پشاور: پاکستان تحریک انصاف کے رہنما عمر ایوب نے کہا ہے کہ بانی پی ٹی آئی نے کمیٹی بنائی مگر حکومت کو مذاکرات میں دلچسپی نہیں۔
تفصیلات کے مطابق پی ٹی آئی رہنما اور قومی اسمبلی میں اپوزیشن لیڈر عمر ایوب نے پشاور ہائیکورٹ میں میڈیا سے گفتگو کرتے کہا کہ بانی پی ٹی آئی کے القادر ٹرسٹ کیس میں کل دیر تک عدالت میں سماعت جاری رہی، کیس میں کل دیر تک سماعت کیوں ہوئی؟کیس کا محفوظ فیصلہ 23 دسمبر کو آئے گا تو پتا چلے گا۔
پی ٹی آئی رہنما اور قومی اسمبلی میں اپوزیشن لیڈر عمر ایوب نے کہا کہ پی ٹی آئی کے کارکنان کو گنجائش سے زیادہ جیلوں میں رکھا ہوا ہے، ہم کسی سے ڈرنے والے نہیں ہیں۔
عمر ایوب کا کہنا تھا کہ مذکراتی کمیٹی بانی پی ٹی آئی نے تشکیل دی ہوئی ہے، لگتا ہے حکومت کو مذاکرات میں کوئی دلچسپی نہیں ہے، ہم کسی کے پاس نہیں جارہے،کسی نے مذاکرات کرنے ہیں تو کریں نہیں تو نہ کریں۔
واضح رہے چند دنوں سے حکومت اور تحریک انصاف کے درمیان مذاکرات کی خبریں زیر گردش ہیں مگر اب تک کسی جانب سے باقاعدہ مذاکرات شروع ہونے کی تصدیق نہیں کی گئی۔
اسلام آباد : حکومت اور پی ٹی آئی میں آج مذاکرات کا امکان ہے ، حکومتی ذرائع نے دعویٰ کیا ہے پی ٹی آئی نےحکومت سے بات چیت کے لیے رابطہ کیا۔
تفصیلات کے مطابق حکومت اور تحریک انصاف کے مذاکرات ہورہے ہیں یا صرف رابطے ہوئے ہیں ؟ حکومتی وزرا اور پی ٹی آئی رہنماؤں کے مبہم بیانات اور سول نافرنامی کی تحریک کی کال نے صورتحال کو واضح کرنے کے بجائے الجھادیا ہے۔
تحریک انصاف کے سیکرٹری اطلاعات شیخ وقاص اکرم نے حکومت سے رابطوں کا اعتراف کیا لیکن باضابطہ بات چیت کی نفی کی۔
دوسری جانب وزیراعظم کے سیاسی مشیر رانا ثنااللہ نےصاف صاف کہہ دیا مذاکرات نہیں رابطہ ہوا ہے۔
حکومت اور تحریک انصاف میں آج مذاکرات کا امکان ہے ، تحریک انصاف کے رابطے کے بعد حکومت نے مذاکرات کے لئے "ہاں” کردی ہے۔
حکومتی ذرائع نے دعویٰ کیا پاکستان تحریک انصاف نے حکومت سے بات چیت کے لیے رابطہ کیا اور پی ٹی آئی پیشگی مطالبات سے پیچھے ہٹ گئی ہے۔
ذرائع کا کہنا ہے کہ مفاہمت کی فضا پیدا کرنے کیلئے آمادہ ہوئے سیاست میں بات چیت ہی آگے بڑھنےکا راستہ ہوتا ہے انتشار نہیں۔
اس حوالے سے چیئرمین تحریک انصاف بیرسٹر گوہر کا کہنا تھا کہ سیاسی مسائل کامستقل حل ڈھونڈا جاناچاہیے، بانی پی ٹی آئی نے کمیٹی بنائی ہے تاکہ سیاسی مسائل کا مستقل حل ڈھونڈا جائے۔
اسلام آباد: پاکستان پیپلز پارٹی کی قیادت نے حکومت کے ساتھ مذاکرات کرنے والے وفد کو فرنٹ فٹ پر کھیلنے کی ہدایت کر دی ہے۔
پی پی ذرائع کے مطابق آج پیپلز پارٹی اور حکومت کے درمیان ہونے والے مذاکرات کی رپورٹ پی پی قیادت کو پیش کر دی گئی، مذاکراتی وفد نے پہلی ملاقات کی تحریری رپورٹ بلاول بھٹو کو پیش کی ہے۔
ذرائع کا کہنا ہے کہ پیپلز پارٹی نے کسی صورت مطالبات سے دستبردار نہ ہونے کا فیصلہ کیا ہے اور پی پی قیادت نے مذاکراتی وفد کو مؤقف سے پیچھے نہ ہٹنے کی ہدایت کی ہے۔
پیپلز پارٹی کا مؤقف ہے کہ وزرائے اعلیٰ اور گورنرز کے مطالبات اور تحفظات جائز ہیں اور عوامی نوعیت کے ہیں، پیپلز پارٹی عام آدمی، صوبوں کے حقوق کی جنگ لڑ رہی ہے، حکومت کا طے شدہ باتوں پر دوبارہ مذاکرات کرنا افسوس ناک ہے۔
