ARYNews.tv | Urdu – Har Lamha Bakhabar

Tag: متحدہ قومی موومنٹ

  • تحریک انصاف طالبان کا سیاسی ونگ ہے، رابطہ کمیٹی

    تحریک انصاف طالبان کا سیاسی ونگ ہے، رابطہ کمیٹی

    کراچی: ایم کیو ایم کی رابطہ کمیٹی کا کہنا ہے کہ تحریک انصاف طالبان کا سیاسی ونگ ہے۔

    ایم کیوایم رابطہ کمیٹی نے کراچی میں پریس کانفرنس کرتے ہوئے تحریک انصاف اور عمران خان کو آڑے ہاتھوں لیا، کنور نوید کا کہنا تھا کہ تحریک انصاف کے کارکنوں نے پی ٹی وی پر حملہ کیا تو عمران خان نے شاباش دی۔

    ان کا کہنا تھا کہ تحریک انصاف طالبان کا سیاسی ونگ ہے،ان کا کہنا تھا کہ کراچی والے اگر ان کو ووٹ دیں تو اچھے ہیں۔

    اس موقع پر ایم کیو ایم کے رہنما وسیم اختر نے عمران خان کو خبردار کیا کہ آئندہ کراچی کی عوام کے لیے نازیبا الفاظ استعمال نہ کریں، وسیم اختر نے کہا کہ این اے دو سو چھیالیس سے حق پرست امیدوار ہی کامیاب ہوگا۔

  • کسی جرائم پیشہ کو90پر پناہ نہیں دی، فاروق ستار

    کسی جرائم پیشہ کو90پر پناہ نہیں دی، فاروق ستار

    اسلام آباد: کراچی آپریشن کسی ایک جماعت کے خلاف نہیں وزیر اعظم نواز شریف نے ایم کیو ایم کے وفد کو یقین دہانی کرادی، فاروق ستار کہتے ہیں سیاسی ساکھ کو نقصان پہنچایا گیا۔کسی جرائم پیشہ کو نائن زیرو پر پناہ نہیں دی۔

    ایم کیوایم کے وفد کی وزیراعظم نواز شریف سے ملاقات ہوئی، ملاقات میں وزیراعظم نواز شریف کا کہنا تھاکراچی کی عوام نے بہت مشکلات کا سامنا کیا، شہر کے امن کیلئے مشترکہ کوشش سیاسی جماعتوں کی اخلاقی ذمہ داری ہے۔

     ملاقات کے بعد میڈیا سے گفتگو میں ایم کیو ایم کے رہنما فاروق ستار کا کہنا تھا کہ نائن زیرو پر کسی جرائم پیشہ کو پناہ نہیں دی، لائسنس یافتہ اسلحےکی تشہیر سے ساکھ کونقصان پہنچا۔

    خالد مقبول صدیقی نے بتایا کہ وزیر اعظم سے پوچھا کہ پھانسی سے چندگھنٹے قبل کسی کابیان لیا جاسکتا ہے؟؟ ایم کیو ایم کے وفد کا کہنا تھا کہ جرائم کےخاتمےکیلئے تعاون پہلےبھی کیا تھا اب بھی کریں گے۔

    عمران خان کے آڈیو کال ٹیپ کے حوالے سے ایم کیوا یم کے رہنما خالد مقبول صدیقی کا کہنا تھا کہ آڈیو ٹیپ منظر عام آنے کے عمران خان کا اصل چہرہ بے نقاب ہونا چاہئے۔

  • زرداری کی تحریری یقین دہانی تک معاہدہ نہیں ہوگا، الطاف حسین

    زرداری کی تحریری یقین دہانی تک معاہدہ نہیں ہوگا، الطاف حسین

    لندن : متحدہ قومی موومنٹ کے قائد الطاف حسین نے کہا ہے کہ سابق صدر آصف علی زرداری کی تحریری یقین دہانی تک سندھ حکومت سے کوئی معاہدہ نہیں ہوگا۔

    یہ بات انہوں نے لندن سے جاری اپنے بیان میں کہی، الطاف حسین کا کہنا تھا کہ  ماضی میں وزیراعلیٰ سندھ قائم علی شاہ سے معاہدہ کرکے ایم کیو ایم نے سبق حاصل کرلیاہے،

