی فضا آج بھی سوگوار ہے ، میواسپتال میں زیرعلاج ایک اورزخمی دوران علاج دم توڑ گیا۔ سانحے میں جاں بحق ہونے والے افراد کی تعداد تیرہ ہوگئی ہے۔
دھماکے کی فوٹیج میں نظرآنے والے اور دہشت گردوں کے مبینہ سہولت کار قرار دیے جانے والے نوجوان مہر ذیشان کو سی ٹی ڈی نے تحقیقات کے بعد رہا کردیا۔
دھماکے کی سی سی ٹی وی فوٹیج میں مہر ذیشان نامی نوجوان کو مشتبہ شخص قراردیا گیا تھا۔ سی ٹی ڈی نے گزشتہ رات مہر ذیشان کوحراست میں لے کر تحقیقات کی۔
مہر ذیشان نے بتایا ہے کہ اس سے دو تین گھنٹے سوالات کئے گئے، مہرذیشان نے دھماکے کی فوٹیج میں نظر آنے پر سوشل میڈیا پر ویڈیو بیان جاری کیا تھا۔ جس میں ذیشان کا کہنا تھا کہ دہشت گردوں سے میرا کوئی تعلق نہیں۔ گوجرانوالہ میں کریانہ اسٹور چلاتا ہوں اور سلام کرنے دربار پر آیا تھا۔
واضح رہے کہ سانحہ لاہور کے بعد پنجاب کے مختلف شہروں میں پولیس کا سرچ آپریشن جاری ہے، پاکپتن میں چالیس مشکوک افراد کوحراست میں لیا گیا جبکہ درباربابا فریدؒ کی سیکورٹی بھی بڑھا دی گئی ہے۔
لاہور، داتا دربار خودکش حملے کی تحقیقات کے لیے جے آئی ٹی تشکیل دے دی گئی
گزشتہ روز لاہور میں داتا دربار کے باہر خود کش دھماکے سے متعلق ابتدائی رپورٹ وزیر اعظم کو ارسال کی گئی تھی ، ذرائع کا کہنا تھا کہ خود کش دھماکے کے تانے بانے ماضی میں پولیس پر ہونے والے حملوں سے ملتے ہیں، خود کش دھماکے اورمال روڈ پر پولیس پر کئے گئے حملے میں استعمال کیا گیا بارودی مواد بھی مماثلت رکھتا ہے۔