Tag: متحدہ عرب امارات

ابو ظہبی : متحدہ عرب امارات کی حکومت نے ابوظہبی پہنچنے والے تمام ملکوں کے شہریوں کو سیاحتی ویزا دینے کا اعلان کردیا ہے اور یہ سہولت ٹرانزٹ ویزہ رکھنے والے مسافروں کے لیے بھی ہو گی.

تفصیلات کے مطابق متحدہ عرب امارات کی حکومت کی جانب سے سیاحتی ویزہ کے اجراء کے اعلان کے بعد امیگریشن حکام نے ابوظبی ایئرپورٹ کے ٹرمینل تھری (ٹرانزٹ ایریا) پر نیا کاﺅنٹر قائم کر دیا ہے جہاں محض 15 سے 30 منٹ میں سیاحتی ویزہ جاری کردیا جائے گا.

اس بات کا فیصلہ محکمہ سیاحت و کلچر، ابوظہبی ایئرپورٹ، اتحاد ایئرلائن اور خارجہ و داخلہ حکام کے مابین ہونے والے مشترکہ اجلاس میں ابوظہبی میں سیر و تفریح کے مواقعوں کے انتخاب اور یہاں سیاحت کے فروغ کے منصوبے 2017 کے تحت کیا گیا.

ذرائع کے مطابق سیاحتی ویزہ ابوظہبی آنے والے افراد کو 4 دن کے لئے فراہم کیا جائے گا اور ان چار دنوں میں مسافر ابوظہبی کی سیر کرسکیں گے اس سہولت سے نئے مسافر اور ٹرانزٹ ویزہ پر سفر کرنے والے مسافر بھی فائدہ اُٹھا سکتے ہیں.

خیال رہے کہ ابوظبی ایئرپورٹ کے ٹرمینل تھری (ٹرانزٹ ایریا) پر قائم کاﺅنٹر پہلے ہی مختلف قسم کے ویزے جاری کررہا ہے جس میں اب 4 روز کے سیاحتی ویزے کے اجراء کا اضافہ ہوگیا ہے.

علاوہ وزیں ٹرانزٹ ویزے پر سفر کرنے والے مسافروں کے لیے ابو ظہبی پہنچنے پر ان کے ویزے ایک مختصر طریقہ کار کے تحت محض ایک گھنٹے میں سیاحتی ویزے میں تبدیل کردیئے جائیں گے تاہم اس ویزے کی معیاد محض چار دن ہو گی.

متحدہ عرب امارات کی حکومت کا یہ اقدام ابوظہبی میں سیاحت کو فروغ دینے کے لیے کیا گیا ہے جب کہ یو اے ای کے الیوم وطنی کے موقع پر دنیا بھر سے سیاحوں کی کثیر تعداد رنگا رنگ تقریبات دیکھنے یہاں پہنچیں گے.

دبئی : وزیراعظم متحدہ عرب امارات راشد المکتوم نے جیلوں اور اصلاحی مراکز میں اسیر مخلتف قومیتوں سے تعلق رکھنے والے 600 سے زائد قیدیوں کی رہائی کا حکم دے دیا ہے۔

تفصیلات کے مطابق قیدیوں کی رہائی کا پروانہ نائب صدر و وزیراعظم متحدہ عرب امارات راشد المکتوم نے 46 ویں قومی دن کی خوشی میں جاری کیا جس سے قیدیوں میں خوشی کی لہر دوڑ گئی ہے۔

اس بات کا اعلان دبئی میڈیا آفس نے وزیراعظم راشد المکتوم کی جانب سے سماجی رابطے کی ویب سائٹ ٹویٹر پر جاری کیے گئے اپنے ایک پیغام میں کیا جس میں 606 قیدیوں کی رہائی کا مژدہ سنایا گیا۔

رہائی پانے والوں کا تعلق مختلف ایشیائی اور افریقی ممالک سے ہے جو ملازمت کی غرض سے متحدہ عرب امارات میں مقیم تھے اور معمولی جرائم میں ملوث پائے جانے کے بعد مختلف جیلوں میں سزا کاٹ رہے تھے یا اصلاحی مراکز میں بحالی کے مرحلے سے گذر رہے تھے۔

In his capacity as Ruler of #Dubai, @HHShkMohd orders the release of 606 inmates of #Dubai’s punitive and corrective institutions on the occasion of the UAE’s 46th National Day. pic.twitter.com/AMILO6cwcK

— Dubai Media Office (@DXBMediaOffice) November 27, 2017

خیال رہے ہر سال 2 دسمبر کو بہ طور ’الیوم وطنی‘ کے طور پر شایان شان طریقے سے منایا جاتا ہے اس موقع پر ملک بھر میں عام تعطیل کی جاتی ہے اہم عمارتوں پر خوبصورت چراغاں کیا جاتا ہے جب کہ آتش بازی کا بھی خاص انتظام کیا جاتا ہے۔

دبئی : تیرہ سالہ لڑکی کو جنسی طور پر ہراساں کرنے اور غیر اخلاقی ویڈیوز بھیجنے پر بھارتی نوجوان کو حراست میں لے کر عدالتی کارروائی کا آغاز کردیا گیا ہے۔

