ARYNews.tv | Urdu – Har Lamha Bakhabar

Tag: محمد حفیظ

  • پاکستان کے لیے ٹی ٹوینٹی ورلڈکپ کھیلنا چاہتا ہوں، محمد حفیظ

    پاکستان کے لیے ٹی ٹوینٹی ورلڈکپ کھیلنا چاہتا ہوں، محمد حفیظ

    لاہور: معروف پاکستانی آل راؤنڈ محمد حفیظ کا کہنا ہے کہ پاکستان کے لیے ٹی ٹوینٹی ورلڈکپ کھیلنا چاہتا ہوں، جب وقت آئے گا قومی ٹیم سے اچھے اندازمیں ریٹائرمنٹ لینا چاہوں گا۔

    تفصیلات کے مطابق قومی ٹیم کے آل راؤنڈر محمد حفیظ نے میڈیا سے گفتگو کرتے ہوئے کہا کہ 17 سال سے پاکستان کے لیے بیٹسمین کے طور پر ہی کھیلا ہوں، بولنگ میرا پلس پوائنٹ ہے، مس کروں گا۔

    محمد حفیظ کا کہنا تھا کہ پاکستان کے لیے ٹی ٹوینٹی ورلڈکپ کھیلنا چاہتا ہوں، جب وقت آئے گا قومی ٹیم سے اچھے اندازمیں ریٹائرمنٹ لینا چاہوں گا۔

    قومی ٹیم کے سینئر کھلاڑی کا کہنا تھا کہ سلیکشن نے مجھ پر اعتماد کیا، کوشش ہے پرفارمنس سے ٹیم کو جیتاؤں، میرے لیے سب سے ضروری میری پرفارمنس ہے جو جیت میں کام آئے، ہوم کراؤڈ کے سامنے پرفارم کرنے کا الگ مزا ہے۔

    قومی کرکٹر نے کہا کہ بابراعظم بہترین کھلاڑی ہے، امید ہے لانگ ٹرم کپتانی کریں، جیت کسی بھی کھلاڑی اور کپتان کو اعتما د دیتی ہے، کپتان مشورہ مانگے گا تو دوں گا۔

    محمد حفیظ کا کہنا تھا کہ ملک میں عالمی کرکٹ واپس لانے پر پی سی بی کو مبارکباد دیتا ہوں، ٹی ٹوینٹی میں نمبر ون ہیں، سیریز جیت کر وننگ ٹریک پر آنا ہے۔

  • سوشل میڈیا پر شدید تنقید، محمد حفیظ کا ردعمل سامنے آگیا

    سوشل میڈیا پر شدید تنقید، محمد حفیظ کا ردعمل سامنے آگیا

    لاہور: قومی کرکٹ ٹیم کے سینئر کھلاڑی اور سابق کپتان محمد حفیظ نے سوشل میڈیا پر تنقید کا جواب دیتے ہوئے کہا کہ میرے ٹوئٹ کو سیاق وسباق سے ہٹ کر سمجھا گیا۔

    تفصیلات کے مطابق قومی کرکٹر محمد حفیظ نے گزشتہ روز سماجی رابطے کی ویب سائٹ ٹوئٹر پر نواز شریف کی طبیعت سے متعلق ٹوئٹ کیا اور ملک میں علاج ومعالجے کی صورت حال پر تحفظات کا اظہار کیا تھا جس کے ردعمل میں سوشل میڈیا صارفین نے کرکٹر پر لفظی گولہ باری شروع کردی۔

    محمد حفیظ نے ایک ویڈیو کے ذریعے ٹوئٹ کی وضاحت کی، ان کا کہنا تھا کہ میرے ٹوئٹ کو سیاق و سباق سے ہٹ کر سمجھا گیا، میرا کسی سیاسی جماعت سے تعلق نہیں ہے، تنقید کی وجہ یہی ہوسکتی ہے کہ یہاں لٹریسی ریٹ کم ہے، اختلاف رائے کا احترام کرنا چاہیئے۔

