ARYNews.tv | Urdu – Har Lamha Bakhabar

Tag: متحدہ عرب امارات

  • دبئی میں خواتین بس ڈرائیورز کا تقرر

    دبئی میں خواتین بس ڈرائیورز کا تقرر

    دبئی: متحدہ عرب امارات کے شہر دبئی میں 3 خواتین کو بطور بس ڈرائیور بھرتی کرلیا گیا ہے، اس اقدام کا مقصد ٹرانسپورٹ کے شعبے میں خواتین کو مواقع فراہم کرنا ہے۔

    اماراتی میڈیا کے مطابق دبئی میں روڈ اینڈ ٹرانسپورٹ اتھارٹی نے ریاست میں مختلف روٹس پر بطور بس ڈرائیور 3 خواتین کو بھرتی کیا ہے۔

    اتھارٹی کا کہنا ہے کہ جن خواتین کی بھرتی کی گئی وہ تربیت کے بعد امارات میں ڈرائیونگ کے ضوابط اور معیار کے اعلیٰ پیمانے پر پورا اترتی ہیں۔

    دبئی حکام کا کہنا ہے کہ بس ڈرائیورز کے شعبے میں خواتین کو مواقع فراہم کرنے اور اس شعبہ میں توازن پیدا کرنے کے لیے ابتدائی طور پر 3 خواتین کو بھرتی کیا گیا ہے۔

    اس پروجیکٹ کا پہلا مرحلہ 3 ڈرائیورز کی تقرری کے ذریعے شروع کیا گیا ہے جنہیں 3 روٹس پر چلانے کے لیے اتھارٹی کے ذریعے اجازت دی گئی ہے، اس پروجیکٹ کو مزید وسعت دی جائے گی۔

  • دبئی کے شہریوں اور غیر ملکیوں کے لیے اہم ترین تجویز

    دبئی کے شہریوں اور غیر ملکیوں کے لیے اہم ترین تجویز

    ابو ظہبی: متحدہ عرب امارات میں دبئی کے ایوان صنعت و تجارت نے تجویز دی ہے کہ موجودہ حالات کو مدنظر رکھتے ہوئے اقامہ فیس اور ریاستی خلاف ورزیوں پر مقرر تمام جرمانے منسوخ کردیے جائیں جبکہ ٹیکس میں بھی کمی کی جائے۔

    اماراتی خبر رساں ادارے کے مطابق دبئی ایوان تجارت نے اقامہ فیس میں کمی، جرمانوں کی منسوخی، ویلیو ایڈڈ ٹیکس میں 2 فیصد اور بجلی و پانی کے بل میں 50 فیصد کمی کی تجویز دی ہے۔

    دبئی ایوان صنعت و تجارت نے تجویز دی کہ ویلیو ایڈڈ ٹیکس یا تو 2 فیصد تک کم کردیا جائے یا ٹیکس کی ادائیگی 2020 کے آخر تک ملتوی کردی جائے۔

    ایوان تجارت نے موجودہ مرحلے کے لیے تعمیری اقتصادی اسکیمیں تیار کرنے کے لیے وسیع البنیاد اقتصادی کونسل تشکیل دینے کا مطالبہ کیا ہے، ایوان کا کہنا ہے کہ کسٹم ڈیوٹی نیز پانی، بجلی و خدمات فیس رواں سال کے آخر تک 50 فیصد تک کم کردی جائیں۔

    دبئی ایوان صنعت و تجارت نے نجی اداروں کی طرف سے موجودہ عالمی بحران سے نمٹنے کے لیے جو تجاویز شیخ احمد بن سعد آل مکتوم کو پیش کی ہیں وہ یہ ہیں۔

    سرکاری ادارے اور اس کے ماتحت کمپنیاں ٹھیکے داروں، سامان درآمد کرنے والے تاجروں اور مستحق افراد کو مقررہ بجٹ کی قسطیں جلد از جلد ادا کریں۔

