اسرائیل کی جارحیت سے دنیا عاجز اور اس سے نفرت کا اظہار کرتی رہتی ہے ایک شخص نے اسرائیلی وزیراعظم کا مجسمہ توڑ ڈالا۔
اسرائیل کی مظلوم فلسطینی مسلمانوں کی نسل کشی کے خلاف دنیا بھر میں آواز اٹھائی جا رہی ہے اور اس کے جارحانہ اقدامات پر مختلف طبقات اپنی نفرت کا اظہار بھی کر رہے ہیں۔
ایسا ہی ایک واقعہ میکسیکو میں پیش آیا ہے جہاں دارالحکومت میکسیکو سٹی کے ایک میوزیم میں رکھا گیا اسرائیلی وزیراعظم نیتین یاہو کا مجسمہ ایک شخص نے ہتھوڑی مار کر توڑ ڈالا جس کی ویڈیو سوشل میڈیا پر بھی تیزی سے وائرل ہو رہی ہے۔
ویڈیو میں دیکھا جا سکتا ہے کہ ایک نقاب پوش فلسطینی پرچم لیے میوزیم میں آتا ہے اور پہلے نیتن یاہو کے مجسمے پر سرخ رنگ پھینکتا ہے۔ اس کے بعد ہتھوڑی سے اس کے چہرے کو بگاڑتا ہے اور آخری میں اسے زمین بوس کر دیتا ہے۔
مذکورہ شخص کیمرے کے سامنے فلسطین زندہ باد، سوڈان زندہ باد اور یمن زندہ باد کے نعرے لگاتا اور اس کے بعد وہاں سے چلا جاتا ہے۔
اسرائیلی میڈیا کے مطابق فلسطینیوں کے حقوق کے لیے آواز بلند کرنے والی میکسیکو کی ایک غیر سرکاری تنظیم کی جانب سے سوشل میڈیا پوسٹ میں ایک کارکن نے نیتن یاہو کے مجسمے کو توڑنے اور گرانے کی ذمہ داری قبول کرتے ہوئے کہا ہے کہ میوزیم مجسمے کو 40 ہزار سے زائد فلسطینیوں کے خون سے نہیں چھپا سکا۔
سوشل میڈیا پر اس وائرل ویڈیو پر دنیا بھر سے تبصرے جاری ہیں اور اکثر اسرائیلی اقدامات کی مذمت کر رہے ہیں۔
