کراچی: یومِ عاشورتک مجالس اورجلوسوں کے لئے سیکیورٹی پلان جاری کردیا گیا ہے، چودہ ہزارسیکیورٹی اہلکار تعینات کئے جائیں گے۔
کراچی میں عشرہ محرم کے جلوسوں اورمجالس کے لئے پولیس نے سیکیورٹی پلان جاری کردیا ہے، سیکیورٹی پلان کے مطابق یومِ عاشور تک شہر بھرمیں چھ سو ایک چھوٹے بڑے جلوس نکالے جائیں گے ، ان میں تین سو اٹہتر کو حساس اور ایک سوچھیالیس کو انتہائی حساس قراردیا گیا ہے۔
پانچ ہزارتین سو پچانوے مجالس میں سے دوہزارپانچ سو چھ کو حساس اور نو سو چھیانوے کو انتہائی حساس قرار دیا گیا ہے۔
پولیس حکام کا کہنا ہے کہ حساس اور انتہائی حساس مقامات پر سیکیورٹی انتظامات فول پروف بنانے کے لئے گیارہ ہزار سے زائد پولیس اہلکار تعینات کئے جائیں گے جبکہ شہر بھر میں مجموعی طور پر چودہ ہزار پولیس اہلکار سیکیورٹی کے فرائض انجام دیں گے۔