    انہوں نے کہا کہ میرے ٹوئٹ کا غلط مطلب لیا گیا جسے ٹوئٹ سمجھ نہ آیا وہ دوبارہ پڑھیں، نوازشریف کی صحت یابی کے لیے دعاگو ہوں، امید ہے نوازشریف صحت یاب ہوکر دوبارہ پاکستان آئیں گے۔

    ان کا مزید کہنا تھا کہ ملک میں علاج معالجے کی مناسب سہولیات میسر نہیں ہے، میرا سوال ہے کیا 20 کروڑ پاکستانی بھی محفوظ نہیں؟ امید کرتا ہوں میرے سوال کے بعد طبی سہولتوں کو بہتر کیا جائے گا۔

  • اثاثے ظاہر نہ کرنے کی خبریں بے بنیاد ہیں: محمدحفیظ

    اثاثے ظاہر نہ کرنے کی خبریں بے بنیاد ہیں: محمدحفیظ

    لاہور: قومی کرکٹر محمد حفیظ نے کہا ہے کہ اثاثے ظاہر نہ کرنے کی خبریں بے بنیاد اور جھوٹی ہیں۔

    تفصیلات کے مطابق گزشتہ روز ذرائع نے کہا تھا کہ فیڈرل بورڈ آف ریونیو (ایف بی آر) نے قومی کرکٹر محمد حفیظ کو اثاثے چھپانے پر شوکاز نوٹس جاری کردیا ہے، تاہم کرکٹر نے خبر من گھڑت قرار دے دی۔

    سماجی رابطے کی ویب سائٹ ٹوئٹر پر جاری اپنے ایک بیان میں محمد حفیظ کا کہنا ہے کہ اثاثے ظاہرنہ کرنے کی خبروں کا حقیقت سے کوئی تعلق نہیں ہے۔

    انہوں نے کہا کہ پاکستان کے کسی ادارے کی جانب سے نوٹس موصول نہیں ہوا، میں ملک میں ٹیکس ادا کرتا ہوں۔ قومی کرکٹر کا کہنا تھا کہ جب سے کھیلنا شروع کیا ہر سال اپنے ٹیکس ریٹرنز جمع کراتا ہوں، مکمل طور پر حکومت پاکستان کا ٹیکس دہندہ ہوں۔

    یاد رہے کہ گزشتہ روز ذرائع کا کہنا تھا کہ قومی ٹیم کے سابق کپتان محمد حفیظ نے 17 کروڑ روپے مالیت کے اثاثے ظاہر نہیں کیے ہیں۔

    ایف بی آر نے محمد حفیظ کو شوکاز نوٹس جاری کردیا

    ایف بی آر نے محمد حفیظ کی تمام بینکوں سے تفصیلات طلب کرلی ہیں، محمد حفیظ کا 2014 سے 2018 تک کا آڈٹ کیا جارہا ہے۔دوسری جانب کرکٹر محمد حفیظ نے کہا تھا کہ انہیں ایف بی آر کے نوٹس کا علم نہیں ہے، خبر بے بنیاد ہے۔

  • نیا ڈومیسٹک اسٹرکچر، محمد حفیظ کی پی سی بی پر شدید تنقید

    نیا ڈومیسٹک اسٹرکچر، محمد حفیظ کی پی سی بی پر شدید تنقید

    کراچی: پاکستان کرکٹ بورڈ کے نئے ڈومیسٹک اسٹرکچر پر آل راؤنڈر محمد حفیظ نے شدید تنقید کرتے ہوئے کہا ہے کہ کرکٹ میں آنے والی بیروزگاری کی ذمہ داری کون لے گا۔

    تفصیلات کے مطابق قومی کرکٹ ٹیم کے آل راؤنڈر محمد حفیظ نے نئے ڈومیسٹک اسٹرکچر پر تنقید کرتے ہوئے کہا ہے کہ نئے ڈومیسٹک اسٹرکچر صرف 200 کھلاڑیوں کا خیال رکھ رہا ہے اور 1000 کے قریب کھلاڑی اور مینجمنٹ اسٹاف اس نئے فارمیٹ کی وجہ سے بیروزگار ہوگئے ہیں۔

