سعودی عرب میں محکمہ شہری دفاع نے مملکت کے بیشتر علاقوں میں اتوار تک گرج چمک کے ساتھ بارش کا امکان ظاہر کیا ہے۔
سعودی خبر رساں ادارے کی رپورٹ کے مطابق مکہ مکرمہ ریجن میں درمیانے درجے سے تیز بارش کے ساتھ ژالہ باری، سیلاب اور گرد آلود ہوائیں چلنے کا امکان ہے، جس سے طائف، الخرمہ، میسان، المویہ، تربہ اور رانیہ کے علاقے متاثر ہوں گے۔
رپورٹس کے مطابق ریاض ریجن میں بھی ہلکی سے درمیانے درجے کی بارش، سیلاب، ژالہ باری اور گرد آلود ہوائیں چل سکتی ہیں، جس سے عفیف، الدوامی، القویعہ اور شقرا سمیت کئی علاقے زد میں رہیں گے۔
نجران اور قصیم ریجن میں ہلکی سے درمیانے درجے کی بارش کی زد میں رہیں گے جبکہ جازان، عسیر، الباحہ اور مدینہ منورہ ریجن کے علاقوں میں ہلکی سے تیز بارش اور ژالہ باری کا امکان ہے۔
محکمہ شہری دفاع نے شہریوں کو احتیاطی تدابیر اختیار کرنے کا مشورہ دیا ہے۔
دوسری جانب سعودی عرب میں وزارتِ حج و عمرہ نے بیرونی ممالک کے لیے بعد از حج عمرہ پروگرام کا اعلان کردیا ہے۔
سعودی خبر رساں ادارے کی رپورٹ کے مطابق وزارت حج وعمرہ کا کہنا ہے کہ رواں برس حج ختم ہوتے ہی بیرونی عمرہ زائرین کے لیے 14 ذوالحجہ بمطابق 11 جون 2025 سے عمرہ ویزوں کو بحال کردیا جائے گا۔
وزارت حج کے مطابق عمرہ ویزے رمضان المبارک کے اختتام تک جاری کرائے جاسکتے ہیں، یکم شوال سے عمرہ ویزوں کا اجرا بند ہونے کے بعد صرف جاری شدہ ویزوں کے حامل عمرہ زائرین 15 شوال 1447 ہجری تک مملکت آسکتے ہیں۔
رپورٹس کے مطابق عمرہ ویزوں پر مملکت آنے والے زائرین کے لیے ضروری ہوگا کہ وہ آئندہ برس حج سیزن سے قبل یعنی 15 ذوالقعدہ 1447 ہجری تک اپنے ملکوں کو لوٹ جائیں۔
سعودی فرماں روا کا شاہی فرمان جاری، اہم حکومتی تبدیلیاں
خیال رہے عمرہ ویزوں کے اجرا پر عارضی پابندی کا مقصد مختلف ممالک سے آنے والے عازمین حج کو سہولت فراہم کرنا ہے تاکہ مکہ مکرمہ اور مشاعر مقدسہ میں غیرضروری ازدحام نہ ہواور حجاج کرام بغیر کسی پریشانی کے حج کرسکیں۔