    حد سے زیادہ غیر ملکی عملے کو وطن واپس بھجوانے میں کمپنیوں کی مدد کی جائے، غیر ملکی ورکرز کی بے دخلی کے اخراجات کے لیے فنڈ فراہم کیے جائیں۔

    تجارتی لائسنسوں کے اجرا اور توسیع کی فیس 2020 تک یا تو منسوخ کردی جائے یا 50 فیصد تک کم کردی جائے۔

    دبئی میں کام کرنے والے تمام اداروں پر مقرر مارکیٹ فیس 2.5 فیصد سنہ 2020 کے آخر تک معطل کردی جائے۔

    کسٹم ڈیوٹی 2020 کے آخر تک 50 فیصد تک کم کردی جائے۔

    پانی بجلی اور خدمات فیس 50 فیصد تک کم کردی جائے۔

    ویلیو ایڈڈ ٹیکس کم کر کے یا تو 2 فیصد کردیا جائے یا ادائیگی 2020 کے آخر تک ملتوی کردی جائے اور کمپنیوں کی کیش پوزیشن بہتر بنانے کے لیے اس حوالے سے تمام جرمانے ختم کردیے جائیں۔

    اقامہ فیس کم کردی جائے، جن لوگوں کے اقامے ختم ہوگئے ہوں ان کے اقاموں میں توسیع کردی جائے۔ جن کے اقامے منسوخ ہوگئے ہوں وہ بھی سال رواں کے آخر تک بڑھا دیے جائیں اور اس حوالے سے تمام جرمانے منسوخ کردیے جائیں۔

    اقامے سے متعلق سہولت سرمایہ کاروں، عام افراد اور ان کے خاندانوں، سب کو دی جائے۔

    سنہ 2020 کے آخر تک وفاقی و ریاستی خلاف ورزیوں پر مقرر تمام جرمانے منسوخ کردیے جائیں۔

    دکانوں کے کرایوں کے معاہدے کسی شرط یا جرمانے کے بغیر منسوخ کرنے کی اجازت دی جائے۔

  • متحدہ عرب امارات: کرونا وائرس کے نئے کیسز کی شرح ایک فیصد سے بھی کم

    متحدہ عرب امارات: کرونا وائرس کے نئے کیسز کی شرح ایک فیصد سے بھی کم

    ابو ظہبی: متحدہ عرب امارات میں کرونا وائرس کے نئے کیسز کی شرح ایک فیصد سے بھی کم ہوگئی، وائرس سے صحتیابی کی شرح 57 فیصد سے بھی زائد ہے۔

    اماراتی نیوز ایجنسی کے مطابق اماراتی وزارت صحت کا کہنا ہے کہ گزشتہ 14 دن کے اعداد و شمار کا جائزہ لینے سے معلوم ہوا ہے کہ ملک میں کورونا کے پھیلاؤ میں خاطر خواہ کمی ہوئی ہے۔

    وزارت صحت کے مطابق ملک بھر میں گذشتہ 14 دنوں کے دوران 5 لاکھ 70 ہزار افراد کا معائنہ ہوا ہے جس کے نتیجے میں صفر اعشاریہ 96 فیصد لوگوں کا ٹیسٹ مثبت آیا ہے۔

    حکام کے مطابق روزانہ کی بنیاد پر مریضوں کی تصدیق کی شرح 25 فیصد رہ گئی ہے جبکہ کرونا وائرس سے ہلاک ہونے کی شرح 0.1 ہوگئی ہے۔

    وزارت صحت کا کہنا ہے کہ گزشتہ 14 دنوں میں 5 ہزار 474 افراد میں کرونا وائرس کی تصدیق ہوئی ہے جبکہ اس کے مقابلے میں 9 ہزار 523 افراد شفا یاب ہوئے ہیں، اس عرصے کے دوران 22 مریض جاں بحق ہوئے مگر اس کے مقابلے میں صحتیابی کی شرح میں 57.5 فیصد کا اضافہ ہوا ہے۔

    وزارت کا مزید کہنا تھا کہ ملک میں عام افراد کے معائنے کی شرح میں بھی اضافہ ہوا ہے، اس سے پہلے روزانہ 25 ہزار افراد کا معائنہ ہورہا تھا، اب 40 ہزار کا ہورہا ہے۔