    واضح رہے کہ سماجی رابطے کی ویب سائٹ ٹویٹر پر ویڈیو وائرل ہوئی ہے جس پر محمد حفیظ نے ردعمل دیا۔

    ویڈیو میں ڈومیسٹک کرکٹر فضل سبحان کا کہنا تھا کہ ڈیپارٹمنٹ کرکٹ بند ہونے کی وجہ سے بھاڑے کی سوزوکی چلانے پر مجبور ہیں۔

    فضل سبحان انڈر 19، پاکستان اے، 42 فرسٹ کلاس میں پاکستان کی نمائندگی کرچکے ہیں، فضل سبحان کا کہنا تھا کہ ہم نے کرکٹ کھیلنے کے لیے بہت محنت کی، ڈیپارٹمنٹ کرکٹ بند ہونے سے بہت مشکل حالات ہیں، پہلے لاکھ روپے مل جاتے تھے اب 30 سے 35 ہزار میں سوزوکی چلا کر گزار کررہا ہوں۔

    ڈومیسٹک کرکٹر فضل کا کہنا تھا کہ اور بھی بہت سے لڑکے ایسے ہیں جو بائیک چلا رہے ہیں، کمپنی میں دھکے کھار ہے ہیں، کھلاڑیوں کی مجبوری ہے گھر چلانے کے لیے یہ سب کرنا پڑے گا۔

    یاد رہے کہ پی سی بی کی جانب سے نیا ڈومیسٹک اسٹرکچرمتعارف کرایا گیا تھا جس میں صرف 6 ریجن سے ٹیموں کا انتخاب کیا گیا تھا۔

    خیال رہے کہ نئے ڈومیسٹک اسٹرکچر پر سابق کھلاڑیوں نے بھی تنقید کی تھی، جاوید میانداد کا کہنا تھا کہ ہم ڈومیسٹک کرکٹ کھیل کر بنے ہیں، ڈومیسٹک کرکٹ بند ہونے سے آپ لوگوں سے روزگار چھین رہے ہیں۔

  • پی سی بی کا نئے سینٹرل کنٹریکٹ میں کھلاڑیوں کی تعداد کم کرنے کا فیصلہ

    پی سی بی کا نئے سینٹرل کنٹریکٹ میں کھلاڑیوں کی تعداد کم کرنے کا فیصلہ

    لاہور: پاکستان کرکٹ بورڈ (پی سی بی) نے نئے سینٹرل کنٹریکٹ میں کھلاڑیوں کی تعداد کم کرنے کا فیصلہ کرلیا۔

    تفصیلات کے مطابق پی سی بی سینٹرل کنٹریکٹ کمیٹی کا پہلا اجلاس ہوا، جس کی صدارتی ایم ڈی وسیم خان نے کی، اجلاس میں نئے سینٹرل کنٹریکٹ میں کھلاڑیوں کی تعداد کم کرنے پراتفا ق کیا گیا۔

    ذرائع کے مطابق سینٹرل کنٹریکٹ کمیٹی نے کھلاڑیوں کی مراعات کا جائزہ لیا، محمد حفیظ، شعیب ملک کے سینٹرل کنٹریکٹ میں تنزلی کا فیصلہ کیا گیا ہے۔

    ذرائع کا کہنا ہے کہ کمیٹی حتمی فہرست سے قبل کھلاڑیوں کی کارکردگی کا جائزہ لے گی، کسی بھی سابق کپتان کی اے کیٹگری میں شمولیت کی شرط ختم کیے جانے کا امکان ہے۔

    پی سی بی سینٹرل کنٹریکٹ کمیٹی کے اجلاس میں یہ فیصلہ کیا گیا کہ چیف سلیکٹر کی تعیناتی کے بعد کمیٹی کھلاڑیوں ناموں پر مشاورت کرے گی۔