تفصیلات کے مطابق 27 سالہ بھارتی نوجوان کو جنسی طور پر ہراساں کرنے اور متاثرہ نوجوان لڑکی کی غیر اخلاقی ویڈیو بنا کر اُسے دھمکانے کے الزام میں حراست میں لے لیا گیا ہے۔

دبئی کورٹ میں جمع کرائے گئے چالان میں پولیس نے جنسی طور پر ہراساں کرنے، غیر اخلاقی ویڈیو بنانے اور ویڈیو کے ذریعے بلیک میلنگ کرتے ہوئے لڑکی کو ناجائز تعلقات استوار کرنے کے لیے دھمکانا جیسے جرائم میں ملزم کو چارج کیا ہے۔

پبلک پراسیکویشن نے عدالت کے سامنے موقف اختیار کیا کہ اس بات کے شواہد حاصل ہو گئے ہیں کہ ملزم نے 13 سالہ اپنی ہم وطن لڑکی کو جنسی طور پر ہراساں کرنے کا آغاز اُس وقت کیا جب وہ محض 11 سال کی تھی تاہم متاثرہ خاندان کی جانب سے پہلی مرتبہ شکایت اس سال اگست میں درج کرائی گئی۔

متاثرہ لڑکی کا کہنا تھا کہ ملزم کا گھر میں آنا جانا تھا اور وہ میرے والدین کی غیر موجودگی میں نازیبا حرکات کیا کرتا تھا اور دھمکاتا تھا کہ اگر میں نے کچھ کہا تو میری والدہ مجھے ہی قصور وار ٹہرا کر ماریں گی اور بھارت واپس بھیج دیں گی۔

متاثرہ لڑکی والدہ نے عدالت میں بیان دیتے ہوئے کہا کہ اپنی بیٹی کی ای میلز چیک کرنے کے دوران مجھے نازیبا ویڈیو دیکھنے کو ملی جو ملزم نے اپنے اکاؤنٹ سے بھیجی تھی اور ساتھ میں دھمکی آمیز تحریر میں ناجائز تعلقات استوار کرنے کے لیے دباؤ ڈالا گیا تھا۔

دوسری جانب ملزم نے پولیس کو دیئے اپنے بیان میں کہا کہ وہ اور لڑکی ایک دوسرے کو نہ صرف یہ کہ پسند کرتے ہیں بلکہ ایک دوسرے کے ساتھ ساری زندگی گذارنے کا عہد بھی کر چکے ہیں۔

ابوظہبی : متحدہ عرب امارات میں نئے قوانین کے تحت حکومت سے پیشگی اجازت لیے بغیر مذہبی رسومات سے متعلق تقریبات، قرآن کی درس و تدریس اور مذہبی تقاریر پر پابندی عائد کردی گئی ہے نئے مسودہ قانون میں مساجد میں کام کرنے والے ملازمین کے چناؤ کے لیے معیار وضع کیے گئے ہیں۔

یہ مسودہ قانون وفاقی قومی کونسل کی منظوری سے تیار کیا گیا ہے جس میں مساجد میں کام کرنے والے ملازمین اور پیش اماموں کی تنخواہوں اور ان کے چناؤ اور مذہبی تقاریر و دروس سے متعلق قانون وضع کیے گئے جن کی خلاف ورزی کرنے والوں کو سخت سزا اور جرمانے کے ساتھ جیل کی ہوا بھی کھانی پڑے گی۔

یہ مسودہ قانون وفاقی قومی کونسل ( Federal National Council) کے فوکل پرسن ڈاکٹر امل کی زیر صدارت ہونے والے اجلاس میں کیا گیا جو یو اے ای میں قائم مساجد اور دیگر عبادت گاہوں سے متعلق ضابطہ اخلاق مرتب دینے اور انہیں قانونی رنگ دینے کے لیے بلایا گیا تھا جہاں طویل غور و خوص کے بعد یہ مسودہ متفقہ طور پر مرتب دیا گیا۔

فوری طور پر نافذ العمل نئے مسودہ قانون کے تحت بلا اجازت مذہبی لیکچرز اور تقاریر کرنے اور مذہبی تقریبات منعقد کرنے پر جرمانہ عائد ہوگا اور خلاف ورزی کرنے والوں کو جرمانے کے ساتھ ساتھ چند ماہ قید کی سزا بھی دی جائے گی۔

اراکین ایف این سی نے اس بات پر زور دیا کہ مساجد میں صرف اعلیٰ تعلیم یافتہ اور تربیت شدہ ملازمین رکھے جائیں اور کسی بھی شدت پسند جماعت، سیاسی ونگ یا کالعدم تنظیم سے تعلق رکھنے والا شخص مساجد میں کسی قسم کی ملازمت حاصل نہیں کرسکے گا۔

