کراچی : متحدہ قومی موومنٹ کی رابطہ کمیٹی نے کہا ہے کہ رینجرز کی جانب سے ایم کیو ایم رابطہ کمیٹی کے رکن اظہار احمد خان کو بلاجواز اور غیر قانونی طور پر گرفتار کیا گیا جس کی سخت الفاظ میں مذمت کرتے ہیں اور مطالبہ کرتے ہیں کہ اظہار احمد خان کو فی الفور رہا کیا جائے۔
متحدہ قومی موومنٹ کے جاری کردہ اعلامیے میں رابطہ کمیٹی نے کہاکہ آج سہ پہر اظہاراحمد خان، رابطہ کمیٹی کے رکن اور حق پرست رکن سندھ اسمبلی عبدالحسیب کی عیادت کےلیے ان کی رہائش گاہ واقع فیڈرل بی ایریا بلاک 6 گئے جہاں پاکستانی وقت کے مطابق تقریباًساڑھے تین بجے ایک گاڑی میں سوار رینجرز کے اہلکار،عبدالحسیب کی رہائش گاہ پہنچے اور انہوں نے اظہاراحمد خان کو گھرسے باہر بلاکر گرفتارکرکے نامعلوم مقام پر روانہ ہوگئے اور تاحال کوئی تفصیلات مہیا کی گئیں۔
رابطہ کمیٹی نے مزید کہا کہ اظہار احمد بلڈ پریشر اور دل کے عارضے میں مبتلا ہیں اور باقاعدگی سے ادویات استعمال کرتے ہیں، ایم کیو ایم نے خدشہ ظاہر کیا کہ بلاجواز گرفتاری سے اظہار احمد کی زندگی کو سنگین خدشات لاحق ہیں۔
ترجمان ایم کیو ایم نے کہا کہ ’’ایک منظم سازش کے تحت ایم کیو ایم کو ختم کرنے کے منصوبے پر عمل کیا جارہا ہے ، متحدہ قومی موومنٹ کے منتخب نمائندوں، ذمہ داران اور کارکنان کو غیرقانونی طور پر گرفتار کر کے لاپتا کردیا جاتا ہے اور انہیں مخصوص ٹولے میں شامل کرنے کے لیے دباؤ ڈالا جارہا ہے۔
رابطہ کمیٹی نے خدشہ ظاہر کیا کہ ’’اظہار احمد خان کی گرفتاری بھی اسی سازش منصوبے کا حصہ ہے، کراچی میں تین سال سے جاری آپریشن میں ایم کیو ایم کے 61 کارکنان کو ماورائے عدالت قتل کیا جاچکا ہے جبکہ 135 کارکنان تاحال لاپتا ہیں، ماورائے عدالت قتل میں ملوث افراد کے خلاف کسی قسم کی کوئی کارروائی نہیں کی جارہی تاہم کارکنوں کی بلاجواز گرفتاریوں کا سلسلہ تیز کرکے کارکنان کے خلاف جھوٹے مقدمات بنانے کا سلسلہ جاری ہے۔
اراکین رابطہ کمیٹی نے کہا کہ ’’بلاجواز گرفتاریوں، گمشدگیوں اور ماورائے عدالت قتل انسانی حقوق کی سنگین خلاف ورزی ہے ، جس کی وجہ سے جمہوریت پسند مہاجروں میں شدید غم و غصہ پایا جاتا ہے۔
رابطہ کمیٹی نے صدر مملکت ممنون حسین، وزیراعظم نوازشریف، چیف آف آرمی اسٹاف جنرل راحیل شریف،وفاقی وزیرداخلہ چوہدری نثارعلی خان اور وزیراعلیٰ سندھ قائم علی شاہ سے مطالبہ کیاکہ اظہاراحمد خان کی غیرقانونی گرفتاری کا فوری نوٹس لیاجائے ، انہیں جلدرہا کرایا جائے اور ایم کیو ایم کے خلاف ریاستی طاقت کے ناجائز استعمال کا مذموم سلسلہ بند کرایا جائے ۔
ایم کیو ایم نے انسانی حقوق کی ملکی اور بین الاقوامی تنظیموں سے بھی اپیل کی کہ وہ اظہاراحمد خان سمیت ایم کیوایم کے تمام رہنماؤں اورکارکنوں کی غیرقانونی گرفتاریوں کا نوٹس لیں اورپاکستان میں بسنے والے کروڑوں مہاجروں کے بنیادی انسانی حقوق کی خلاف ورزیوں کے خلاف پیش آنے والے مظالم پر صدائے احتجاج بلند کریں۔