  • دبئی میں ایک ارب سے زائد درہم کا فراڈ کرنے والا گروہ گرفتار

    دبئی میں ایک ارب سے زائد درہم کا فراڈ کرنے والا گروہ گرفتار

    ابو ظہبی: متحدہ عرب امارات کے شہر دبئی کی پولیس نے 1.6 ارب درہم کا فراڈ کرنے والے گروہ کو گرفتار کرلیا، گروہ کے پاس سے 150 ملین درہم اور 13 پرآسائش گاڑیاں ضبط کرلی گئیں۔

    اماراتی ویب سائٹ کے مطابق دبئی پولیس نے دھوکہ دہی کے خطرناک ترین آپریشن میں کامیابی کا اعلان کیا ہے جس میں 1.6 ارب درہم کی دھوکہ دہی کرنے والے گروہ کو گرفتار کرلیا گیا۔

    مذکورہ آپریشن کو ’لومڑیوں کا شکار 2‘ کا نام دیا گیا، گرفتار گروہ کا سرغنہ انسٹا گرام پر نہایت مقبول شخص ہے۔

    مقامی میڈیا کے مطابق بین الاقوامی جعلساز گروہ کا سرغنہ افریقی ملک کا رامون عباس نامی شہری ہے اور ہاشبوبی کے نام سے مشہور ہے۔ اس پر دھوکہ دہی کے ذریعے لوگوں کی رقوم ہتھیانے کا الزام ہے۔

    سرغنہ پر بیرون ملک منی لانڈرنگ کے جرائم ، اکاؤنٹ ہیک کرنے، آن لائن دھوکہ دہی کے لیے بہروپیا بننے، ای بینکنگ کے ذریعے رقم نکالنے اور مختلف لوگوں کے شناختی کارڈ چوری کر کے انہیں آن لائن دھوکہ دہی کے جرائم میں استعمال کرنے کے الزامات ہیں۔

    پولیس تحقیقات کے مطابق گروہ نے امریکا اور یورپی ممالک سمیت متعدد ملکوں میں بڑے پیمانے پر لوگوں سے فراڈ کیا ہے۔

    مذکورہ گروہ کی گرفتاری کے لیے ایف بی آئی اور نائجیریا کے سراغرسانوں کے درمیان مقابلہ چل رہا تھا کہ کون اسے پہلے گرفتار کرے گا، تاہم دونوں ممالک کے سراغرساں پیچھے رہ گئے اور دبئی پولیس ہاشبوبی اور اس کے گروہ کو اپنی نوعیت کے منفرد آپریشن کے ذریعے گرفتار کرنے میں کامیاب ہوگئی۔

    گروہ کی گرفتاری میں 6 ٹیموں نے حصہ لیا، گرفتاری کے بعد بہت ساری اہم معلومات، قیمتی نوادر، خطرناک راز اور 150 ملین درہم برآمد کر کے ضبط کر لیے گئے، اندازہ لگایا گیا ہے کہ گروہ نے 1.6 ارب درہم اینٹھے جبکہ وہ 25 ملین درہم مالیت کی پرآسائش کاروں کے بھی مالک ہیں۔

    دبئی پولیس کے ڈائریکٹر جنرل عبد اللہ خلیفہ المری نے بتایا کہ ہاشبوبی کے علاوہ منی لانڈرنگ اور آن لائن جعلساز گروہ کے 10 افراد پکڑے گئے ہیں۔

    گروہ کے قبضے سے 12 کمپیوٹر، 47 اسمارٹ فون، 15 میموری کارڈ، 1 لاکھ 19 ہزار 580 دھوکہ دہی کی فائلوں، 19 لاکھ 26 ہزار 400 متاثرین کے پتوں پر مشتمل 5 ہارڈ ڈسک اور 13 پرآسائش کاریں بھی ضبط کی گئی ہیں۔

