Tag: متحدہ قومی موومنٹ
-
کراچی : یونیورسٹی روڈ پر کریکر حملہ ، ایم کیوایم کے بلدیاتی امیدوار جاں بحق
کراچی میں یونیورسٹی روڈ پر کریکر حملے میں متحدہ قومی موومنٹ کے بلدیاتی امیدوار وجاہت حسین جاں بحق ہوگئے جبکہ انکا ڈرائیور زخمی ہوگیا۔
یونیورسٹی روڈ پر جامعہ کراچی کے مرکزی گیٹ کے قریب نامعلوم موٹر سائیکل سواروں نے گاڑی پر کریکر حملہ کیا جس کے نتیجے میں ایم کیو ایم کے بلدیاتی امیدوار وجاہت حسین نقوی جاں بحق ہوگئے جبکہ انکا ڈرائیور اللہ وسایو زخمی ہوگیا۔ جاں بحق اور زخمی شخص کو اسٹیڈیم روڈ پر واقع نجی اسپتال منتقل کیا گیا۔
پولیس کے مطابق مقتول وجاہت حسین نجی بینک کے عہدیدار تھے اور معروف عالم دین علامہ طالب جوہری کے سیکریٹری کے فرائض بھی انجام دے رہے تھے۔ ترجمان ایم کیو ایم کا کہنا ہے کہ مقتول وجاہت حسین نقوی ایم کیو ایم کی جانب سے رضویہ 2 سے یوسی ناظم کے لئے امیدوار تھے۔
ایم کیو ایم کے رہنما حیدر عباس رضوی کا کہنا ہے کہ ایم کیو ایم کے ایک اور بلدیاتی امیدوار کو شہید کردیا گیا ہے، اعلٰی حکام ذمہ داروں کے خلاف کارروائی کو یقینی بنائیں۔ پولیس نے واقعے میں زخمی ہونے والے ڈرائیور کا ابتدائی بیان ریکارڈ کرلیا ہے، ابتدائی بیان میں ڈرائیور نے بتایا کہ موٹر سائیکل سوار ملزمان نے گاڑی کی چھت پر کریکر پھینکا جس کے بعد زور دار دھماکہ ہوا۔
-
طالبان سے مذاکرات کرنے ہیں یا نہیں فیصلہ جلد کیا جائے، الطاف حسین
متحدہ قومی موومنٹ کے قائد الطاف حسین نے بنوں میں سیکورٹی فورسز کے قافلے پرحملے کی شدید الفاظ میں مذمت کی ہے۔ الطاف حسین نے اپنے ایک بیان میں کہاکہ بنوں دھماکے کی ذمہ داری طالبان نے قبول کرلی ہے۔
وزیراعظم اور سربراہان سر جوڑ کر بیٹھیں اور لائحہ عمل تشکیل دیں۔ الطاف حسین نے کہا کہ طالبان سے مذاکرات کرنے ہیں یا کوئی اور فیصلہ کرنا ہے اس میں جتنی تاخیر کی جائے گی اتنا ہی فوجیوں کے ساتھ ساتھ عام شہریوں کا نقصان ہوگااور حملوں میں اضافہ بھی ہوسکتا ہے۔
الطاف حسین نے بم دھماکے میں شہید و زخمی ہونے والے سیکورٹی اہلکاروں اور شہریوں کے سوگوار لواحقین سے دلی تعزیت وہمدردی کااظہارکیا اور شہداء کے بلند درجات اور زخمیوں کی جلد ومکمل صحت یابی کیلئے دعا کی ۔
-
ایم کیوایم کے وفد کی اے آر وائی گروپ کے چیئرمین حاجی عبدالرزاق کی عیادت
متحدہ قومی موومنٹ کے ایک وفد نے ہفتہ کی صبح لندن کے مقامی اسپتال میں اے آر وائی گروپ کے چیئرمین حاجی عبدالرزاق کی عیادت کی ۔
ایم کیو ایم کے وفد میں رابطہ کمیٹی کے ڈپٹی کنوینر ندیم نصرت، اراکین رابطہ کمیٹی ڈاکٹر فاروق ستار، بابر غوری ، عادل صدیقی اور حق پرست رکن سندھ اسمبلی روٴف صدیقی شامل تھے ۔ وفد کے اراکین نے قائد تحریک جناب الطاف حسین کی جانب سے حاجی عبدالرزاق کی خیریت دریافت کی ،گلدستہ پیش کیا اور ان کیلئے دعائے صحت کی۔
