Tag: مختار مسعود

غبارِ خاطر ابو الکلام آزاد کے خطوط کا مجموعہ ہے۔ مولانا ابو الکلام آزاد ایک انشاء پرداز، صاحبِ اسلوب ادیب تھے جن کا تحریر و تقریر میں کوئی ثانی نہیں۔ ان کی تصنیف غبارِ خاطر کا کی نثر شگفتہ اور پیرایہ دلنشیں ہے۔

مختار مسعود بھی اردو ادب میں‌ اپنے اسلوب اور تصانیف کی وجہ سے شہرت اور مقام رکھتے ہیں۔ اپنے عہد کی ممتاز ادبی شخصیات اور بڑے بڑے قلم کاروں‌ کی طرح‌ مختار مسعود بھی مولانا ابوالکلام آزاد کی شخصیت اور ان کی تحریروں میں سحر میں‌ رہے اور اس کا تذکرہ اپنی کتابوں‌ میں‌ کیا ہے۔ یہاں‌ ہم مولانا آزاد کے تعلق سے مختار مسعود کے قلم سے نکلے چند پارے نقل کررہے ہیں۔ وہ لکھتے ہیں:

بی اے کا امتحان شروع ہونے سے پانچ دن قبل مولانا آزاد کی ’غبارِ خاطر ‘ ہاتھ آگئی جسے پڑھنا شروع کیا تو یہ بھی یاد نہ رہا کہ پانچ روز بعد بی اے کا امتحان شروع ہونے والا ہے۔ چوبیس گھنٹے بعد جب یہ کتاب پڑھ کے رکھی تو اُس کا جادو پوری طرح چڑھ چکا تھا۔

مختار مسعود لکھتے ہیں: ’’غبارِ خاطر ختم ہوئی۔ میں نے اُسے جہاں سے اُٹھایا تھا وہاں واپس رکھنا چاہا (تو) کتاب نے کہا (کہ اب) باقی باتیں امتحان کے بعد ہوں گی۔ اِس وقت تو (مجھے) تم سے ایک عہد لینا ہے کہ ’’میں مسمٰی مختار مسعود متعلم بی اے (سال آخر) بقائمی ہوش و حواس اور بہ رضا و رغبت یہ عہد کرتا ہوں کہ اگر حالات سازگار ہوئے اور زندگی نے موقع دیا تو میں بالیدگی، شائستگی اور حکمت کے اِس سبق کو جو مجھے اردو اور فارسی کی اِس (لازوال) نثر نے دیا ہے قرضِ حسنہ سمجھتے ہوئے بقلم خود قسط وار اُتارنے کی پوری پوری کوشش کروں گا۔

وہ اس کتاب کے مطالعہ کے فوائد کا تذکرہ کرتے ہوئے رقم طراز ہیں: ’’امتحان کا خوف دل سے جاتا رہا۔ جامعاتی اور رسمی تعلیم کا حکمت اور دانش سے ہرگز کوئی تعلق نہیں۔ (اسی طرح ) فکر و نظر کا بھی تعلیمی اسناد (ڈگریوں) سے کوئی علاقہ نہیں۔ (اس) زور پر نہ کوئی اچھا شعر کہہ سکتا ہے نہ اچھی نثر لکھ سکتا ہے۔ نہ اچھی کہانی کہہ سکتا ہے اور نہ اچھی تصویر بنا سکتا ہے۔ اِن منزلوں کے راستے اور (ہی) ہیں۔ سنگلاخ اور دشوار گزار۔ تلوے چھلنی ہو جاتے ہیں۔ جسم پسینے پسینے اور چور چور ہو جاتا ہے (کیونکہ ) جسم ایک آرام طلب ذات ہے۔ ’کسب ِ کمال‘ کے لیے اُسے بہت بے آرام ہونا پڑتا ہے۔ تب جاکر ’عزیز جہاں شوی ‘ کی منزل آتی ہے۔ اور آدمی مڑ کر دیکھتا ہے تو حیران ہو جاتا ہے کہ ذرا سی بے آرامی اور اس کا اتنا بڑا صلہ!قدرت کتنی فیاض ہے۔ اور انسان کتنا نا سمجھ۔۔‘‘(حرفِ شوق)

