Tag: محکمہ داخلہ سندھ

کورونا ویکسینیشن کارڈ کی چیکنگ : کراچی کے شہری ہوشیار ہوجائیں

کراچی : محکمہ داخلہ سندھ نے کورونا ویکسی نیشن کارڈچیک کرنےکی مہم فوری طورپرشروع کرنےکی ہدایت کردی اور کہا کارروائیوں کی رپورٹ روزانہ رات12 بجے تک ارسال کریں۔

تفصیلات کے مطابق کراچی میں ویکسی نیشن کارڈ چیکنگ میں قانون نافذ کرنے والے اداروں کی سست روی پر محکمہ داخلہ سندھ کے تحفظات کے بعد پولیس نے مہم کا آغازکردیا۔

محکمہ داخلہ سندھ نے کورونا ویکسی نیشن کارڈ چیک کرنےکی مہم فوری طورپرشروع کرنے کی ہدایت کرتے ہوئے کہا ہے کہ کارروائیوں کی رپورٹ روزانہ رات12 بجے تک ارسال کی جائے۔

یاد رہے گذشتہ روز سندھ میں کوروناایس او پیزکی پابندی پرعملدرآمد کے معاملے پر محکمہ داخلہ سندھ نے قانون نافذکرنیوالے اداروں کے سربراہان کوخط لکھا تھا، خط آئی جی سندھ،ڈی جی رینجرزسمیت متعلقہ افسران کولکھاگیا۔

خط میں کہا گیا تھا کہ مختلف مقامات پرویکسی نیشن کارڈلازمی قراردیاگیاتھا، ویکسی نیشن کارڈکی جانچ کاکام قانون نافذکرنیوالےاداروں کی ذمہ داری تھی، ادارےویکسی نیشن کارڈ چیک کرنے میں دلچسپی نہیں لے رہے اور نہ ہی متعلقہ محکمے مقدمات کااندراج اور جرمانے کررہے۔

چیف سیکریٹری سندھ نے مجازافسران کو کارروائی کی ہدایت کی اور کہا چیف سیکریٹری سندھ کی جانب سےکارروائیوں کاجائزہ لیاجائے گا۔

چیف سیکریٹری نے کہا کہ کوروناایس اوپیزقانون کےتحت فوری عملدرآمدکروایاجائے، خط کےساتھ محکمہ داخلہ سندھ نےایس اوپیزکا آرڈربھی منسلک کیا۔

ستمبر 23, 2021
10 ،9، 8 محرم ، سندھ حکومت نے بڑی پابندی عائد کردی

کراچی : سندھ حکومت کی جانب سے محرم کے موقع پر ہیلی کیم اڑانے پر پابندی عائد کردی اور خلاف ورزی پر دفعہ144کے تحت ایس ایچ او کو کارروائی کا اختیار تفویض کردیا ہے۔

تفصیلات کے مطابق محکمہ داخلہ سندھ نے 10،9،8محرم کے موقع پر ہیلی کیم اڑانے پر پابندی عائد کردی ، اس حوالے سے آئی جی سندھ سمیت متعلقہ پولیس حکام کی رپورٹ پر حکم نامہ جاری کردیا گیا ہے۔

محکمہ داخلہ نے خلاف ورزی پردفعہ144کے تحت ایس ایچ او کو کارروائی کا اختیار تفویض کردیا ہے ، 9،8اور10کو مجالس اور بڑی تعداد میں جلوس ساؤتھ زون میں داخل ہوتے ہیں۔

محکمہ داخلہ سندھ کا کہنا ہے کہ سندھ حکومت موجودہ سیکیورٹی انتظامات سے مطمئن ہے، جلوسوں اور مجالس کیلئے مربوط سیکیورٹی انتظامات کئے جارہے ہیں ، کسی بھی ناگہانی صورتحال سے نمٹنے کیلئے تیاریاں مکمل ہیں۔

یاد رہے محکمہ داخلہ سندھ نے یوم آزادی کے موقع پر تخریب کاری کے خدشے کے پیش نظر صوبے میں 13اور14اگست کو موٹرسائیکل ڈبل سواری پرپابندی کے احکامات جاری کیے تھے۔

نوٹی فکیشن کے مطابق ڈبل سواری پر پابندی کا اطلاق 13 اگست کی رات بارہ بجے سے چودہ اگست کی رات 12 تک ہوگا۔ صحافیوں ، پولیس اہلکاروں، قانون نافذ کرنے والے اداروں، بزرگ، 14 سال سے کم عمر بچوں اور خواتین کو ڈبل سواری سے مستشنیٰ قرار دیا گیا ہے۔