اس موقع پر حاجی عبدالرزاق کی صاحبزادی شبانہ بھی موجود تھیں جنہوں نے ایم کیوایم کے وفدکی آمد اور ایم کیو ایم کےقائد الطاف حسین کی جانب سے حاجی عبدالرزاق کیلئے دعائے صحت کی اپیل پر اپنی اور اپنے اہل خانہ کی جانب سے شکریہ ادا کیا۔ واضح رہے کہ حاجی عبدالرزاق طویل عرصے سے علیل ہیں اورلندن کے مقامی اسپتال کے انتہائی نگہداشت میں زیرعلاج ہیں۔
-
راجن پورمیں بم دھما کہ کا نوٹس لیا جائے، ایم کیوایم رابطہ کمیٹی
متحدہ قومی موومنٹ کی رابطہ کمیٹی نے راجن پور میں خوشحال خان خٹک ایکسپریس کے قریب بم دھماکے کی سخت ترین الفاظ میں مذمت کی ہے اور دھماکے کے نتیجے میں متعدد افراد کے جاں بحق و زخمی ہونے پر گہرے دکھ اور افسوس ااظہار کیا ہے۔
ایک بیان میں رابطہ کمیٹی نے کہاکہ کہ دہشت گردی اور بم دھماکوں کے ذریعے معصوم عوام کو خاک و خون میں نہلایاجارہا ہے اور جو سفاک دہشت گرد معصوم و بے گناہ لوگوں کی جان و مال سے کھیل رہے ہیں وہ ملک و قوم کے کھلے دشمن ہیں ۔ انہوں نے بم دھماکے میں شہیدہونے والے افراد کے سوگوار لواحقین سے دلی تعزیت وہمدردی کااظہار کرتے ہوئے دعا کی کہ اللہ تعالیٰ شہداء کو جنت الفردو س میں اعلیٰ مقام عطا فرمائے۔
لواحقین کو صبرجمیل عطا کرے اور زخمیوں کو جلد ومکمل صحت یابی عطا فرمائے، رابطہ کمیٹی نے صدر مملکت ممنو ن حسین، وزیر اعظم میاں نواز شریف اور وفاق وزیر داخلہ چورہدی نثار علی خان سے مطالبہ کیا ہے کہ وہ راجن پور میں خوشحال خان خٹک ایکسپریس کے قریب بم دھما کہ کا نوٹس لیا جائے، اس میں ملوث دہشت گردوںکے گرفتار کرکے قرار واقعی سزا دی جائے۔
-
ایم کیو ایم اور آل پاکستان مسلم لیگ کی جانب سے پرویز مشرف کے حق میں مظاہرہ
آل پاکستان مسلم لیگ اور متحدہ قومی موومنٹ کے کارکن پرویز مشرف کے حق میں میدان میں آ گئے کہتے ہیں فوج کا سپہ سالار غدار نہیں ہو سکتا، مقدمات انتقامی کاروائی کا نتیجہ ہیں۔
اسلام آباد پریس کلب کے سامنے متحدہ قومی موومنٹ اور آل پاکستان مسلم لیگ کی جانب سے پرویز مشرف کے حق میں مظاہرہ کیا گیا، حامیوں نے نعرہ بازی کرتے ہوئے کہا کہ پرویز مشرف کو انتقامی کاروائی کا نشانہ بنایا جا رہا ہے، وہ انٹر پول کے ذریعے نہیں بلکہ خود اپنی مرضی سے پاکستان آئے تھے پہلے تاحیات نا اہل قرار دیا گیا بعد میں ضمانتیں منسوخ کر کے سیاسی مقدمات بنائے گئے
پرویز مشرف کے وکیل احمد رضا قصوری نے کہا ہے کہ پرویز مشرف ٹرائل حکومت کے گلے میں ہڈی بن چکا ہے اور مارچ کے اختتام تک نواز حکومت ختم ہوتی ہوئی نظر آ رہی ہے ،پرویز مشرف کی عدالت پیشی ڈاکٹروں کی اجازت سے منسوب ہو گی۔
ایم کیو ایم کے رکن رابطہ کمیٹی میاں عتیق نے کہا کہ الطاف حسین کو یقین ہے کہ پرویز مشرف سچے انسان ہیں جبکہ الطاف حسین نے پرویز مشرف کے حق میں احتجاج کا دائرہ وسیع کرنے کی ہدائیت بھی کر دی ہے۔
-
الطاف حسین کی امیر مقام کے قافلے پر حملے کی سخت الفاظ میں مذمت