پی پی ذرائع کے مطابق قیادت نے مذاکراتی وفد کو فرنٹ فٹ پر کھیلنے کی ہدایت کی ہے اور کہا ہے کہ پی پی طے شدہ تحریری معاہدے کے ہر نکتے کا بھرپور دفاع کرے گی، اور مذاکراتی وفد کو ہر ممکن تعاون فراہم کیا جائے گا۔
پارٹی قیادت نے وفد کو مذاکرات سے متعلق تفصیلی رپورٹنگ کی بھی ہدایت کی، ذرائع کا کہنا ہے کہ پی پی اور حکومت میں مذاکرات کا دوسرا دور 24 دسمبر کو لاہور میں ہوگا۔
اسلام آباد : حکومت اور پی ٹی آئی کے درمیان مذاکرات کا باضابطہ آغاز آج ہوگا ، صاحبزادہ حامدرضا نے مذاکرات کے آغاز کی تصدیق کردی۔
تفصیلات کے مطابق حکومت اورپی ٹی آئی کے درمیان مذاکرات کا باضابطہ آغاز آج ہونے جارہا ہے، پی ٹی آئی کی 5رکنی کمیٹی حکومتی کمیٹی سے مذاکرات کرے گی ، صاحبزادہ حامد رضا نے آج سے مذاکرات کے آغاز کی تصدیق کردی۔
صاحبزادہ حامدرضا نے میڈیا سے گفتگو کرتے ہوئے کہا کہ 5رکنی کمیٹی کےپاس مذاکرات کامینڈیٹ ہے، معاملات کو مذاکرات کے ذریعے حل کرنا چاہتے ہیں، جو بھی ہمارے ساتھ مذاکرات کرنا چاہے رابطہ کرسکتا ہے۔
چیئرمین سنی اتحاد کونسل کا کہنا تھا کہ مذاکرات پر ڈیولپمنٹ کی جہاں تک بات ہے امید ہے آج میٹنگ ہوگی، حکومت پہلے بھی کوئی قابل عمل چیزلےآتی توبات کرنے کو تیار تھے اب بھی تیار ہیں۔
انھوں نے کہا کہ حکومتی اراکین صرف پارلیمنٹ میں بات کر کے چلے جاتے تھے، کمیٹی کی کارروائی کو خفیہ رکھنا میری امانت ہے۔
وزیر داخلہ محسن نقوی نے کہا ہے کہ پاکستان تحریک انصاف تو مذاکرات پر آمادہ ہے لیکن ساری فساد کی جڑ خفیہ ہاتھ ہے۔
اے آر وائی نیوز کے مطابق وزیر داخلہ محسن نقوی اسلام آباد ڈی چوک سیکیورٹی انتظامات کا جائزہ لینے پہنچے جہاں انہوں نے میڈیا سے گفتگو کرتے ہوئے کہا کہ پی ٹی آئی تو مذاکرات پر آمادہ ہے لیکن فساد کی جڑ خفیہ ہاتھ ہے۔ پی ٹی آئی لیڈر شپ کا کنٹرول خفیہ لیڈر شپ کے ہاتھ میں ہے، جو سب پر بھاری ہے۔
انہوں نے کہا کہ پی ٹی آئی کو کنٹرول کرنیوالے خفیہ ہاتھ کا ایجنڈا پاکستان نہیں ہے بلکہ اس کے ارادے کچھ اور ہیں۔ بتا رہا ہوں کہ تحریک انصاف کے ساتھ ہاتھ ہونے والا ہے۔
وزیر داخلہ نے کہا کہ ہم نے ان سے ہر طریقے سے مذاکرات کیے اور کہا کہ ڈی چوک نہ جائیں کہیں اور جگہ دے دیتے ہیں۔ ہم نے مظاہرین کو سنگجانی کی جگہ آفر کی تھی۔ ان کی پارٹی قیادت سے کنفرم کر لیں کہ سنگجانی کی جگہ فائنل ہو گئی تھی اور انہوں نے دو بار سیز فائر کر کے کہا کہ سنگجانی جا رہے ہیں لیکن پی ٹی آئی کے مظاہرین اب کسی چیز کو ماننے کو تیار نہیں۔یہ مذاکرات کرتے ہیں، فیصلے بھی ہو جاتے ہیں مگر پھر مُکر جاتے ہیں۔
محسن نقوی نے بتایا کہ مظاہرین میں شامل لوگ آنسو گیس کے شیل فائر کیے گئے۔ یہ شیل کے پی حکومت نے مظاہرین کو فراہم کیے ہیں۔ پی ٹی آئی سرکاری شیل اور ہتھیار استعمال کر رہی ہے۔ مظاہرین بڑے بڑے پنکھے ساتھ لا رہے ہیں اور ان کی طرف سے آنسو گیس شیل ہو رہے ہیں، یہ حرکت ملک کی بدنامی ہے۔ ایک شیل ساڑھے 4 ہزار روپے کا ہے، ہزاروں شیل کہاں سے آئے؟