اگست 13, 2021
محرم الحرام: مجالس اور جلوسوں کے انعقاد کے لیے ایس او پیز جاری

کراچی: محکمہ داخلہ سندھ نے محرم الحرام میں مجالس اور جلوسوں کے انعقاد کے لیے ایس او پیز اور ضابطہ اخلاق جاری کر دیا۔

تفصیلات کے مطابق محکمہ داخلہ سندھ نے محرم الحرام کے سلسلے میں ایک نوٹیفکیشن جاری کیا ہے، جس کے مطابق مجالس اور جلوسوں میں کرونا ایس ایس او پیز کی پابندی لازمی قرار دی گئی ہے، مجالس میں شرکا ماسک لازمی پہنیں گے۔

محکمہ داخلہ سندھ کے مطابق مجالس میں شرکت کے لیے زاکرین کو کرونا وائرس کی ایک ڈووز لازمی لگوانا ہوگی، اور مجالس میں بچوں اور بزرگ افراد کے داخلے پر پابندی ہوگی، نوٹیفکیشن میں ہدایت کی گئی ہے کہ زاکرین ٹی وی پر مجالس کے دوران بھی کرونا کے باعث لوگوں کو گھروں پر رہنے کی تلقین کریں۔

ضابطہ اخلاق کے مطابق مجالس کی جگہیں کھلی اور کشادہ ہوں، مجالس میں کرونا ایس او پیز کے تحت 6 فٹ کا فاصلہ رکھنا ہوگا، یکم محرم الحرام سے مجالس کی جگہوں پر شرکا کی کرونا ویکسینیشن شروع کی جائے۔

مجلس میں محکمہ صحت کی ہیلپ ڈیسک قائم کر کے نزلہ زکام سمیت بخار کی علامات کی صورت میں ایسے شہریوں کا داخلہ روکا جائے گا۔

اگست 3, 2021
کراچی میں لاک ڈاؤن کے دوران پابندیوں سے متعلق نیا لیٹر جاری

کراچی : محکمہ داخلہ سندھ نے لاک ڈاؤن کے دوران پابندیوں میں نرمی کرتے ہوئےترمیمی لیٹرجاری کردیا ہے ، جس میں کہا ہے کہ ضروری اشیاکی دکانیں کھلی رہیں گی۔

تفصیلات کے مطابق محکمہ داخلہ سندھ کیجانب سے کورونا ایس اوپیز پر ترمیمی لیٹرجاری کردیا ہے ، جس میں کہا گیا ہے کہ ملک شاپ ، بیکری اور اشیا ضروری کی دکانیں کھلی رہیں گی اور ریسٹورنٹس سے ہوم ڈلیوری جاری رہے گی۔

محکمہ داخلہ سندھ کا کہنا تھا کہ ای کامرس بھی پابندی سے مستثنی ہے جبکہ دودھ سپلائی ملازمین ویکسی نیٹڈ ہونے پر پابندیوں سے مستثنی ہوں گے اور ویکسی نیٹڈ صنعتی ملازمین کواستثنی حاصل ہوگا۔

ترمیمی لیٹر میں کہا گیا ہے کہ سندھ حکومت کی جانب سے موٹرسائیکل کی ڈبل سواری سے عائد پابندی ہٹا دی گئی ہے۔

یاد رہے گذشتہ روز سندھ حکومت نے 8 اگست تک لاک ڈاؤن کا اعلان کیا تھا ، نوٹیفکیشن میں کہا گیا تھا کہ کاروباری مراکزآج رات12بجےسے8اگست تک بندرہیں گے صرف ضروری اشیا کی دکانیں شام چھے سے صبح چھ بجے تک بند رہیں گی۔

سندھ بھرمیں ڈبل سواری پرپابندی عائد کردی گئی تھی اور گھرسےباہرنکلنےوالوں کیلئےویکسی نیشن کارڈلازمی قرار دیا تھا۔

جولائی 31, 2021
عید الاضحیٰ، سندھ حکومت نے بڑی پابندی عائد کر دی

کراچی: عید الاضحیٰ پر سندھ حکومت نے گھروں کے باہر قربانی کرنے پر پابندی عائد کر دی ہے۔

تفصیلات کے مطابق سندھ حکومت نے گھروں کے باہر قربانی کرنے پر پابندی عائد کر دی ہے، محکمہ داخلہ سندھ کی جانب سے نوٹیفکیشن جاری کر دیا گیا۔

