فیصل آباد: وزیر پنجاب برائے ہاؤسنگ محمود الرشید نے کہا ہے کہ آصف زرداری کا دور ختم ہوگیا اگلی بار سندھ سے بھی صفایا ہوگا۔
تفصیلات کے مطابق صوبائی وزیر برائے ہاؤسنگ محمود الرشید نے کہا کہ آصف زرداری دن میں خواب دیکھتے ہیں جبکہ نواز شریف اپنی اننگ کھیل چکے، نواز شریف پر مقدمات بہت ہیں لگتا ہے ان سے نہیں نکل سکیں گے۔
انہوں نے کہا کہ مغربی اور انڈا پروگرام کے اعلان پر دیہات میں خوشی کی لہر دوڑ گئی ہے، وزیراعظم کے اعلان کردہ پروگرام سے ملکی معیشت مضبوط ہوگی، نیا پاکستان ہاؤسنگ پروگرام کے لیے فیصل آباد میں 70 ہزار سے زائد درخواستیں آئیں۔
پیپلزپارٹی زرداری کو راہ راست پر لائے، فیاض الحسن چوہان
صوبائی وزیر اطلاعات فیاض الحسن چوہان نے کہا کہ پیپلزپارٹی تنقید کے بجائے آصف زرداری کو راہ راست پر لائے، آصف زرداری کی سیاست کرپشن، منی لانڈرنگ سے عبارت ہے۔
انہوں نے کہا کہ زرداری کی سیاست قتل و غارت، زمینوں پر قبضے سے عبارت ہے، پنجاب کی سیاست میں پیپلزپارٹی قصہ پارینہ بن چکی ہے، زرداری، آل شریف کی لگائی ہوئی گرہیں دانتوں سے کھول رہے ہیں۔
فیاض الحسن چوہان نے کہا کہ زرداری بدنام زمانہ سیاست پر شرمندگی کے بجائے تنقید کرتے نہیں جچتے، زرداری کی سیاست زمینوں، شوگر ملوں پر قبضے، عوام دشمن پالیسیوں سے عبارت ہے۔
واضح رہے کہ پیپلزپارٹی کے شریک چیئرمین آصف علی زرداری نے حکومت کو سخت تنقید کا نشانہ بنایا تھا جس کے بعد پیپلزپارٹی رہنما قمرزمان کائرہ بھی حکومت پر برس پڑے تھے۔