    مزید پڑھیں: مکی آرتھر کی کرکٹ بورڈ حکام سے ملاقاتیں، کارکردگی رپورٹ جمع کرادی

    پاکستان کرکٹ بورڈ کمیٹی کے اجلاس کے بعد سینٹرل کنٹریکٹ کمیٹی کا دورہ اجلاس ہوگا، تینوں فارمیٹس کی ٹیموں کے کپتانوں کو اے کیٹگری میں شامل کیا جائے گا۔

    یاد رہے کہ چند روز قبل قومی کرکٹ ٹیم کے ہیڈ کوچ نے پی سی بی حکام سے ملاقات کی تھی جس میں ایم ڈی پی سی بی وسیم خان، ڈائریکٹر انٹرنیشنل ذاکر خان ودیگر موجود تھے۔

    مکی آرتھر نے ورلڈ کپ، انگلینڈ سیریز پر رپورٹ ڈائریکٹر انٹرنیشنل کو جمع کرائی تھی، ہیڈ کوچ کی رپورٹ کرکٹ کمیٹی اجلاس میں زیر بحث آئے گی۔

    مکی آرتھر نے اپنی رپورٹ میں کہا تھا کہ بدقسمتی سے ورلڈ کپ کا آغاز اچھا نہیں کرسکے، پاکستان ٹیم نے آخری چار میچز میں اچھا کم بیک کیا۔

  • سرفراز کی کپتانی پر سب کو اعتماد ہے، ٹیم میں کوئی تفریق نہیں، محمد حفیظ

    سرفراز کی کپتانی پر سب کو اعتماد ہے، ٹیم میں کوئی تفریق نہیں، محمد حفیظ

    لندن: قومی ٹیم کے سینئر کھلاڑی محمد حفیظ نے کہا ہے کہ سرفراز احمد کی کپتانی پر سب کو اعتماد ہے، ٹیم میں کوئی تفریق نہیں ہے۔

    تفصیلات کے مطابق قومی ٹیم کے آل راؤنڈر محمد حفیظ نے میڈیا سے گفتگو کرتے ہوئے کہا کہ پتا ہے اچھا کھیل نہ دکھا سکے لیکن قوم سے ایسے ردعمل کی امید نہ تھی، میڈیا نے بھی ضرورت سے زیادہ تنقید کی۔

    انہوں نے کہا کہ ہم کھلاڑی ہیں ہار جیت زندگی کا حصہ ہے، پرعزم اور متحد ہیں آئندہ اچھی کارکردگی دکھائیں گے، جنوبی افریقہ سے آئندہ میچ میں اچھی کارکردگی دکھا کر کم بیک کریں گے۔

    محمد حفیظ نے کہا کہ ٹویٹس پڑھ کر فیصلے نہیں کیے جاتے، کنڈیشنز دیکھ کر کپتان اور مینجمنٹ نے ٹاس کا جو فیصلہ کیا وہ ٹھیک تھا۔

    انہوں نے کہا کہ آل راؤنڈر شعیب ملک کی حالیہ کارکردگی پر تنقید کریں مگر ان کے کیریئر کو تنقید کا نشانہ نہیں بنایا جائے۔

    مزید پڑھیں: سرفراز احمد میں اعتماد نظرنہیں آرہا، اس کی جارحانہ مزاجی کھو گئی ہے، نجم سیٹھی

    حفیظ نے اعتراف کیا کہ ہم نے میچ میں خراب بولنگ کی، شکست کی ذمہ داری کسی ایک پر نہیں ڈال سکتے، کوچز سمیت تمام افراد بری کارکردگی کے ذمہ دار ہیں۔

    انہوں نے کہا کہ پوائنٹس ٹیبل پر سب سے نیچے دیکھ کر دکھ ہورہا ہے، ماضی میں ہم اسی طرح گر کر اٹھے ہیں اور آئندہ میچز میں یہ ٹیم مختلف ہوگی۔

    واضح رہے کہ قومی ٹیم ورلڈ کپ میں صرف ایک میچ انگلینڈ کے خلاف جیت سکی ہے جبکہ ایک میچ بارش کی نذر ہوا، گرین شرٹس کو آسٹریلیا، بھارت اور ویسٹ انڈیز سے شکست ہوئی تھی۔