  • دبئی کا وہ مقام جہاں ہر وقت بارش ہوگی

    دبئی کا وہ مقام جہاں ہر وقت بارش ہوگی

    دبئی: متحدہ عرب امارات کے شہر دبئی میں ایسا مقام بنایا جارہا ہے جہاں ہر وقت بارش ہوتی رہے گی، اس مقامی کی تعمیر دبئی میں سیاحت کو فروغ دینے کے لیے شروع کیے جانے والے منصوبے کا حصہ ہے۔

    عرب میڈیا کے مطابق دبئی میں سخت موسم گرما کے دوران شہر کی آب و ہوا میں توازن پیدا کرنے کے لیے ایک ایسی گلی بنائی جا رہی ہے جہاں اس وقت بارش شروع ہوجائے گی جب درجہ حرارت 27 ڈگری سے تجاوز کر جائے گا۔

    یہ گلی دا ہارٹ آف یورپ میں قائم کی جائے گی جو کہ دبئی میں سیاحت کو فروغ دینے کے لیے شروع کیے جانے والے منصوبے کا حصہ ہے۔ دا ہارٹ آف یورپ کا پروجیکٹ دبئی کے ساحل سے چند کلو میٹر کے فاصلے پر دا ورلڈ آئی لینڈز نام کی جزیرہ نما جگہ میں ہوگا۔

    یہ گلی ایک کلو میٹر لمبی ہوگی اور اس میں یورپی طرز پر ریستوران اور دیگر دکانیں ہوں گی، جہاں چلتے ہوئے لوگوں پر ہلکی ہلکی بارش ہوتی رہے گی۔

    اس پروجیکٹ پر کام کرنے والے کلائن ڈینسٹ گروپ کا کہنا ہے کہ ریننگ اسٹریٹ سالوں کی تحقیق اور تجربے کے بعد بنائی جا رہی ہے جو کہ توقع ہے کہ اس سال تک مکمل ہو جائے گی۔

    کلائن ڈینسٹ گروپ کے مطابق جیسے ہی درجہ حرارت 27 ڈگری سے تجاوز کرے گا، گلی میں موجود عمارتوں میں سے چھپے ہوئے پائپز کے ذریعے بارش کی صورت میں ٹھنڈا پانی برسنے لگے گا۔

    یہ پروجیکٹ اپنی نوعیت کا پہلا منصوبہ نہیں ہے۔ یہ آسٹرین آرکیٹیکٹ کیمیلو سیتے کے کام سے متاثر ہو کر شروع کیا جا رہا ہے۔

  • متحدہ عرب امارات: شہریوں کو بیرون ملک سفر کی اجازت

    متحدہ عرب امارات: شہریوں کو بیرون ملک سفر کی اجازت

    ابو ظہبی: متحدہ عرب امارات میں 23 جون سے غیر ملکی سفر شروع ہونے کا امکان ہے، سفر کرنے والوں کو سخت احتیاطی تدابیر کی پابندی کرنی ہوگی۔

    اماراتی نیوز اجنسی کے مطابق متحدہ عرب امارات نے 23 جون سے شہریوں اور ملک میں مقیم غیر ملکیوں کو بیرون ملک سفر کی مشروط اجازت دینے کا فیصلہ کیا ہے، وفاقی اتھارٹی برائے شناخت اور شہریت کا کہنا ہے کہ منتخب اسٹیشنوں کے لیے سفر کی شرائط کا اعلان جلد کیا جائے گا۔

    اتھارٹی کے مطابق اماراتی شہریوں اور ملک میں مقیم غیر ملکیوں کو ان شرائط اور طریقہ کار کے مطابق مخصوص اسٹیشنوں پر جانے کی اجازت ہوگی۔

    وزارت خارجہ، وفاقی اتھارٹی برائے شناخت و شہریت اور نیشنل اتھارٹی برائے ایمرجنسی اور کرائسز اینڈ ڈیزاسٹر مینجمنٹ نے مشترکہ بیان میں کہا ہے کہ اعلان کردہ شرائط اور طریقہ کار کے مطابق مخصوص مقامات کے سفر کی اجازت دی جائے گی جن کی پابندی کرنا لازم ہوگا۔