مساجد کے ملازمین کی کسی سیاسی، مذہبی یا انتہا پسند جماعت کے لیے مسجد سے باہر بھی کام کرنے کی اجازت نہیں ہوگی اور نہ مسجد کو کسی سیاسی و مذہبی ایجنڈے کے لیے استعمال کیا جاسکے گا اور نہ ہی مسجد کے باہر قرآن کی تعلیم دینے کی اجازت ہوگی۔

علاوہ ازیں ’جنرل اتھاڑتی آف دی اسلامک افیئرز اینڈ اینڈومنٹ‘ کی اجازت کے بغیر اسلامی مراکز کی تعمیر یا کسی اور مقصد کے لیے چندہ اکٹھا کرنے پر پابندی عائد ہوگی جس کی خلاف ورزی کرنے والوں کو تین ماہ جیل قید یا پانچ ہزار درہم کا جرمانہ عائد ہوگا۔

نئے مسودہ قانون کے تحت مسجد کی حرمت اور حفاظت کے خلاف قدم اُٹھانے والوں کو 20 ہزار درہم سے 50 ہزار درہم تک کا جرمانہ یا تین ماہ کے لیے قید کی سزا سنائی جاسکتی ہے اسی طرح مسجد کے اندر یا باہر بھیک مانگنے اور امام مسجد سے الجھنے والوں پر 5 ہزار درہم جرمانہ یا تین ماہ کی قید ہوسکتی ہے۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

دبئی : متحدہ عرب امارات میں اب معمولی جرائم پر عدالتوں کے سامنے پیش کیے جانے کے بجائے ملزمان کو موقع پر ہی جرمانے کی سزائیں دینے کا فیصلہ کیا ہے.

دبئی حکومت کی جانب سے یہ فیصلہ عدالتوں پر دباؤ کم کرنے کے لیے کیا گیا ہے جس کے تحت معمولی جرائم پر مقدمات عدالتوں میں چلانے کے بجائے پولیس کو جرمانے عائد کرنے کا اختیار دے دیا جائے گا.

بین الااقوامی خبر رساں ایجنسی سے بات کرتے ہوئے دبئی کے اٹارنی جنرل عصام عیسی الحومید نے فیصلے سے متعلق بتایا کہ معمولی جرائم پر جرمانے کی سزا کا اختیار دبئی پولیس اسٹیشن اور فیملی پراسیکیوشن ونگز کو دے دیا گیا ہے جس کا اطلاق 4 دسمبر 2017 سے ہوگا.

انہوں نے مزید بتایا کہ اس نئے فیصلے کے تحت خود کشی کی نا کام کوشش پر ایک ہزار درہم، دشنام طرازی کرنے اور فون پر بد نام کرنے پر 2 ہزار درہم جب کہ فون کے ذریعے چھیڑنے اور تنگ کرنے پر 5 ہزار درہم اور ہوٹل میں کمرے کا کرایہ ادا نہ کرنے پر 20 ہزار سے 50 ہزار درہم جرمانہ عائد ہوگا.

اٹارنی جنرل دبئی نے مزید بتایا کہ اسی طرح دھوکہ دہی کے دفعات کے تحت ایک لاکھ سے 2 لاکھ درہم کا چیک باؤنس ہونے پر 10 ہزار درہم ، 50 ہزار سے ایک لاکھ درہم کا چیک باؤنس ہونے پر 5 ہزار درہم اور 50 ہزار سے کم رقم کے چیکس باونس ہونے پر 2 ہزار درہم کا جرمانہ وصول کیا جائے گا.

انہوں کہا جرمانے عائد کرنے کی حد کے حوالے سے قانونی ماہرین اور آئین ساز اداروں سے مشاورت بھی کی گئی ہے اور اس کا مقصد عدالتوں سے دباؤ کم کرنا ہے تا کہ عدالتوں میں زیر التواء مقدمات کو تیزی سے مکمل کیا جائے جس سے جیلوں میں قیدیوں کی گنجائش بھی بڑھے گی.

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

دبئی: متحدہ عرب امارات میں حالیہ بارشوں کا سلسلہ رواں ہفتے کے اختتام تک جاری رہے گا۔

تفصیلات کے مطابق نیشنل سینٹر آف میٹرولوجی اینڈ سیسمولوجی کا کہنا ہے کہ متحدہ عرب امارت میں حالیہ بارشوں کا سلسلہ رواں ہفتے کے اختتام تک جاری رہے گا۔

خیال رہے کہ نیشنل سینٹر آف میٹرولوجی کے مطابق گزشتہ روز ملک کے شمالی اور مشرقی حصوں میں بارش کے بعد موسم خوشگوار ہوگیا۔

یاد رہے کہ دو روز قبل متحدہ عرب امارات کے مختلف شہر وں میں دبئی،شارجہ ،عجمان،فجیرہ اور راس الخیمہ میں موسلادھار بارش ریکارڈ کی گئی تھی۔

واضح رہے کہ نیشنل سینٹر آف میٹرولوجی اینڈ سیسمولوجی کا کہنا ہے کہ متحدہ عرب امارات کے مختلف علاقوں میں بارشوں کا یہ سلسلہ رواں ہفتے کے آخر تک جاری رہے گا۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