    خیال رہے کہ قومی ٹیم کو اپنا اگلا میچ جنوبی افریقہ کے خلاف 23 جون بروز اتوار کو کھیلنا ہے۔

  • پاکستان ٹیم کو اس جیت کی ضرورت تھی، سرفراز احمد

    پاکستان ٹیم کو اس جیت کی ضرورت تھی، سرفراز احمد

    ناٹنگھم: قومی کرکٹ ٹیم کے کپتان سرفراز احمد نے کہا ہے کہ پاکستان ٹیم کو اس جیت کی ضرورت تھی۔

    تفصیلات کے مطابق قومی کرکٹ ٹیم کے کپتان سرفراز احمد نے کہا ہے کہ انگلینڈ کے خلاف میچ میں فخر زمان اور امام الحق نے اچھا آغاز فراہم کیا، پاکستان ٹیم کو اس جیت کی ضرورت تھی۔

    سرفراز احمد نے کہا کہ انگلینڈ کے خلاف جیت سے مورال میں اضافہ ہوا ہے، مستقبل میں اچھی کارکردگی دکھائیں گے۔

    مین آف دی میچ آل راؤنڈر محمد حفیظ نے کہا کہ انگلینڈ میں شائقین بہت سپورٹ کرتے ہیں، انگلینڈ کے خلاف جیت میں پوری ٹیم نے اپنا حصہ ڈالا ہے۔

    مزید پڑھیں: ورلڈ کپ میں پاکستان کا شاندار کم بیک، انگلینڈ کو 14 رنز سے شکست

    سابق کھلاڑی ظہیر عباس نے کہا کہ ویسٹ انڈیز سے ہارنے کے بعد انگلینڈ سے بڑی فتح حاصل کی، انگلینڈ کے خلاف سرفراز احمد نے اچھی کپتانی کا مظاہرہ کیا۔

    واضح رہے کہ قومی ٹیم اپنا تیسرا میچ سری لنکا کے خلاف 7 جون کو کھیلے گی، سری لنکا کو نیوزی لینڈ نے 10 وکٹوں سے شکست دی تھی۔

    یاد رہے کہ قومی ٹیم نے انگلینڈ کو 14 رنز سے شکست دی ہے، اس سے قبل گرین شرٹس کو ویسٹ انڈیز نے 7 وکٹوں سے شکست دی تھی۔

    پاکستان نے ورلڈ کپ میں دو میچ کھیلے ہیں جس میں ایک میں کامیابی ہوئی اور ایک میں شکست کا سامنا کرنا پڑا، انگلینڈ نے بھی دو میچز کھیلے ہیں، پہلے میچ انگلینڈ نے جنوبی افریقہ کو 104 رنز سے شکست دی تھی۔

  • سری لنکا میں دہشت گردی پر قومی کرکٹرز بھی افسردہ

    سری لنکا میں دہشت گردی پر قومی کرکٹرز بھی افسردہ

    کراچی: سری لنکا میں ہونے والے خودکش دھماکوں کے نتیجے میں 200 سے زائد افراد کی ہلاکت پر قومی کرکٹرز بھی افسردہ ہیں۔

    تفصیلات کے مطابق سری لنکا میں ہونے والے خودکش دھماکوں پر قومی کرکٹرز بھی افسردہ ہیں، اسٹار کرکٹرز نے اپنے ٹویٹس میں واقعے کی مذمت کی ہے۔

    سری لنکا میں ہونے والی دہشت گردی پر قومی کرکٹ ٹیم کے کپتان سرفراز احمد نے لکھا کہ ٹریننگ سیشن سے واپس آیا تو مجھے اس سانحہ کا علم ہوا، ہماری دعائیں سری لنکن عوام کے ساتھ ہیں، اس مشکل وقت میں سری لنکن عوام کے غم میں برابر کے شریک ہیں۔