متحدہ ہندوستان کی سیاست، تحریکِ آزادی، سماجی حالات اور علم و ادب میں دل چسپی رکھنے والوں کے لیے بلبلِ دکن مسز سروجنی نائیڈو کا نام نیا ہے اور نہ ہی ان کی شخصیت کسی تعارف کی محتاج۔

وہ کُل ہند کانگریس کی روح و رواں رہی ہیں اور انگریز دور میں سیاسی قیدی بن کر خود کو خاتونِ آہن ثابت کیا ہے۔ ان کا مسلک یہ رہا کہ ہندو اور مسلمان باہم اتفاق اور اتحاد برقرار رکھتے ہوئے ہندوستان سے انگریزوں کو نکال باہر کریں اور اپنے وطن پر حکومت کی جائے۔

مسز سروجنی کی نظر میں عورتوں کی سماجی اور معاشرتی ترقی بہت اہمیت رکھتی تھی اور اس کے لیے بھی وہ جدوجہد کرتی رہیں۔

وہ فصیح و بلیغ مقررہ تھیں۔ کہتے ہیں کہ وہ تقریر نہیں کرتی تھیں بلکہ روانی، تسلسل اور زورِ بیاں کا دریا بہا دیتی تھیں۔ ان کا انداز اور تقریر دلوں میں طوفان برپا کر دیتی تھی۔

مختار مسعود جیسے صاحبِ طرز ادیب اور انشا پرداز نے اپنی مشہور تصنیف آوازِ دوست میں ان کا شخصی خاکہ کچھ یوں رقم کیا ہے۔

"دبلی پتلی ،بوٹا قد، تنگ دہن، آنکھیں کشادہ اور روشن، بالوں میں گھنگھر ہیں اور چھوٹا سا جوڑا گردن پر ڈھلکا ہوا ہے، جوڑے میں جڑاؤ پھول ہیں اور گلے میں موتیوں کا ہار۔

بائیں ہاتھ کی پہلی انگلی میں بڑی سی انگوٹھی ہے، ساڑی کا پلّو کاندھے پر کلپ سے بندھا ہوا، صورت من موہنی، پہلی نظر میں پُراثر، دوسری میں پُراسرار، میں نے بھی جب اس بُت کو دوسری بار نظر بھر کر دیکھا تو صورت ہی بدلی ہوئی تھی۔

ایک بھاری سانولی اور معمّر عورت نے سلک کی سلیٹی ساڑی باندھی ہے۔ پلّو سَر پر ہے، اور نصف چہرہ بھی اس میں چھپا ہوا ہے۔ اس نے دائیں ہاتھ سے ایک خوش نما قوس بنائی اور اسے ابرو کے سامنے لا کر سَر کی ہلکی سی جنبش کے ساتھ مسلم یونیورسٹی کورٹ کے اراکین کو جو وکٹوریا گیٹ میں صف بستہ کھڑے تھے، یوں آداب کیا، گویا وہ مسلم تمدن کا مرقع ہے یا شائستگی کا مجسمہ۔

آداب کرتے ہوئے ساڑی کا پلّو چہرے سے ڈھلک گیا تو ہم نے پہچانا کہ یہ سروجنی نائیڈو ہے۔”

آزادی کی یہ متوالی، عظیم راہ نما، دانش ور و مدبّر خاتون جو اردو اور انگریزی پر یکساں عبور رکھتی تھیں اور ہندو مسلم اتحاد کی زبردست حامی تھیں، ایک موقع پر مسلم یونیورسٹی کے جلسے میں شریک ہوئی تھیں۔ اس موقع پر سروجنی نائڈو کا زبردست استقبال ہوا تھا اور پورے اسلامی تمدّن اور تہذیب کے ساتھ ان کو صفِ اوّل میں بٹھایا گیا تھا۔ اس پورے منظر کو مختار مسعود نے اپنی تحریر میں گویا متحرک بنا دیا ہے۔ ظاہری اور باطنی اوصاف کے علاوہ طلبا کے استقبال کا انداز اور نائیڈو کی تقریر کا جوش اور اس میں حق و صداقت سے پُر آواز کا انھوں نے بھرپور نقشہ کھینچا ہے۔