متحدہ قومی موومنٹ کے قائد الطاف حسین نے مسلم لیگ (ن) کے رہنما امیر مقام کے قافلے پر حملے کی سخت ترین الفاظ میں مذمت کی ہے۔
الطاف حسین نے کہاکہ دہشتگرد ملکی سالمیت کے درپے ہیں اور مسلح افواج ، سیکورٹی فورسز اور عوام کوکھلی دہشت گردی کا نشانہ بنا رہے ہیں ایسی سنگین صورتحال تمام سیاسی ومذہبی جماعتوں اور ان کے رہنماؤں کو متحد و منظم ہوکر دہشت گردی کے خلاف نبرد آزما ہونے کا عندیہ دے رہی ہے ۔
انہو ں نے بم دھماکوں میں شہید پولیس اہلکاروں کے سوگوار لواحقین سے دلی تعزیت وہمدردی کااظہارکیا۔ا لطاف حسین نے صدر مملکت ممنون حسین ، وزیراعظم نواز شریف اور وفاقی وزیر داخلہ چوہدری نثار علی خان سے مطالبہ کیا کہ مسلم لیگ ن کے رہنما امیر مقام کے قافلے پر بم دھماکوں کا سختی سے نوٹس لیاجائے اور اس میں ملوث سفاک دہشت گردوں کو گرفتار کرکے قرار واقعی سزا دی جائے ۔
-
بہادر پولیس افسران کوبلٹ پروف گاڑیاں دی جائیں،الطاف حسین
الطاف حسین نے سندھ حکومت سے اپیل کی ہے کہ بہادر پولیس افسران سمیت تمام پولیس کے محکمہ کے جوانوں اور افسران کو جدید ترین اسلحہ، کمیونیکیشن کے آلات اور بلٹ پروف گاڑیاں فی الفور فراہم کی جائیں اور تنخواہوں میں اضافہ کیا جائے۔
متحدہ قومی موومنٹ کے قائد الطاف حسین نے ایک مرتبہ پھر فولادی اعصاب رکھنے والے اور انتہائی جری اور بہادر پولیس آفیسر چوہدری اسلم کی سفاکانہ قتل کی شدید الفاظ میں مذمت کی ہے۔
الطاف حسین نے پرزور مطالبہ کیا کہ جن پولیس افسران کو عدالت کے فیصلے کے تحت تنزلی کی گئی تھی، دوبارہ ان کو نہ صرف عہدوں پر بحال کردیا جائے بلکہ ان کو مزید ترقی دی جائے۔
الطاف حسن نے کہا کہ عدالتی حکم کے تحت تنزلی کے شکار ان افسران نے تنزلی کے باوجود اپنے فرائض ادا کرنے میں کوئی کسر نہیں چھوڑی اور سیکڑوں پولیس افسران نے دہشت گردوں سے مقابلہ کرتے ہوئے اپنی جانوں کا نذرانہ پیش کیا۔
الطاف حسین نے حکومت سندھ سے یہ بھی مطالبہ کیا کہ پولیس افسران اور جوانوں کی تنخواہوں میں پچاس فیصد اضافہ کیا جائے۔
-
کراچی کے خراب حالات کیخلاف ایم کیو ایم کا سینیٹ سے واک آئوٹ
متحدہ قومی موومنٹ نے کراچی میں امن وامان کی خراب صورتحال پر سینیٹ سے واک آؤٹ کیا، سینیٹر طاہر مشہدی کا کہنا تھا کہ کراچی شہر رہنے کے قابل نہیں رہا۔
متحدہ قومی موومنٹ کے ارکان نے کراچی کے خراب حالات کے خلاف سینیٹ سے واک آؤٹ کیا, کراچی کے حالات پر اظہار خیال کرتے ہوئے سینیٹر طاہر مشہدی نے کہا کہ کراچی میں حالات بدتر ہوتے جارہے ہیں، ایم کیو ایم کے 150 ڈیڑھ سو سے زائد کارکن جاں بحق ہوچکے ہیں۔
انہوں نے کہا کہ کالعدم تنظیموں اور دہشت گردوں کے خلاف کوئی آپریشن نہیں کیا جارہا ہے، بدامنی اور لاقانونیت کے باعث کراچی شہر رہنے کے قابل ہی نہیں رہا، طاہر حسین مشہدی کے خطاب کے بعد ایم کیو ایم کے ارکان ایوان سے باہر چلے گئے۔
