Tag: محکمہ وائلڈ لائف

راولپنڈی : محکمہ وائلڈ لائف نے شیر جی ٹی روڈ پر کھڑی گاڑی سے شیر پکڑ لیا، برآمد شیر میلوں میں سرکس کیلےلایا گیا تھا۔

تفصیلات کے مطابق محکمہ وائلڈ لائف پنجاب نے راولپنڈی میں چک بیلی روڈ سے غیر قانونی شیر تحویل میں لے لیا۔

حکام نے بتایا کہ شیر جی ٹی روڈ پر کھڑی گاڑی سے برآمد کیا گیا، شیر کا مالک جس کی شناخت فخر عباس کے نام سے ہوئی ہے۔

برآمد شیر میلوں میں سرکس کیلےلایا گیا تھا تاہم شیر کا مالک فخرعباس لائسنس پیش کرنےمیں ناکام رہا ، جس کی وجہ سے قانونی کارروائی کی گئی۔

حکام کا کہنا تھا کہ غیر قانونی شیر رکھنے پر مالک کو 60 ہزار روپے جرمانہ عائد کردیا ہے اور تحویل میں لئےگئے شیر کو محفوظ مقام پرمنتقل کر دیا گیا ہے۔

مزید پڑھیں : راولپنڈی : گھر سے افریقی نسل کا نایاب شیر برآمد ، مقدمہ درج

محکمہ وائلڈ لائف کے مطابق پنجاب بھر میں جنگلی جانوروں کو پرمٹ کے بغیر رکھنے پر سخت پابندی ہے ، ٹارگٹڈ آپریشن کے دوران پنجاب کے مختلف علاقوں سے پالتو جانوروں کے طور پر غیر قانونی طور پر رکھے گئے اٹھارہ شیروں کو پکڑا گیا ہے۔

گزشتہ ماہ لاہور کے ایک گھر سے شیر کے فرار ہونے اور ایک خاتون اور دو بچوں پر حملہ کرنے کے بعد وسیع پیمانے پر کریک ڈاؤن شروع کر دیا گیا ہے۔

محکمہ وائلڈ لائف نے زور دیا کہ جانوروں کے تحفظ کے قوانین کی خلاف ورزی کرنے والے افراد کے خلاف کارروائی جاری رہے گی۔

لاہور : محکمہ وائلڈ لائف نے کارروائی کرتے ہوئے 15 بٹیر اور 20 بھورے و کالے رنگ کے تیتر کے بچے برآمد کرلیے اور ایک ڈیلر کو حراست میں لے لیا۔

تفصیلات کے مطابق محکمہ وائلڈ لائف نے لاہور،خوشاب،بھکراورلیہ میں کارروائیاں کرتے ہوئے 15 بٹیر، براؤن اور کالے رنگ کے 20 تیتر کے بچے برآمد کرلئے۔

ترجمان کا کہنا تھا کہ کوٹ مومن سے 6 تیتر کے بچوں کو لاہور منتقل کرنے کی کوشش ناکام بنادی، بس سے 6 بھورے تیتر کے بچے برآمد جلو وائلڈ لائف پارک منتقل کردیا۔

ترجمان نے کہا کہ نورپورتھل سے 8، بھکر سے 2 اور لیہ سے 4 تیتر برآمد کیے گئے جبکہ نورپور تھل سے ایک ڈیلر کو حراست میں لیا گیا اور اس کے خلاف قانونی کارروائی کا آغاز کر دیا گیا ہے۔

سینئروزیرمریم اورنگزیب نے کہا کہ جنگلی پرندے بیچنے والوں کیخلاف کریک ڈاؤن کررہے ہیں۔

محکمہ وائلڈ لائف پنجاب کے مطابق بریڈنگ سیزن کے دوران جنگلی پرندوں کو نیٹنگ کے ذریعے پکڑ کر فروخت کرنے والوں خلاف سخت کریک ڈاؤن جاری ہے۔ صوبے کے تمام ریجنز میں غیر قانونی شکار اور خرید و فروخت کے خلاف مؤثر کارروائیاں کی جا رہی ہیں۔

سینئر صوبائی وزیر اطلاعات و ثقافت مریم اورنگزیب نے کہا جنگلی پرندے بیچنے والوں کیخلاف کریک ڈاؤن کررہے ہیں، حکومت پنجاب جنگلی جانوروں اور پرندوں کے قدرتی ماحول کو محفوظ بنانے کے لیے پرعزم ہے۔

لاہور: محکمہ وائلڈ لائف نے کارروائی کرتے ہوئے بٹیر کی اسمگلنگ کی کوشش ناکام بناتے ہوئے 110 بٹیر برآمد کرلئے۔