محکمہ داخلہ سندھ نے کہا ہے کہ کرونا وائرس میں اضافے کے باعث شہری رہائشی علاقوں میں قربانی کی اجازت نہیں ہے، جانوروں کی قربانی کے لیے کھلے میدان کا انتخاب کیا جائے، اور جانوروں کی قربانی کرتے ہوئے مجمع اکھٹا نہ ہو۔

محکمہ داخلہ سندھ نے ایس او پیز کی خلاف ورزی کرنے والوں کے خلاف کمشنرز، ڈپٹی کمشنرز اور پولیس کو کارروائی کی ہدایت کر دی ہے، محکمے نے کہا ہے کہ نماز عید کے اجتماعات بھی کھلی جگہ میں منعقد کیے جائیں گے، اور ایک ہی مقام پر نماز عید کے ایک سے زائد اجتماعات الگ اوقات میں کیے جائیں۔

نوٹیفکیشن کے مطابق نماز عید کے لیے آنے والوں کو تھرمل اسکینر سےگزارا جائے، نماز کے دوران سماجی فاصلہ برقرار رکھا جائے، اور عید کے اجتماعات میں بیمار افراد، بچوں اور بزرگ شہریوں شرکت نہ کرنے دی جائے۔

محکمہ داخلہ سندھ کا کہنا ہے کہ عید کی نماز پڑھنے والے افراد فیس ماسک کا استعمال لازمی کریں، اور شہری نماز عید کے بعد ہاتھ ملانے اور گلے ملنے سے بھی گریز کریں۔

جولائی 19, 2021
اسکول، ریسٹورنٹس پھر بند، نیا حکم نامہ جاری

کراچی: محکمہ داخلہ سندھ نے کہا ہے کہ صوبے میں کرونا وائرس کے بڑھتے ہوئے کیسز کے پیش نظر 17 جولائی سے پہلی سے آٹھویں جماعت تک کے تمام اسکول بند ہوں گے۔

اے آر وائی نیوز کے مطابق محکمہ داخلہ سندھ نے کرونا کے بڑھتے ہوئے کیسز کے پیش نظر کرونا پابندیوں کے حوالے سے نیا حکم نامہ جاری کر دیا ہے، صوبے میں 15 جولائی سے ہوٹلز، ریسٹورنٹس اور کیفیز میں اِن ڈور ڈائننگ پر پابندی ہوگی۔

نئے حکم نامے کے مطابق 17 جولائی سے پہلی سے آٹھویں جماعت تک کے تمام اسکول بند ہوں گے، جب کہ نویں سے بارہویں جماعت تک امتحانات شیڈول کے مطابق ہوں گے۔

پارکس، واٹر پارکس، سوئمنگ پولز 16 جولائی سے تا حکم ثانی بند رہیں گے، پبلک ٹرانسپورٹ میں 50 فی صد مسافر ایس او پیز کے ساتھ سفر کریں گے، اِن لینڈ تفریحی مقامات پر جانے پر پابندی ہوگی۔

سی ویو، ہاکس بے، کھینجر جھیل، المنظر پر جانے پر بھی پابندی ہوگی، سنیما ہال کل 15 جولائی سے بند رہیں گے، اِن ڈور جم، ان ڈور اسپورٹس 16 جولائی سے بند ہوں گے۔

محکمہ داخلہ سندھ کے حکم نامے میں کہا گیا ہے کہ تمام سیاحتی مراکز بھی مکمل طور پر بند رہیں گے، اور پابندی کا اطلاق 31 جولائی تک ہوگا۔

جولائی 14, 2021
کھالیں جمع کرنے کے لیے ضابطہ اخلاق جاری

کراچی: عید قرباں پر کھالیں جمع کرنے کے لیے ضابطہ اخلاق جاری کر دیا گیا۔

اے آر وائی نیوز کے مطابق محکمہ داخلہ سندھ نے ایک نوٹیفکیشن جاری کرتے ہوئے قرار دیا ہے کہ قربانی کی کھالیں جمع کرنے کے لیے متعلقہ ڈپٹی کمشنر کا اجازت نامہ لازمی ہوگا۔

نوٹیفکیشن کے مطابق کیمپ لگا کر کھالیں جمع کرنے پر پابندی ہوگی، پرچم لگانا اور لاؤڈ اسپیکر پر اعلانات پر بھی پابندی ہوگی، کھالیں جمع کرنے کے لیے بینرز لگانے پر بھی پابندی ہوگی۔