    بیان میں کہا گیا کہ یہ شرائط اور ضوابط وزارت صحت کی طرف سے کورونا وبا کی وجہ سے پیدا ہونے والے حالات کےمطابق جاری کیے جائیں گے۔ حکومت حالات کو مد نظر رکھتے ہوئے مناسب اسٹیشنوں کا اعلان کرے گی جہاں کا سفر محفوظ سمجھا جا سکتا ہے۔

  • خصوصی پروازیں، سعودی عرب اور یو اے ای میں پھنسے پاکستانیوں کی وطن واپسی

    خصوصی پروازیں، سعودی عرب اور یو اے ای میں پھنسے پاکستانیوں کی وطن واپسی

    پشاور: بیرون ممالک میں پھنسے پاکستانیوں کی وطن واپسی کا سلسلہ جاری ہے، پی آئی اے کی خصوصی پروازوں کے ذریعے سعودی عرب اور متحدہ عرب امارات ودیگر ممالک سے پاکستانیوں کو پشاور پہنچایا دیا گیا۔

    تفصیلات کے مطابق خصوصی پرواز کے ذریعے بیرون ممالک میں پھنسے پاکستانیوں کو وطن واپس لایا گیا، پشاور ایئرپورٹ پر مسافروں کو جراثیم کش اسپرے سے ڈس انفیکٹ کیا گیا۔ پشاورایئر پورٹ پر 24گھنٹے میں 4پروازوں سے ایک ہزار سے زائد پاکستانی پہنچے، اور یہ سلسلہ جاری ہے۔

    مختلف ممالک میں پھنسے تمام پاکستانیوں کی وطن واپسی تک خصوصی پروازوں کا سلسلہ جاری رہے گا۔

    پی آئی اے نے بیرون ملک پھنسے ہوئے ہم وطنوں کو وطن واپس پہنچانے کے لیے فلائٹ آپریشن جاری ہے، متعدد خصوصی پروازیں اب تک مختلف ممالک میں پھنسے 3 ہزار سے زائد پاکستانیوں کو وطن واپس لا چکی ہے۔

    پی آئی اے کی خصوصی پرواز: عراق میں پھنسے 250 پاکستانیوں کی وطن واپسی

    ایئرپورٹ پہنچنے پر تمام مسافروں کے کرونا وائرس ٹیسٹ کے نمونے حاصل کیے جارہے ہیں، ٹیسٹ کلیئر آنے پر انہیں گھر جانے کی اجازت دی جائے گی۔ ملک کے تمام ایئرپورٹس پر انتظامات بڑھا دیے گئے ہیں۔

    قبل ازیں امریکا، یورپی ممالک اور عراق سمیت دیگر ممالک سے پاکستانی وطن واپس آگئے ہیں۔

  • امارات سے وطن واپسی کے خواہشمند غیر معتبر ذرائع سے ٹکٹ نہ خریدیں: پاکستانی قونصل جنرل

    امارات سے وطن واپسی کے خواہشمند غیر معتبر ذرائع سے ٹکٹ نہ خریدیں: پاکستانی قونصل جنرل

    دبئی: پاکستان کے قونصل جنرل احمد امجد علی نے کہا ہے کہ وطن واپسی کے خواہشمند پاکستانی صرف پی آئی اے کے کاؤنٹر سے ٹکٹ حاصل کریں اور غیر معتبر ذرائع سے ٹکٹ خریدنے سے پرہیز کریں۔

    دبئی میں پاکستانی قونصل جنرل احمد امجد علی نے اپنے ویڈیو پیغام میں کہا ہے کہ پاکستان انٹرنیشنل ایئر لائن (پی آئی اے) نے متحدہ عرب امارات میں موجود پاکستانیوں کی وطن واپسی کے لیے جو فلائٹس مختص کی ہیں ان کا ٹکٹ صرف پی آئی اے کاؤنٹر سے ہی حاصل کیا جائے۔