تفصیلات کے مطابق محکمہ وائلڈلائف نے بٹیر کی اسمگلنگ کی کوشش ناکام بنا دی، ڈی جی خان میں وائلڈلائف نے کارروائی کرتے ہوئے 110 بٹیر برآمد کرلئے۔

سینئیر صوبائی وزیر مریم اورنگزیب نے کہا کہ کہ بٹیر اسمگلنگ ناکام بنا کر جنگلی پرندوں کے تحفظ میں اہم پیشرفت ہوئی، ملزمان کیخلاف کارروائی جاری ہے ، تفتیش کا دائرہ وسیع کیا جا رہا ہے۔

مریم اورنگزیب کا کہنا تھا کہ جنگلی حیات پرحملہ قدرتی توازن پرحملہ ہے،ایسے عناصر کو بخشا نہیں جائےگا۔

سینئیر صوبائی وزیر نے بتایا کہ محکمہ وائلڈلائف نےآگاہی مہم شروع کردی، تعلیمی اداروں اوردیہات میں سرگرمیاں ہوں گی، نوجوانوں میں جنگلی حیات کی اہمیت اجاگر کرنے کیلئے تربیتی پروگرامز کررہے ہیں۔

انہوں نے مزید کہا کہ وزیراعلیٰ پنجاب کی زیر قیادت جنگلی حیات کے تحفظ کے لیے زیرو ٹالرنس پالیسی پر سختی سے عملدرآمد جاری ہے۔ وائلڈ لائف ٹیمیں کرین اور بٹیر سمیت دیگر قیمتی پرندوں کے تحفظ کے لیے مختلف ہاٹ اسپاٹس پر مسلسل گشت کر رہی ہیں۔

محکمہ وائلڈ لائف نے طوطوں کے شناختی کارڈ جاری کرنے کا فیصلہ کرلیا، طوطوں کی رجسٹریشن نہ کروانے والے مالکان کو پچیس ہزارتک جرمانے اور طوطے ضبط کرلئے جائیں گے۔

پرندوں اور جنگلی حیات کے تحفظ کے لیے محکمہ وائلڈ لائف نے منفرد اقدام کرتے ہوئے طوطوں کےشناختی کارڈ جاری کرنے کا فیصلہ کرلیا۔

فیصلے کے تحت پالتو طوطوں اور ان کے مالکان کو خصوصی شناختی نمبرزجاری کئے جائیں گے اور طوطے پالنے کے شوقین افراد اور رجسٹرڈ بریڈرز پر جنگلی طوطوں کو پکڑنے اور طوطوں کے چوزے فروخت کرنے پرپابندی ہوگی۔

محکمہ وائلڈ لائف کے ترجمان کا کہنا ہے کہ رواں سال کے آخرتک رجسٹریشن فری ہوگی تاہم یکم جنوری سے انتیس فروری تک رجسٹریشن فیس پانچ ہزار روپے ہوگی۔

ترجمان نے مزید بتایا کہ بالغ پرندوں کےلیے رجسٹریشن اٹھائیس فروری دوہزارچوبیس کو بند ہوجائے گی، طوطوں کی رجسٹریشن نہ کروانے والے مالکان کو پچیس ہزارتک جرمانے اور طوطے ضبط کرلئے جائیں گے۔

محکمہ وائلڈ لائف کے مطابق جنگلوں میں طوطوں کی تعداد کم ہونے سے بچانےکےلئے رجسٹریشن کا فیصلہ کیا گیا ہے۔

اس حوالے سے پراجیکٹ منیجر پیراکیٹس کنزرویشن پروگرام محب اللہ نوید نے اے آر وائی نیوز کے پروگرام میں گفتگو کرتے ہوئے کہا کہ طوطوں کی رجسٹریشن کا فیصلہ جنگلی طوطوں کی کم ہوتی تعداد کے باعث کیا گیا۔

انھوں نے طوطوں کی رجسٹریشن کا طریقہ بتاتے ہوئے کہا کہ پرندوں کے پاؤں میں ایک خاص رِنگ ‘جسے لیگ بینڈ کہا جاتا ہے’ ڈالا جائے گا، جس پر رجسٹریشن نمبر ہوگا ، بریڈر کا نام ہوگا، جسے گاڑی کی نمبر پلیٹ ہوتی ہے، اسی طرح سیریل نمبر ہوگا جو منفرد ہوگا۔

محب اللہ نوید نے مزید بتایا کہ محکمہ وائلڈ لائف کی جانب سے جو رنگ ایشو کیا جائے گا ، اگر وہ پرندوں کو ایک بار پہنا دے تو وہ اتارا نہیں جاسکتا، اس کی ایک ہی صورت ہے کہ اس رنگ کو کاٹا جائے ، جس سے پرندے کے زخمی ہونے کا خدشہ ہوگا۔