کراچی: شہر قائد میں ایک اور مخدوش عمارت خالی نہ کرائی جا سکی، انتظامیہ کسی بڑے حادثے کا انتظار کرنے لگی ہے۔

تفصیلات کے مطابق کراچی کے علاقے اولڈ ایریا میں ایک اور مخدوش عمارت کے گرنے کا خطرہ ہے، تاہم انتظامیہ اس عمارت کو بھی خالی نہ کرا سکی ہے۔

سول اسپتال کے قریب رنچھوڑ لائن میں مخدوش قرار دی جانے والی عمارت کئی جانوں کے لیے خطرہ بن گئی ہے، 2 منزلہ عمارت میں 4 فیملیز رہائش پذیر ہیں، اور اس کے گراؤنڈ پر ہوٹل بھی قائم ہے۔

عمارت کئی جگہ سے رسنا شروع ہو گئی ہے، دیواروں میں کریک پڑ چکے ہیں، اور خستہ حالی کا یہ عالم ہے کہ دیواروں میں سریا بھی کئی جگہ سے نظر آنے لگا ہے۔

کراچی میں ایک اور غیرقانونی عمارت گرانے کا حکم

سندھ بلڈنگ کنٹرول اتھارٹی (ایس بی سی اے) نے عمارت کو مخدوش قرار دے کر خالی کرنے کے احکامات جاری کر کے جان چھڑا لی ہے، دوسری طرف یوٹیلیٹی کنکشنز منقطع کرنے کے باوجود رہائشیوں اور ہوٹل مالک نے غیر قانونی کنڈے استعمال کرنا شروع کر دیے ہیں۔

ڈپٹی کمشنر جنوبی کی جانب سے بھی رہائشیوں کو بلڈنگ خالی کرانے کے اقدامات نہ کیے جا سکے، رہائشیوں کو خطرناک بلڈنگ چھوڑنے کے صرف ریمائنڈرز بھیج کر فائلوں کا پیٹ بھر دیا گیا۔

واضح رہے کہ ایس بی سی اے اور ڈپٹی کمشنرز اپنی رپورٹ میں عمارت کو رہائش کے لیے خطرناک قرار دے چکے ہیں۔

کراچی: سانحہ گلبہار سے بھی متعلقہ اداروں کو ہوش نہ آیا، مخدوش اور خطرناک قرار دی گئی عمارت میں تعلیمی سرگرمیاں جاری ہیں۔

تفصیلات کے مطابق مخدوش عمارتوں سے شہریوں کے تحفظ کے اقدامات نظر انداز کر دیے گئے، خطرناک قرار دی گئی عمارت میں تعلیمی سرگرمیاں بدستور جاری ہیں، عمارت کو خطرناک قرار دینے کے 4 سال بعد بھی مسمار نہیں کیا گیا۔

اے آر وائی نیوز کے مطابق ناظم آباد ایک نمبر میں واقع قدیم رہایشی عمارت میں سرکاری اسکول قائم ہے، گورنمنٹ بوائز سیکنڈری اسکول کے طلبہ، اساتذہ اور دیگر اسٹاف کی زندگیوں کو خطرہ لاحق ہے، ایس بی سی اے اور محکمہ تعلیم سندھ نے حفاظتی اقدامات نظر انداز کر دیے۔

کراچی میں گرنے والی عمارت کا بلڈر پنجاب سے گرفتار

یاد رہے کہ سندھ بلڈنگ کنٹرول اتھارٹی نے عمارت خالی کر کے فوری مسمار کرنے کا حتمی نوٹس جاری کیا تھا، یہ خدشہ بھی ظاہر کیا گیا تھا کہ عمارت کسی بھی وقت گر سکتی ہے، تاہم عمارت خطرناک قرار دینے کے باوجود اداروں کی غفلت کی وجہ سے اسکول کی شفٹنگ نظر انداز کی گئی ہے۔

خیال رہے کہ کراچی کے علاقے رضویہ سوسائٹی میں واقع گلبہار نمبر 2 پھول والی گلی میں جمعرات کے روز رہائشی عمارت اچانک منہدم ہو گئی تھی جس کے نیچے دب کر 27 افراد جاں بحق ہو گئے تھے۔ پولیس نے ایس بی سی اے کے تین افسران کو گرفتار کر لیا ہے، عمارت کے مفرور بلڈر جاوید کو بھی گزشتہ روز پنجاب سے گرفتار کر لیا گیا ہے۔