نوٹیفکیشن میں کہا گیا ہے کہ صرف رجسٹرڈ مدارس اور تنظیموں کو کھالیں جمع کرنے کا اجازت نامہ دیا جائے گا، جن تنظیموں پر پابندی ہے، وہ کھالیں جمع نہیں کر سکیں گی۔

صوبائی محکمہ داخلہ نے کہا ہے کہ عید قرباں پر اسلحے کی نمائش پر بھی پابندی عائد ہوگی، اور عید کے تینوں روز اسلحے کے اجازت نامے منسوخ ہوں گے۔

یاد رہے گزشتہ روز وزارت قومی صحت نے عید الاضحیٰ کے موقع پر مویشی منڈیوں سے کرونا وائرس کے پھیلاؤ کے خدشے کے پیش نظر گائیڈ لائنز جاری کی ہیں، جن میں ایس او پیز پر سختی سے عمل درآمد کی ہدایت کی گئی ہے۔

یہ گائیڈ لائنز مویشی منڈی، نماز عید، قربان گاہوں سے متعلق ہیں، جن میں کہا گیا ہے کہ مویشی منڈی میں موجودگی کے دوران ماسک پہننا لازم ہوگا، مویشی منڈی کے داخلی مقامات پر آنے والوں کا بخار چیک کیا جائے گا اور سینیٹائزر کا انتظام کیا جائے گا جب کہ مویشیوں کے بیوپاری اور خریدار کے لیے ویکسینیشن بھی لازم ہے۔

جون 30, 2021
کراچی کے شہریوں کی غیر ضروری نقل وحرکت پر پابندی عائد، نیا نوٹی فکیشن جاری

کراچی : سندھ میں شہریوں کی غیر ضروری نقل وحرکت پر پابندی عائد کردی گئی ، انتہائی ضروری کام کے لیے گاڑیوں کو صرف ایک شخص کے ساتھ اجازت ہوگی۔

تفصیلات کے مطابق محکمہ داخلہ سندھ نے نئی پابندی کا نوٹی فکیشن جاری کردیا ، جس میں سندھ میں شہریوں کی غیر ضروری نقل وحرکت پر پابندی عائد کردی گئی ہے۔

نوٹی فکیشن میں کہا گیا ہے کہ سندھ میں رات 8بجے کےبعد گاڑیوں کی نقل وحرکت پر پابندی عائد ہوگی اور انتہائی ضروری کام کے لیے گاڑیوں کو صرف ایک شخص کے ساتھ اجازت دی جائے گی۔

محکمہ داخلہ سندھ نے کہا ہے کہ ہوٹل،ریسٹورینٹ میں ان ڈور ،آؤٹ ڈور سروس پر پابندی برقرار رہے گی جبکہ 10سےزائد افراد کی تقریبات پر پابندی عائد ہوگی ، گھر ،شادی ہال یا کسی بھی مقام پر10سےزائد افراد کی تقریب نہیں ہوسکے گی۔

نوٹی فکیشن کے مطابق ہوٹل ریسٹورینٹس رات 12بجے تک ہوم ڈیلیوری کرسکیں گے۔

گذشتہ روز سندھ حکومت نے شہر قائد میں لاک ڈاؤن مزیدسخت کرنےکافیصلہ کرتے ہوئے نیا حکم نامہ جاری کردیا تھا، جس میں کہا گیا تھا کہ شہریوں کو رات 8 بجےکے بعد غیرضروری گھومنے کی اجازت نہیں ، آئی جی سندھ گاڑیوں میں غیرضروری گھومنے والے شہریوں کو روکیں، صرف اسپتال یاضروری کام سے نکلنے والے شہریوں کواجازت دی جائے۔

کراچی میں مغرب کے بعد تمام پارکس کی لائٹس بھی بند کرنے کا فیصلہ کیا گیا ہے ، مراد علی شاہ نے کہا تھا عوام نے تعاون کیا تو دو ہفتے بعد کیسزمیں کمی آنا شروع ہو جائیں گی ، کیسزکم ہوئے تو لاک ڈاؤن کھولنے کی طرف جائیں گے۔

مئی 25, 2021
کورونا کا تیزی سے پھیلاؤ، کراچی کے شہریوں کیلئے پابندیوں کا نیا حکم نامہ جاری