    ان کا کہنا تھا کہ وزیر اعلیٰ سندھ سے مذاکرات صرف خانہ پری کے لئے ہونگے ، اصل مذاکرات تو سابق صدر زرداری کی تحریری یقین دہانی کے بعد انہی سے ہونگے۔

    الطاف حسین نے بتایا کہ انہوں نے وزیراعظم نواز شریف اور وزیرداخلہ چوہدری نثار کو ٹیلی فون کیا تاہم ان سے بات نہیں ہوسکی۔

  • ہماری حب ا لوطنی کا امتحان کیوں لیا جا رہا ہے؟ فاروق ستار

    ہماری حب ا لوطنی کا امتحان کیوں لیا جا رہا ہے؟ فاروق ستار

    اسلام آباد : متحدہ قومی موومنٹ نےقومی اسمبلی کے اجلاس میں اپنا احتجاج ریکارڈ کرادیا۔ حق پرست رکن اسمبلی ڈاکٹرفاروق ستارنے اپنی تقریر میں  انٹیلی جنس شیئرنگ کا مطالبہ کرتے ہوئے کہا کہ اگرایم کیوایم میں کالی بھیڑیں ہیں توانہیں نکالنےمیں ہماری مدد کی جائے۔

    تفصیلات کے مطابق نائن زیرو پر رینجرز کا چھاپہ، متعدد رہنماؤں اور کارکنان کی گرفتاریاں، صولت مرزا کے حیرت انگیز انکشافات اور ایم کیوایم سے متعلق قیاس آرائیاں ان سب کی گونج آج قومی اسمبلی میں بھی سنائی دی۔

    ایم کیو ایم کے اراکین نے اجلاس میں شدید احتجاج ریکارڈ کرایا۔ ڈاکٹرفاروق ستارکا کہنا تھا کہ روز مرنےا ور جینے سے تنگ آگئے ہیں حب الوطنی کا امتحان کیو ں لیا جا رہا ہے؟

    وزیراعظم آرمی چیف، ڈی جی آئی ایس آئی، ڈی جی رینجرز، کور کمانڈر، ایم کیو ایم کے ساتھ ایسا سلوک نہ کر یں، فاروق ستار نے کہا کہ ملکی سیاست کے لئے ہمارا ایک کردار ہے بانوے والا رویہ اختیار کیا گیا تو اس نظام کو بچا نا کسی کے بس کی بات نہیں ہو گی۔

    انہوں نے کہا کہ دہشت گردی کے خلاف آخری جنگ کراچی میں لڑی جا ئےگی۔ سات سال تک عمران فاروق کےسر کی قیمت مقررکی گئی، آج عمران فاروق کے قاتل بھی معافی طلب کر سکتے ہیں۔

    فاروق ستارنےکہاکہ ہمارے ساتھ انٹیجلنس شئیر کی جا ئے، اگر ہماری صفوں میں کو ئی کا لی بھیٹریں چھپی ہیں تو ان کو نکا لنے کے لئے ہماری مدد کی جا ئے۔

  • مقدمے کے اندراج کا قانونی جائزہ لے رہے ہیں، ایم کیو ایم رابطہ کمیٹی

    مقدمے کے اندراج کا قانونی جائزہ لے رہے ہیں، ایم کیو ایم رابطہ کمیٹی

    لندن / کراچی : متحدہ قومی موومنٹ کی رابطہ کمیٹی پاکستان اورلندن نے اپنے ایک مشترکہ بیان میں رینجرز کے ایک افسر کی جانب سے قائد تحریک الطاف حسین کے خلاف مقدمے کے اندراج پر تبصرہ کرتے ہوئے کہاہے کہ ایم کیوایم کے آئینی وقانونی ماہرین اس معاملے کاتفصیلی جائزہ لے رہے ہیں اوراس مقدمہ کے تمام پہلوؤں کاتفصیلی جائزہ لینے کے بعد اس کے بارے میں قانونی حکمت عملی اختیارکی جائے گی۔

    رابطہ کمیٹی نے کہاکہ بادی النظر میں ظاہرہوتاہے کہ قائد تحریک الطاف حسین کے خلاف درج کئے جانے والے مقدمے میں لگائے جانے والے الزامات حقائق کی نفی کرتے ہیں۔

