لاہور: زینب کے والد حاجی امین کا کہنا ہے کہ مطمئن ہوں، اپنے سامنے مجرم عمران کاعبرت ناک انجام دیکھا۔
تفصیلات کے مطابق لاہور میں میڈیا سے گفتگو کرتے ہوئے زینب کے والد نے کہا کہ مجرم عمران کی پھانسی نشان عبرت ہے، ایسے جرائم کے خاتمے کے لیےسرعام پھانسی ہونی چاہیے۔
حاجی امین نے کہا کہ ہم نے مجرم عمران کی سرعام پھانسی کا مطالبہ کیا تھا، سرعام پھانسی نہیں دینی تواس قانون کو ہی ختم کیا جائے۔
انہوں نے کہا کہ مطمئن ہوں، اپنے سامنے مجرم کاعبرت ناک انجام دیکھا، ایسا جرم کوئی بھی کرے گا اس کا یہی حشرہوگا۔
زینب کے والد نے کہا کہ میڈیا نے والدین اوربچوں میں شعورپیدا کرنے کے لیے بہت کام کیا۔
دوسری جانب زینب کی والدہ نے اے آروائی نیوز سے گفتگو کرتے ہوئے کہا کہ بیٹی کے قاتل کی پھانسی سے مطمئن ہوں، جیسے جیسے وقت گزررہا ہے زینب اوریاد آرہی ہے۔
قصور کی ننھی زینب کا قاتل عبرتناک انجام کو پہنچا، مجرم عمران علی کو پھانسی دے دی گئی
واضح رہے کہ قصور کی ننھی زینب کا قاتل اپنے عبرتناک انجام کو پہنچ گیا، مجرم عمران علی کو کوٹ لکھپت جیل میں پھانسی دے دی گئی۔
مجرم عمران کو پھانسی دیے جانے کے وقت جیل کے اطراف سیکیورٹی ہائی الرٹ رہی۔