کراچی : محکمہ داخلہ نے شہریوں کیلئے پابندیوں کے نئے حکم نامے میں کہا ہے کہ کورونا ایس اوپیز کےتحت 9سے 16مئی تک نئی پابندیاں عائد رہیں گی جبکہ عید بازار، چاند رات پر لگائے جانے والے تمام بازار بند ہوں گے۔

تفصیلات کے مطابق محکمہ داخلہ سندھ نے شہریوں کیلئے پابندیوں کا نیا حکم نامہ جاری کردیا ، جس میں کہا ہے کہ کورونا ایس اوپیز کےتحت 9سے 16مئی تک نئی پابندیاں عائد رہیں گی اور تمام سیاحتی تفریحی مقامات عید تعطیلات میں بند رہیں گے۔

محکمہ داخلہ کا کہنا ہے کہ 9تا 16مئی شہریوں کی نقل وحرکت محدود اور اندرون شہر ،انٹر سٹی سمیت بین الصوبائی پبلک ٹرانسپورٹ19مئی تک بند رہے گی جبکہ شہریوں کے لئے ماسک کا استعمال اور سماجی فاصلہ لازمی قرار دیا گیا ہے۔

نوٹیفکیشن میں کہا گیا ہے کہ زیادہ رش والے علاقوں میں جانے سے گریز کیا جائے، سندھ میں کاروبار، مارکیٹس اور شاپنگ پلازہ 9 تا 16 مئی بند رہیں گے تاہم بنیادی اشیائے ضروریہ کی دکانوں پر پابندی کا اطلاق نہیں ہوگا۔

محکمہ داخلہ سندھ کا کہنا ہے کہ جانوروں کی خرید وفروخت کی دکانیں ویٹرنری اسٹورز پرپابندی کااطلاق نہیں ہوگا جبکہ ریسٹورنٹس صبح 5 سے شام 7بجے تک کھلے رکھے جا سکیں گے اور ریسٹورنٹس ہوٹلز صرف ہوم ڈیلیوری اور ٹیک اوے سروس کرسکیں گے۔

نوٹیفکیشن کے مطابق عید بازار، چاند رات پر لگائے جانے والے تمام بازار بند ہوں گے اور بیکری، کریانہ، دوددھ، گوشت سبزی کی دکانیں شام 7بجے تک کھولی جاسکتی ہیں جبکہ نجی گاڑیوں، ٹیکسی اور کیب میں نصف نشستیں خالی رکھنا ہوں گی۔

مئی 7, 2021
سندھ میں کورونا صورتحال میں بہتری، پابندیوں میں مزید نرمی، نیا نوٹیفکیشن

کراچی : سندھ میں کورونا صورتحال میں بہتری کے بعد لاک ڈاؤن میں لگائی گئیں پابندیوں میں مزید نرمی کردی گئی تاہم انڈور شادیوں،انڈور ڈائننگ اورسینما کھلنے کے بارے میں 10 مارچ کو این سی او سی کے اجلاس میں فیصلہ کیا جائے گا۔

تفصیلات کے مطابق محکمہ داخلہ سندھ نے کورونا ایس او پیز سے متعلق نیا نوٹیفکیشن جاری کردیا ، جس میں کہا گیا ہے کہ تمام تجارتی مراکز اور پارکوں کے کھلنے اور بند ہونے کی وقت کی پابندی سمیت پچاس فیصد ملازمین کو گھر سے کام کرانے کی پابندی ختم کردی گئی ہے۔

نوٹیفکیشن میں کہا ہے کہ تمام ہوٹلز بھی آوٹ ڈور ڈائنگ جاری رکھ سکتے ہیں تاہم بوفے سروس کی اجازت بھی نہیں دی گئی جبکہ انڈور شادیوں،انڈور ڈائننگ اورسینما کھلنے کے بارے میں 10 مارچ کو این سی او سی کے اجلاس میں فیصلہ کیا جائے گا۔

محکمہ داخلہ سندھ کا کہنا ہے کہ شادیوں میں 300افراد کو شرکت کی اجازت ہوگی اور رات دس بجے تک شادی کی تقریبات کی جاسکتی ہیں جبکہ پی ایس ایل میچز میں 20 فیصد شرکت کی اجازت ہے۔

نوٹیفکیشن کے مطابق ایسے علاقے جہاں کرونا کے کیسسز زیادہ رپورٹ ہوں گے وہاں مقامی انتظامیہ اسمارٹ لاک ڈائون لگا سکے گی ، محکمہ داخلہ کی نئی ہدایات کا اطلاق 31 مارچ تک نافذ العمل ہوگا۔

مارچ 2, 2021