    رابطہ کمیٹی نے کہاکہ قائد تحریک الطاف حسین نے ماضی میں بھی اس طرح کے بے شمار مقدمات کاسامناکیاہے اوراب بھی ہم آئین وقانون کے دائرے میں رہتے ہوئے اپنا قانونی دفاع کریں گے ۔

    رابطہ کمیٹی نے تمام کارکنان وحق پرست عوام سے اپیل کی کہ وہ پرامن اورثابت قدم رہیں اور اپنی صفوں میں اتحاد برقرار رکھیں۔ رابطہ کمیٹی نے کہاکہ ایم کیوایم ایک امن پسند، لبرل اورجمہوریت پسندجماعت ہے او روہ قائدتحریک الطاف حسین کی پرعزم قیادت میں اپنی آئینی ،قانونی اورجمہوری جدوجہدجاری رکھے گی۔

    علاوہ ازیں ایم کیو ایم کےرہنما خالد مقبول صدیقی نے کہا ہے کہ مقدموں سے پہلے کبھی گھبرائے اورنہ اب گھبرائیں گے، انہوں نے کہا کہ متحدہ قومی موومنٹ پرستم توڑنےکی تیاری ہورہی ہے، نہ پہلے عزم کمزور ہوا تھا اور نہ اب کم ہوگا۔۔

  • ایم کیو ایم کی سندھ حکومت میں شمولیت کیلئےکمیٹی کا قیام

    ایم کیو ایم کی سندھ حکومت میں شمولیت کیلئےکمیٹی کا قیام

    کراچی : پیپلزپارٹی کے شریک چیئرمین آصف علی زرداری نے متحدہ قومی موومنٹ کی سندھ حکومت میں شمولیت کا عندیہ دیدیا ہے۔

    سابق صدر آصف علی زرداری نے وزیراعلیٰ سندھ سید قائم علی شاہ کی سربراہی میں ایک کمیٹی بنانے کی ہدایت دی ہے جو اس سلسلے میں ایم کیو ایم کے ساتھ مذاکرات کرے گی ۔

    تفصیلات کے مطابق بلاول ہاؤس کراچی میں پیپلزپارٹی کے اراکین اسمبلی کے اعزاز میں ظہرانہ دیا گیا، اس دوران پیپلزپارٹی کے شریک چیئرمین نے براہ راست اراکین اسمبلی سے تین بار ایم کیو ایم کے شمولیت کے حوالے سے پوچھا۔تاہم کسی نے بھی رائے دینے سے گریز کیا۔

    اس دوران پیپلزپارٹی کے رکن نادرمگسی کو شریک چیئرمین آصف علی زرداری نے براہ راست مخاطب کیا اور کہا کہ آپ بتائیں کہ یہ فیصلہ درست ہے یا نہیں؟ جس پر نادر مگسی کا کہنا تھا کہ ذاتی پسند ناپسند سے ہٹ کر سیاسی طور پر ایم کیو ایم کی سندھ حکومت میں شمولیت کا فیصلہ درست ہے ۔

    اس دوران پیپلزپارٹی کی خاتون رکن کلثوم چانڈیو نے بھی اس دوران کھڑے ہوکر ایم کیو ایم کی حکومت میں شمولیت کی واضح حمایت کی جس کے بعد پیپلزپارٹی کے شریک چیئرمین نے کہا کہ آپ لوگوں کی رائے مجھے مل گئی ہے اور وہ اجلاس ختم کرکے چلے گئے ۔

    اس سے قبل پیپلزپارٹی کے شریک چیئرمین آصف علی زرداری نے سینیٹ انتخابات میں کامیابی پر اپنی جماعت کے اراکین اسمبلی کو مبارکباد دی۔

    ان کا کہنا تھا کہ جو لوگ ہمیشہ سے سندھ حکومت کی گورننس کے خلاف باتیں کرتے تھے اب انہیں اپنی رائے تبدیل کرلینی چاہیے کیونکہ سندھ کے علاوہ ہر صوبے میں سینیٹ انتخابات میں ہارس ٹریڈنگ ہوئی سندھ واحد صوبہ ہے جہاں ہارس ٹریڈنگ نہیں ہوئی ۔

