اسلام آباد: حکومت اور پی ٹی آئی مذاکراتی ٹیم کے درمیان عام انتخابات سے متعلق اہم پیش رفت ہوئی ہے۔
تفصیلات کے مطابق مذاکرات کا تیسرا دور ختم ہونے کے بعد میڈیا سے گفتگو کرتے ہوئے حکومتی مذاکراتی کمیٹی کے سربراہ اسحاق ڈار نے کہا کہ آج مذاکرات کا تیسرا دور تھا جس میں مثبت پیش رفت ہوئی ہے۔
وزیر خزانہ کا کہنا تھا کہ مذاکرات میں ابھی تک کسی ایک نقطے پر اتفاق نہیں ہوا ہے،الیکشن کب ہونے چاہئیں؟ دونوں جانب سےاپنی اپنی تجاویزدی گئیں۔
اسحاق ڈار نے کہا کہ مذاکرات میں اتفاق ہوچکا کہ ملک میں ایک ہی دن الیکشن میں بہتری ہے، یہ تجاویز لیکر دونوں فریقین اپنی اپنی قیادت سے مشاورت کرینگے اور بات چیت جاری رکھی جائے گی۔
اس موقع پر حکومتی مذاکراتی کمیٹی کے رکن یوسف رضا گیلانی نے کہا کہ آج کی میٹنگ میں اس پر بھی سیر حاصل گفتگو ہوئی کہ جو بھی الیکشن جیتے گا نتائج تسلیم کیے جائیں گے۔
اس سے قبل مذاکرات کے درمیان جب حکومتی ٹیم نے اپنی تجاویز پی ٹی آئی کمیٹی کے سامنے رکھی تو شاہ محمود قریشی نے مشاورت کے لئے عمران خان سے رابطہ کیا۔
اسی طرح پی ٹی آئی کی تجاویز پر خواجہ سعد رفیق نے وزیراعظم شہباز شریف اور یوسف رضا گیلانی نے آصف زرداری سے رابطہ کیا اور انہیں پی ٹی آئی کی تجاویز سے متعلق آگاہ کیا۔
