Tag: محکمہ موسیات

کراچی: صوبہ سندھ کے دارالحکومت کراچی میں مختلف علاقوں میں نہایت مختصر وقت کے لیے تیز بارش ہوئی، محکمہ موسمیات کے مطابق شہر میں وقفے وقفے سے ہلکی اور تیز بارش کا سلسلہ برقرار رہے گا۔

تفصیلات کے مطابق کراچی کے علاقوں صفورہ، ملیر، ایئر پورٹ، ماڈل کالونی، شارع فیصل، اسٹار گیٹ اور نارتھ ناظم آباد میں تیز بارش ہوئی۔ بارش رکنے کے بعد ٹھنڈی اور تیز ہواؤں کا سلسلہ تاحال برقرار ہے۔

دوسری جانب شہر کے ضلع جنوبی میں موسم معمول کے مطابق ہے، مطلع صاف اور تیز دھوپ نکلی ہوئی ہے۔ محکمہ موسمیات کے مطابق زیادہ بارش کورنگی اور ملیرمیں رپورٹ ہوئی ہیں۔

محکمہ موسمیات کا کہنا ہے کہ بارش بنانے والا سسٹم اب بھی شہر میں موجود ہے، وقفے وقفے سے ہلکی اور تیز بارش کا سلسلہ برقرار رہے گا۔

یاد رہے کہ شہر کراچی میں گزشتہ ہفتے سے تیز بارشوں کا سلسلہ جاری ہے، شہر کے مختلف علاقوں میں وقفے وقفے سے تیز بارشیں ہوتی رہیں۔

کراچی کے علاوہ بھی ملک بھر میں بارشوں کا سلسلہ جاری ہے۔ محکمہ موسمیات کے مطابق بارش برسانے والی مغربی ہواؤں کا نیا سلسلہ ایران سے بلوچستان میں داخل ہوچکا ہے اور سرحدی علاقوں میں گرج چمک کے ساتھ بارش ہو رہی ہے۔