    وہاب ریاض نے سانحہ سری لنکا کی مذمت کرتے ہوئے کہا کہ ہماری دعائیں سری لنکن عوام کے ساتھ ہیں، اس مشکل گھڑی میں تمام پاکستانی سری لنکن عوام کے ساتھ ہیں۔


    محمد حفیظ نے کہا کہ سری لنکا میں ہونے والی دہشت گردی نے افسردہ کردیا، ہماری دعائیں سانحے میں اپنے پیاروں کو کھو دینے والوں کے ساتھ ہیں۔


    شاہد خان آفریدی نے سری لنکا میں ہونے والے خودکش دھماکوں کی مذمت کرتے ہوئے کہا کہ میری دعائیں سری لنکن بھائی بہنوں کے ساتھ ہیں، انسانیت اور اتحاد سے ہم مل کر دہشت گردی کو شکست دے سکتے ہیں۔


    واضح رہے کہ سری لنکا میں ایسٹر کے موقع پر 3 گرجا گھروں اور چار ہوٹلوں میں یکے بعد دیگرےآٹھ دھماکے ہوئے، جس کے نتیجے میں 200 سےزائدافراد ہلاک جبکہ سینکڑوں زخمی ہوگئے۔

    پولیس کے مطابق ہلاک ہونے والوں میں 35 غیر ملکی بھی شامل ہیں، جن میں امریکی، برطانوی اور نیدر لینڈز کے شہری شامل ہیں۔

    سری لنکن وزیراعظم نے ملک میں ہونے والے دھماکوں کی مذمت کرتے ہوئے اسے بزدلانہ اقدام قرار دے دیا۔

  • پاکستانی کرکٹ ٹیم کا انگلینڈ میں گرم جوشی سے خیر مقدم کریں گے، تھامس ڈریو

    پاکستانی کرکٹ ٹیم کا انگلینڈ میں گرم جوشی سے خیر مقدم کریں گے، تھامس ڈریو

    اسلام آباد: برطانوی ہائی کمشنر تھامس ڈریو نے کہا ہے کہ پاکستانی ٹیم ورلڈ کپ میں شرکت کے لیے انگلینڈ روانہ ہورہی ہے، پاکستانی کرکٹ ٹیم کا انگلینڈ میں گرم جوشی سے خیرمقدم کریں گے۔

    تفصیلات کے مطابق برطانوی ہائی کمشنر نے قومی کرکٹ ٹیم کے اعزاز میں استقبالیہ دیا، ورلڈ کپ کے لیے منتخب کرکٹ ٹیم کو استقبالیہ برطانوی ہائی کمیشن میں دیا گیا، قومی کرکٹ ٹیم کے کھلاڑیوں، احسان مانی، ٹیم مینجمنٹ اور پی سی بی اعلیٰ عہدیداران نے تقریب میں شرکت کی۔

    برطانوی ہائی کمشنر نے کہا کہ پاکستانی کرکٹ ٹیم کی میزبانی قابل فخر ہوگی، کرکٹ سے لگاؤ دونوں ملکوں کی مشترکہ دلچسپیوں میں سے ایک ہے۔

    تھامس ڈریو نے کہا کہ پاکستانی ٹیم کے ارکان کے لیے انگلینڈ میں بہترین وقت کا خواہش مند ہوں، گرین شرٹس کا انگلینڈ میں گرم جوشی سے خیرمقدم کریں گے۔

    قومی کرکٹ ٹیم کے آل راؤنڈر محمد حفیظ نے ٹیم کے لیے استقبالیہ دینے پر برطانوی ہائی کمیشن کا شکریہ ادا کیا، حفیظ نے ساتھ ہی ایک تصویر شیئر کی جس میں سرفراز احمد، بابر اعظم موجود ہیں اور بیک گراؤنڈ میں چیمپئنز ٹرافی کی جیت کی تصویر نمایاں ہے۔

    واضح رہے کہ قومی کرکٹ ٹیم دورہ انگلینڈ اور کرکٹ ورلڈ کپ 2019 میں شرکت کے لیے 23 اپریل کو انگلینڈ روانہ ہوگی۔