    قونصل جنرل نے کہا کہ پی آئی اے نے کراچی کے لیے اکانومی کلاس کا کرایہ 810 درہم، بزنس کلاس کے لیے 19 سو درہم، پشاور اور وفاقی دارالحکومت اسلام آباد سمیت پنجاب کے دیگر شہروں کے لیے اکانومی کلاس کا کرایہ 11 سو 20 درہم اور بزنس کلاس کے لیے 22 سو درہم رکھا ہے، اس رقم کے علاوہ مزید کوئی اضافی رقم نہ دی جائے۔

    انہوں نے کہا کہ ایسی شکایات آرہی ہیں کہ کچھ ایجنٹ اضافی پیسے وصول کر کے ٹکٹ فروخت کر رہے ہیںِ، ایسے افراد کو کوئی اضافی رقم نہ دی جائے۔

    قونصل جنرل کا کہنا تھا کہ کوئی بھی ایجنٹ دبئی یا شمالی امارات میں پی آئی اے کے ٹکٹ فروخت کرنے کا مجاز نہیں ہے چنانچہ کسی بھی شخص سے ٹکٹ نہ خریدیں۔

    ان کے مطابق ٹکٹ صرف پی آئی اے کاؤنٹر سے ایشو ہوگا، خود وہاں جائیں اور ٹکٹ خرید کر نقد یا کارڈ سے ادائیگی کریں۔ اس کے علاوہ نہ تو کسی شخص کو پیسے دیں اور نہ کسی کو رقم آن لائن ٹرانسفر کریں۔

    قونصل جنرل نے مزید کہا کہ کاؤنٹر پر بھی اگر کوئی شخص کہے کہ وہ ایمبسی یا قونصلیٹ کا نمائندہ ہے تو یاد رکھیں کہ ہماری طرف سے ایسا کوئی نمائندہ وہاں نہیں بھیجا گیا۔ اسی طرح اگر لائن میں آگے لگوانے کے لیے بھی کوئی شخص رقم کا تقاضا کرتا ہے اور آپ اس کو رقم دے دیتے ہیں تو نقصان کے ذمہ دار آپ خود ہوں گے۔

    انہوں نے اپیل کی کہ ایسے افراد کے بارے میں پولیس، پی آئی اے انتظامیہ یا قونصلیٹ عملے کو اطلاع کریں جو غیر ضروری طور پر رقم کا تقاضہ کر رہے ہیں۔

    خیال رہے کہ متحدہ عرب امارات سے وطن واپسی کے لیے اب تک 70 ہزار پاکستانی، دبئی میں پاکستانی قونصلیٹ میں اپنی رجسٹریشن کروا چکے ہیں۔

  • عرب دنیا کے لیے بڑی امید، یو اے ای کا مریخ مشن ہوپ لانچ ہونے کے لیے شیڈول

    عرب دنیا کے لیے بڑی امید، یو اے ای کا مریخ مشن ہوپ لانچ ہونے کے لیے شیڈول

    ابوظبی: عرب دنیا کے لیے بڑی امید بن کر متحدہ عرب امارات کا مریخ مشن ‘ہوپ’ اگلے ماہ 14 تاریخ کو لانچ ہوگا۔

    غیر ملکی میڈیا کے مطابق متحدہ عرب امارت اگلے ماہ مریخ پر اپنا مشن بھیجے گا، یہ مشن 14 جولائی کو روانہ ہوگا، محمد بن راشد اسپیس سینٹر کا کہنا ہے کہ یہ مشن صرف متحدہ عرب امارات کے لیے نہیں بلکہ پورے عرب خطے کے لیے ہے۔

    یہ مارس مشن یو اے کا اپنا تعمیر کر دہ ہے، جو 14 جولائی کو لانچ ہوگا، اور سرخ سیارے کے مدار میں جا کر مریخی فضا کی حرکیات اور بیرونی خلا اور شمسی ہوا کے ساتھ اس کے تعامل کا مطالعہ کرے گا۔