ان کے قلم سے جلسے کی کیفیت اور تقریر کے انداز کو ملاحظہ کیجیے:

"میں آج مسلم یونیورسٹی علی گڑھ میں کئی لوگوں کے مشورے کے خلاف اور چند لوگوں کی دھمکی کے باوجود حاضر ہوئی ہوں، مجھے علی گڑھ کی ضلعی اور یو پی کی صوبائی کانگریس نے پہلے مشورہ اور پھر حکم دیا کہ تم مسلم یونیورسٹی کا دورہ منسوخ کر دو۔ انہیں یہ بات بھو ل گئی کہ گورنر کی حیثیت سے میں اب کانگریس کی ممبر نہیں رہی لہٰذا نہ ان کی رائے کی پابند ہوں نہ ان کے ضابطے سے مجبور، اور میں کسی کی دھمکیوں کو کب خاطر میں لاتی ہوں۔ میں حاضر ہوگئی ہوں، بلبل کو چمن میں جانے سے بھلا کون روک سکتا ہے؟،،

ایک دوسرے مقام پر وہ اسلام کے پیغامات کی صداقت اور حقانیت کا اعلان کرتے ہوئے یوں گویا ہوتی ہیں:

"اگرچہ میں تمہارے دوش بہ دوش کھڑے ہونے کے باوجود تمہاری نظروں میں ایک کافرہ ہوں مگر میں تمہارے سارے خوابوں میں شریک ہوں، میں تمہارے خوابوں اور بلند خیالوں میں بھی تمہارے دوش بدوش ہوں کیوں کہ اسلام کے نظریات بنیادی اور حتمی طور پر اتنے ترقّی پسند نظریات ہیں کہ کوئی انسان جو ترقّی سے محبّت کرتا ہو ان پر ایمان لانے سے انکار نہیں کر سکتا۔”

مختار مسعود نے دل نشیں پیرائے میں سروجنی نائیڈو کی جلسے میں آمد اور ان کے خیالات کو ہمارے سامنے پیش کیا ہے اور ان کی زندگی کے مختلف پہلوؤں کو روشن کیا ہے اور ان کی تقریر کو لفظوں کی خوب صورت لڑی میں یوں پرویا ہے کہ ہر لفظ ذہن و دل پر نقش ہوا جاتا ہے۔

’’آوازِ دوست‘‘ کا انتساب کچھ یوں تھا: ’’پرِ کاہ اور پارۂ سنگ کے نام

وہ پرِ کاہ، جو والدہ مرحومہ کی قبر پر اُگنے والی گھاس کی پہلی پتّی تھی اور وہ پارۂ سنگ جو والد مرحوم کا لوحِ مزار ہے۔‘‘

آوازِ دوست وہ کتاب تھی جس نے ادبی دنیا کو ایک ایسے اسلوب اور طرزِ تحریر سے آشنا کیا، جس کی نظیر کم ہی ملتی ہے۔ اس کتاب کا صرف ’’انتساب‘‘ ہی لاجواب نہ تھا بلکہ اس کا ’’دیباچہ‘‘ بھی انفرادیت لیے ہوئے تھا۔ اسے سبھی نے سراہا۔ دیباچہ میں‌ لکھا تھا کہ’’اس کتاب میں صرف دو مضمون ہیں۔ ایک طویل مختصر اور دوسرا طویل تر۔ ان دونوں مضامین میں فکر اور خون کا رشتہ ہے۔ فکر سے مُراد فکرِ فردا ہے اور خون سے خونِ تمّنا۔‘‘

اس کے مصنّف مختار مسعود تھے جو علم و ادب کی دنیا میں‌ ممتاز ہوئے اور ایسے کہ صاحبِ اسلوب کہلائے۔ ان کی کتاب سے ایک پارہ آپ کے ذوق کی نذر ہے، وہ لکھتے ہیں۔

