Tag: متبادل توانائی

اسلام آباد: متبادل ذرائع سے بجلی کی پیداوار کے حوالے سے اہم پیش رفت ہوئی ہے، سولر اور وِنڈ پاور پراجیکٹس لگانے والوں کے لیے آسان سرٹیفکیشن ریگولیشنز جاری کر دیے گئے۔

تفصیلات کے مطابق متبادل توانائی ترقیاتی بورڈ نے اے ای ڈی بی ریگولیشنز 2021 جاری کر دیے، اب تک اے ای ڈی بی 126 وینڈرز کو سرٹیفکیٹس جاری کر چکا ہے، اور ملک بھر میں 200 میگا واٹ کے 13 ہزار نیٹ میٹرنگ سسٹم نصب کیے جا چکے ہیں۔

سی ای او متبادل توانائی ترقیاتی بورڈ شاہجہاں مرزا نے بتایا کہ نئی ریگولیشنز ملک میں کلین انرجی کے فروغ میں کردار ادا کریں گی، ملک میں سولر اور ونڈ پاور کو فروغ حاصل ہوگا۔

شاہجہاں مرزا کا کہنا تھا کہ نئی ریگولیشنز پر تمام شراکت داروں سے مشاورت کی گئی ہے، ان ریگولیشنز کا اطلاق متبادل توانائی کے تمام منصوبوں پر ہوگا۔

اسلام آباد: وفاقی وزیر توانائی عمر ایوب کا کہنا ہے کہ متبادل توانائی کی مد میں 20 ہزارمیگاواٹ تک بجلی کی پیداوار بڑھائی جائے گی، ڈنمارک کی کمپنیاں متبادل توانائی کے دستیاب مواقع سے فائدہ اٹھائیں۔

تفصیلات کے مطابق وفاقی وزیر توانائی عمر ایوب سے ڈنمارک کے سفیر رولف ہولمبوئے نے ملاقات کی۔ وفاقی وزیر نے کہا کہ نئی متبادل توانائی پالیسی میں صوبوں کا نمایاں کردار ہے، نئی پالیسی میں فیصلہ سازی، اطلاق میں صوبوں کا کردار نمایاں ہے۔

عمرایوب نے کہا کہ ڈنمارک کا عالمی سطح پر کلین اور گرین انرجی میں کلیدی کردار ہے، پاکستان دستیاب گرین انرجی کے مواقع سے استفادہ کے لیے کوشاں ہے۔

انہوں نے کہا کہ اس وقت متبادل انرجی کا مجموعی انرجی مکس میں 4 فیصد ہے، 2025 تک مجموعی انرجی مکس میں متبادل توانائی کا حصہ 20 فیصد تک بڑھ جائے گا، 2030 تک مجموعی انرجی مکس میں متبادل توانائی کا حصہ 30 فیصد بڑھایا جائے گا۔

وفاقی وزیر نے کہا کہ متبادل توانائی کی مد میں 20 ہزارمیگاواٹ تک بجلی کی پیداوار بڑھائی جائے گی، ڈنمارک کی کمپنیاں متبادل توانائی کے دستیاب مواقع سے فائدہ اٹھائیں۔

ڈنمارک کے سفیر نے کہا کہ متبادل توانائی کے ذرائع سے 60 فیصد بجلی کی پیداوار کی سوچ قابل تحسین ہے، ڈنمارک اس شعبے میں اپنی مہارتوں اور ماہرین کے تبادلے کے لیے تیار ہے، ڈنمارک انتہائی کم قیمتوں پرمتبادل توانائی کے ذرائع سے بجلی پیدا کر رہا ہے۔