    محمد بن راشد اسپیس سینٹر

    اگلے ہفتے اس کی فیولنگ شروع کی جائے گی، اسے مریخ تک پہنچنے کے لیے 493 ملین کلو میٹر (308 ملین میل) کا سفر طے کرنے میں 7 ماہ لگیں گے، آربٹ ہونے کے بعد یہ مشن مریخی فضا اور ماحول سے متعلق غیر معمولی ڈیٹا واپس بھیجنا شروع کرے گا۔

    یہ تحقیقاتی مشن مریخ کے گرد ایک مکمل مریخی سال یعنی 687 دنوں تک چکر لگاتا رہے گا تاکہ مطلوبہ ڈیٹا جمع کر سکے، مریخ کے گرد صرف ایک چکر لگانے کے لیے اس مشن کو 55 گھنٹے درکار ہوں گے۔

    پیر کو ایک پریس بریفنگ میں پروگرام کی سربراہ سارہ بنت یوسف الامیری نے بتایا کہ یہ منصوبہ نوجوان عرب سائنس دانوں کے لیے خلائی انجینئرنگ میں کیریئر کا آغاز کرنے کے لیے ایک بہت بڑا موقع ہے۔

    سارہ بنت یوسف الامیری، یو اے ای کونسل آف سائنٹسٹس کی سربراہ، امارات کے مارس مشن کی ڈپٹی پروجیکٹ منیجر

    اگلے برس فروری میں مریخ تک پہنچنے والا یہ مارس مشن عرب دنیا کا پہلا بین السیارہ مشن ہے، اس پروجیکٹ کے لیڈرز کا کہنا ہے کہ اس مشن پر پورے مشرق وسطیٰ کے مستقبل کا انحصار ہے۔ یہ مشن خلائی تحقیقات کے پرانے کارٹل کے ٹوٹنے کی ایک تازہ علامت بھی ہے جب یہ صرف سپرپاورز تک محدود تھا۔

    ہوپ مارس مشن پر متحدہ عرب امارات 2014 سے کام کر رہا ہے، پروجیکٹ منیجر عمر شریف کا کہنا تھا کہ یہ ملک کی طویل مدتی معاشی ترقی کا حصہ ہے اور اس پر یو اے ای کا مستقبل منحصر ہے۔

  • ابو ظہبی میں لاک ڈاؤن میں ایک ہفتے کی توسیع

    ابو ظہبی میں لاک ڈاؤن میں ایک ہفتے کی توسیع

    ابو ظہبی: متحدہ عرب امارات کے دار الحکومت ابو ظہبی میں لاک ڈاؤن میں ایک ہفتے کی توسیع کردی گئی، اس دوران ابو ظہبی کے رہائشی باہر نہیں جاسکتے اور نہ باہر سے کوئی شخص آسکتا ہے۔

    اماراتی خبر ایجنسی کے مطابق حکام کی جانب سے کہا گیا ہے کہ کرونا وائرس کے انسداد کے لیے قائم کمیٹی کی سفارش اور ریاست میں وبا کی صورتحال کو مدنظر رکھتے ہوئے لاک ڈاؤن میں ایک ہفتہ کی توسیع کا فیصلہ ہوا ہے۔

    حکام کا کہنا ہے کہ لاک ڈاؤن کے دوران ریاست ابو ظہبی کے رہائشی باہر نہیں جاسکتے اور نہ باہر سے کوئی شخص آسکتا ہے۔

    حکام کے مطابق ابو ظہبی اور اس کے ملحقہ دیگر شہروں کے تمام رہائشیوں پر کرفیو نافذ کیا جاتا ہے، اس سے استثنیٰ صرف بنیادی ضرورتیں فراہم کرنے والے ملازمین کو ہے۔

    حکام کی جانب سے مزید کہا گیا کہ ابو ظہبی، العین اور الظفرہ شہروں کے رہائشی کرفیو میں نرمی کے اوقات کے دوران اپنی ضرورت کی چیزیں خریدنے کے لیے گھروں سے نکل سکتے ہیں تاہم ان شہروں کے درمیان سفر پر پابندی ہوگی۔