  • شاہینوں نے بہترین ٹیم ورک کا مظاہرہ کیا، الطاف حسین

    شاہینوں نے بہترین ٹیم ورک کا مظاہرہ کیا، الطاف حسین

    لندن : متحدہ قومی موومنٹ کے قائد الطا ف حسین نے کرکٹ ورلڈکپ میں آئر لینڈ کیخلاف میچ میں پاکستان کی شاندارکامیابی پر پاکستان ٹیم کے تمام کھلاڑیوں ،آفیشلزاورپوری قوم کوزبردست مبارکبادپیش کی ہے۔

    اپنے ایک بیان میں الطا ف حسین نے کہاکہ آج کے اس اہم میچ میں پاکستان ٹیم کے باؤلرز، بیٹسمینوں اورتمام کھلاڑیوں نے شاندارکھیل کامظاہرہ کیا،جس پر وہ زبردست خراج تحسین کے مستحق ہیں۔

    الطاف حسین نے کہاکہ پاکستانی ٹیم نے آج جس طرح ٹیم ورک کامظاہرہ کیاہے اگرآئندہ مقابلوں میں بھی اسی طرح ٹیم ورک کامظاہرہ کیاتوانشاء اللہ پاکستان ٹیم مستقبل میں ہونے والے تمام مقابلوں میں بھی کامیابی سے ہمکنارہوگی۔

    انہوں نے دعاکی کہ اللہ تعالیٰ پاکستان کو ورلڈکپ میں فتح وکامرانی سے ہمکنارفرمائے۔ الطاف حسین نے پاکستانی عوام سے کہاکہ وہ قومی ٹیم کی فتح کا جشن مناتے وقت یہ ذہن میں ضرور رکھیں کہ آج صبح ہی دہشت گردوں نے مسیحی برادری کی عبادت گاہوں کو نشانہ بنایا ہے جس کے نتیجے میں ایک درجن سے زائد بے گناہ مسیحی افراد جاں بحق ہوگئے ہیں۔

    انہوں نے کہا کہ ہمیں چاہیئے کہ ہم ان بے گناہ مسیحی برادری کے دکھ کو سامنے رکھیں اور اپنی دعاؤں میں انہیں بھی شریک رکھیں۔

  • چوہدری نثار کے منہ سے فوج کے احترام کی باتیں زیب نہیں دیتیں، رابطہ کمیٹی

    چوہدری نثار کے منہ سے فوج کے احترام کی باتیں زیب نہیں دیتیں، رابطہ کمیٹی

    کراچی : متحدہ قومی موومنٹ کی رابطہ کمیٹی کی جانب سے وزیرداخلہ کے ایم کیو ایم اور فوج کے حوالے سے بیان کاسخت ردعمل سامنےآیا ہے۔

    تفصیلات کے مطابق ایم کیوایم کی رابطہ کمیٹی نے کہا ہے کہ چوہدری نثارایم کیوایم پر تنقیدسے پہلے فوج اورحساس اداروں اوران کے سربراہوں کے بارے میں خود اپنے اورمسلم لیگ ن کے دیگر رہنماؤں کے بیانات کویاد کریں ۔

    چوہدری نثارخود فوج اورحساس اداروں اور ان کے سربراہوں کوکڑی تنقید کا نشانہ بناچکے ہیں ان کے منہ سے فوج کے احترام کی باتیں زیب نہیں دیتیں۔

    وفاقی وزیر خواجہ آصف نے قومی اسمبلی میں فوج کے بارے میں جواشتعال انگیز تقریر کی اس پر چوہدری نثار کیوں خاموش رہے؟

    رابطہ کمیٹی نے وفاقی وزیرخواجہ آصف کے بیان پر تبصرہ کرتے ہوئے کہاکہ خواجہ آصف ایم کیوایم کوتنقیدکانشانہ بنانے سے پہلے فوج کے بارے میں اپنے بیان کویادکریں۔

  • عمران خان کو الطاف فوبیاہو گیا ہے، رابطہ کمیٹی

    عمران خان کو الطاف فوبیاہو گیا ہے، رابطہ کمیٹی

    کراچی: ایم کیوایم رابطہ کمیٹی نے کہا ہے کہ عمران خان کو الطاف فوبیاہو گیا ہے، وہ حقیقی دہشتگردوں کی دوسری شکل ہیں۔

    نائن زیرو پر چھاپےکے حوالے سے عمران خان کےبیان پر رد عمل میں رابطہ کمیٹی نے کہا ہے کہ تحریک انصاف کو ذہنی دیوالیہ پن کے شکار شخص سے چھٹکارہ حاصل کر لینا چاہیئے۔