”میں قائدِاعظم کے سامنے کھڑا ہوا اور کانپتی ہوئی آواز میں ایک نظم پڑھی، میں نے چند ماہ پہلے میٹرک پاس کیا تھا اور یونیورسٹی میں کسی موقع پر ترنّم سے نظم پڑھنے کا یہ پہلا اور آخری واقعہ تھا۔

یہ نظم میرے استاد مولانا عقیل الرّحمان ندوی کی لکھی ہوئی تھی۔ عقیل الرّحمان صاحب اسکول میں فارسی پڑھایا کرتے تھے اور ان میں بہت سی خوبیاں جمع تھیں۔ علم، شاعری، اخلاق، خود داری۔

ان کی زندگی سادگی اور فقر سے عبارت تھی۔ ان کی نظر میں کچھ ایسا اثر تھا کہ اس کا فیض میں آج بھی اپنی زندگی میں پاتا ہوں۔

میں گیارہ بارہ برس کا تھا تو شہر میں پاسپورٹ سائز کی تصویر کھینچنے کی ایک خود کار مشین نصب ہوئی۔ میں نے شوق سے تصویر اتروائی اور دوسرے دن اسے اسکول لے گیا۔ سبق ہو رہا تھا مگر جو لڑکا میرے ساتھ بیٹھا تھا اس نے تصویر لے کر پہلے دیکھی اور پھر چپکے سے آگے بڑھا دی۔ وہ تصویر ہاتھوں ہاتھ کلاس میں بہت دور نکل گئی۔ بالآخر مولانا عقیل الرّحمان نے دیکھ لیا۔ پوچھا کہ یہ کیا ہو رہا ہے، جس کے ہاتھ میں تصویر تھی اس نے ڈر کر اسے استاد کی میز پر رکھ دیا۔ سب اس انتظار میں تھے کہ اب ڈانٹ پڑے گی اور سزا ملے گی، مگر ایسا نہ ہوا۔ مولانا نے تصویر کو غور سے دیکھا پھر اس پر سعدی شیرازی کا ایک دعائیہ شعر اپنے خوب صورت خط میں لکھ کر مجھے تصویر واپس کر دی۔ یہ تحریر اور تصویر اب بھی میرے پاس محفوظ ہے۔

اور وہ نصیحت جو مولانا نے مجھے ایک بار کی تھی اس کا نقش بھی میرے دل پر آج تک اسی طرح محفوظ ہے۔ میں نے اقبال کی ایک طویل نظم بھی اس شفیق استاد سے کوئی دو ہفتے تک ان کے گھر جا کر پڑھی۔ وہ اقبال کے سلسلے میں میرے خضرِ راہ ثابت ہوئے۔ اقبال سے ان کو بہت عقیدت تھی اور وہ نظم جو خاص طور پر قائدِاعظم کی آمد پر لکھی گئی اور اسٹریچی ہال میں مجھے پڑھنے کے لیے دی گئی وہ بھی اقبال کی زمین میں تھی۔ ان دنوں سیاسی جلسوں میں اکثر طلوعِ اسلام کا وہ بند پڑھا جاتا تھا، جس کا پہلا مصرع یہ ہے:

غلامی میں نہ کام آتی ہیں شمشیریں نہ تدبیریں

اسی بند میں اقبال کا وہ مصرع بھی شامل ہے، جسے جوہری توانائی کے بارے میں شاعرانہ دریافت کی سند کے طور پر پیش کرتے ہیں، مصرع یہ ہے:

لہو خورشید کا ٹپکے اگر ذرّہ کا دل چیریں

مولانا عقیل الرّحمان نے اس مصرع میں یوں تصرف کیا:

محمدﷺ ہی لکھا ہو گا اگر مسلم کا دل چیریں

اس نظم کے پڑھنے کے چند ماہ بعد مولانا عقیل الرّحمان ندوی جوانی میں انتقال کرگئے اور ان کی وہ بچیاں یتیم ہوگئیں جن کے نام انھوں نے محمدی اور احمدی رکھے تھے۔‘‘