    مزید پڑھیں: وزیراعظم عمران خان سے قومی کرکٹ ٹیم کی ملاقات

    قبل ازیں قومی کرکٹ ٹیم کے کھلاڑیوں نے وزیراعظم عمران خان سے ملاقات کی تھی، جس میں پی سی بی حکام نے وزیراعظم کو ورلڈ کپ کی تیاریوں کے حوالے سے بریفنگ دی تھی۔

    وزیراعظم عمران خان نے قومی کرکٹ ٹیم کے کپتان سرفراز احمد کو مخاطب کرتے ہوئے کہا کہ جب کپتان دلیری کے ساتھ کھیلے گا تو ٹیم بھی دلیری کے ساتھ کھیلے گی۔

  • کرائسٹ چرچ دہشت گرد حملہ، کرکٹ ستارے بھی نمازیوں کی شہادت پر اشکبار

    کرائسٹ چرچ دہشت گرد حملہ، کرکٹ ستارے بھی نمازیوں کی شہادت پر اشکبار

    کراچی: نیوزی لینڈ کے شہر کرائسٹ چرچ میں ہونے والے حملے کے بعد دنیائے کرکٹ سے تعلق رکھنے والی شخصیات نے سوشل میڈیا پر ردعمل دیتے ہوئے مذمت کا اظہار کیا ہے۔

    سماجی رابطے کی ویب سائٹ ٹویٹر کھلاڑیوں نے کرائسٹ چرچ حملے کی مذمت کرتے ہوئے متاثرہ افراد کے ساتھ ہمدردی اور شہید ہونے والوں کے لیے دعائے مغفرت کی ہے۔

    شاہد آفریدی

    قومی کرکٹ ٹیم کے سابق کپتان شاہد خان آفریدی نے اپنے ٹویٹ کہا کہ انہوں نے بنگلہ دیشی کھلاڑی تمیم اقبال سے بات کی ہے تمیم کا کہنا تھا کہ بنگلہ دیش کی ٹیم بالکل محفوظ ہے۔

    اسٹار آل راؤنڈر نے متحد ہونے کا مشورہ دیتے ہوئے کہا کہ ایک دوسرے سے نفرت بند کی جائے، دہشت گردی کا کوئی مذہب نہیں ہوتا ہے، انہوں نے کرائسٹ چرچ حادثے میں جاں بحق ہونے والے مسلمانوں کے لیے دعائے مغفرت بھی کی۔

    کمار سنگاکارا

    سری لنکن کے سابق کپتان کمار سنگاکارا کا کہنا تھا کہ وہ اس واقعے میں اپنے پیاروں کو کھو دینے والے سے اظہار ہمدردی کرتے ہیں۔

    شعیب اختر

    سابق اسپیڈ اسٹار شعیب اختر نے ویڈیو پیغام میں کہا کہ شہید ہونے والوں کے ساتھ اظہار ہمدردی ہے، ان کا کہنا تھا کہ پاکستان بھی اس طرح کے کرب سے گزشتہ 20 سالوں کے دوران گزرا ہے۔

    محمد حفیظ

    قومی کرکٹ ٹیم کے آل راؤنڈر محمد حفیظ نے کہا کہ دہشت گرد حملے کا سن کر بہت افسوس ہوا، ہمدردیاں اور دعائیں شہید ہونے والوں کے اہل خانہ کے ساتھ ہیں۔

    ان کا کہنا تھا کہ دہشت گردی ایک عالمی مسئلہ ہے جس کا کوئی مذہب نہیں ہے، ہمیں دہشت گردی پر قابو پانے کے لیے متحد ہونا پڑے گا۔

    عثمان خواجہ

    پاکستانی نژاد آسٹریلوی اوپننگ بلے باز عثمان خواجہ نے کہا کہ کرائسٹ چرچ حملے کا بہت دکھ ہے، تمام ہمدردیاں اور دعائیں مارے جانے والے افراد اور گھر والوں کے ساتھ ہیں۔