    رابطہ کمیٹی نے کہا ہے کہ عمران خان نے خود پی ٹی وی اسٹیشن اور پارلیمنٹ ہائوس پر حملہ کرایا، عمران خان نے پولیس پارٹی پر حملہ کر کے گرفتار شدگان کوچھڑوایا اور انہیں بنی گالہ میں پناہ دی۔

    رابطہ کمیٹی کے مطابق پولیس افسران کو گولی مارنے اور پھانسی دینے کی دھمکیاں دینے والےعمران خان اسٹیبلشمنٹ کے کاندھے پر سوار ہو کر کراچی پر قبضے کا خواب دیکھ رہے ہیں۔

    عمران خان حقیقی دہشتگردوں کی دوسری شکل ہیں،رابطہ کمیٹی تحریک انصاف ذہنی دیوالیہ شخص سے چھٹکارہ پائے، رابطہ کمیٹی عمران خان نے ٹی وی اسٹیشن اور پارلیمنٹ پر حملہ کرایا۔

  • سید علی حسنین بخاری کے قاتل گرفتار کئے جائیں، متحدہ رابطہ کمیٹی

    سید علی حسنین بخاری کے قاتل گرفتار کئے جائیں، متحدہ رابطہ کمیٹی

    کراچی : متحدہ قومی موومنٹ کی رابطہ کمیٹی نے کورنگی نمبر ڈیڑھ میں مسلح دہشت گردوں کی فائرنگ سے ایم کیوایم لیگل ایڈ کمیٹی اور متحدہ لائرز فورم کے سینئر رکن سید علی حسنین بخاری ایڈووکیٹ ولد سید ستار شاہ بخاری کے بہیمانہ قتل کی سخت ترین الفاظ میں مذمت کی ہے ۔

    رابطہ کمیٹی نے کہا ہے کہ شہر میں ایم کیوایم کے عہدیداران ، کارکنان اور مختلف شعبہ ہائے زندگی سے تعلق رکھنے والے افراد کے سفاکانہ قتل کی وارداتیں معمول کا حصہ بن چکی ہیں۔

    ایک بیان میں رابطہ کمیٹی نے کہاکہ سید علی حسنین بخاری ایڈووکیٹ آج اپنی رہائشگاہ سے دفتر جانے کیلئے جیسے ہی گاڑی میں سوار ہوئے مسلح دہشت گردوں نے ان پر اندھا دھند فائرنگ کردی جس کے نتیجے میں وہ موقع پر ہی شہید ہوگئے ۔

    رابطہ کمیٹی نے کہاکہ سید علی حسنین بخاری ایڈووکیٹ کے دن دیہاڑے سفاکانہ قتل سے وکلاء برادری سمیت تمام شعبہ ہائے زندگی سے تعلق رکھنے والے افراد میں گہری تشویش پائی جارہی ہے اور وہ بھی اپنی جان و مال کے عدم تحفظ کے احساس میں مبتلا ہوگئے ہیں ۔

    رابطہ کمیٹی نے مزید کہاکہ یہ امر بھی باعث تشویش ہے کہ سید علی حسنین بخاری ایڈووکیٹ شہید ایم کیوایم کے لاپتہ کارکنان کے کیسوں کی پیروی کررہے تھے اور ان کا بہیمانہ قتل گہری سازش ہے ۔

    رابطہ کمیٹی نے سید علی حسنین بخاری ایڈووکیٹ شہید کے تمام سوگوار لواحقین سے دلی تعزیت وہمدردی کااظہا رکرتے ہوئے انہیں صبر کی تلقین کی اور دعا کی کہ اللہ تعالیٰ شہید کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے۔

    رابطہ کمیٹی نے وزیراعظم نواز شریف ، وفاقی وزیرد اخلہ چوہدری نثار علی خان ، گورنر سندھ ڈاکٹر عشرت العباد اور وزیراعلیٰ سندھ سید قائم علی شاہ سے مطالبہ کیا کہ ایم کیوایم لیگل ایڈ کمیٹی اور متحدہ لائرز فورم کے سینئر کے رکن سید علی حسنین بخاری ایڈووکیٹ کے بہیمانہ قتل میں ملوث دہشت گردوں کو فی الفور گرفتارکیاجائے اور انہیں قرار واقعی سزا دی جائے ۔