وزیر داخلہ نے کہا کہ کل 3 رینجرز اور ایک پنجاب پولیس کا جوان شہید ہوا، اے ایس پی سمیت درجنوں اہلکار زخمی ہوئے۔ گولی کا جواب گولی بہت آسان تھا لیکن ہم کسی بھی صورت جانی نقصان نہیں چاہتے ہیں۔
انہوں نے کہا کہ ہماری پہلی ترجیح ریڈ زون کا تحفظ ہے۔ پولیس کو صورتحال خود کنٹرول کرنے کا اختیار دے دیا ہے اور آئی جی اسلام آباد سے کہہ دیا ہے کہ ان کا اختیار ہے مظاہرین کو جس طرح مرضی ہینڈل کریں۔ مظاہرین میں شامل جو لوگ لڑائی کر رہے ہیں ان کی تفصیلات جمع کر لی گئی ہیں۔
پاکستان تحریک انصاف اور شہباز شریف حکومت کے درمیان مذاکرات ڈیڈ لاک کا شکار ہیں جس کو ختم کرنے کے لیے کوششیں جاری ہیں۔
اے آر وائی نیوز کو ذرائع سے ملنے والی اطلاعات کے مطابق بانی پی ٹی آئی عمران خان کے 24 نومبر کو اعلان کردہ احتجاج اور مطالبات کے حوالے سے پاکستان تحریک انصاف اور حکومت کے درمیان مذاکرا ڈیڈ لاک کا شکار ہوگئے ہیں۔
ذرائع کا کہنا ہے کہ فریقین کے درمیان مذاکرات میں ڈیڈ لاک بدھ کی شام سے ہے جب کہ اس سے قبل یہ مذاکرات مثبت انداز میں آگے بڑھ رہے تھے۔
ذرائع نے بتایا فریقین میں ڈیڈ لاک کی ایک وجہ تلخ باتیں اور نا قابل قبول مطالبات کا سامنے آنا ہے۔ تاہم یہ ڈیڈ لاک ختم کرنے کی کوششیں جاری ہیں۔
ذرائع نے یہ بھی بتایا کہ مذاکرات میں ناکامی پر پی ٹی آئی قیادت کو سخت کارروائی کا سامنا ہوگا۔ پارٹی کی اعلیٰ قیادت کو گرفتار کیا جا سکتا ہے اور انہیں پولیس کمانڈوز کا سامنا کرنا پڑ سکتا ہے۔
دوسری جانب پی ٹی آئی احتجاج کے پیش نظر اسلام آباد کو 24 مقامات سے بند کرنے کا فیصلہ کیا گیا ہے۔ احتجاج کی اعلان کردہ تاریخ 24 نومبر کو اسلام آباد کے داخلی اور خارجی راستوں پر بھاری نفری تعینات ہوگی۔
مری روڈ پر کنٹینرز لگا کر اسلام آباد آنے والا راستہ بند کیا جائے گا۔ روات ٹی چوک پر کنٹینرز لگائے جائیں گے جب کہ فیض آباد سے داخلی راستے پر کنٹینرز کی ڈبل لائن لگا کر رکاوٹیں کھڑی کی جائیں گی۔
اس کے علاوہ 26 نمبر چنگی سے اسلام آباد کا داخلی راستہ بند کیا جائے گا۔ سرینگر ہائی وے سے اسلام آباد انٹری کنٹینرز لگا کر بند کی جائے گی۔ فیض آباد، سیکٹر آئی 8، آئی جے پی ڈبل روڈ، مارگلہ روڈ بھی بند کیا جائے گا۔ گولڑہ موڑ فلائی اوور، انڈر پاس پر بھی کنٹینرز لگائے جائیں گے۔
ذرائع کا کہنا ہے کہ احتجاج کی صورت میں ریڈ زون کو مکمل سیل کرنے کا بھی فیصلہ کیا گیا ہے۔
تحریکِ انصاف کے ترجمان رؤف حسن کا کہنا ہے کہ امید کر سکتے ہیں کہ فوج اور پی ٹی آئی میں ڈیڈلاک مزید نہ رہے، یہ ریاست کے مفاد میں ہے۔
پاکستان تحریکِ انصاف(پی ٹی آئی) کے ترجمان رؤف حسن نے وائس آف امریکہ کو انٹرویو میں کہا کہ امید ہے پی ٹی آئی اور فوج میں ڈیڈ لاک مزید برقرار نہیں رہے گا اس وقت فوج اور پی ٹی آئی میں بات چیت اشد ضروری ہے۔
رؤف حسن نے کہا کہ فوج اور پی ٹی آئی میں بلا تاخیر مذاکرات کا آغاز ہونا چاہئے، پی ٹی آئی ہمیشہ سے فوج سے بات چیت کرنا چاہتی ہے، ہمارے دروازے کھلے ہیں، فوج اور پی ٹی آئی کے درمیان بات چیت ریاست کے مفاد میں ہے۔
پی ٹی آئی ترجمان نے کہا کہ الیکشن مینڈیٹ حقیقی لوگوں کے پاس جانا چاہئے، سیاسی استحکام کے لیے پی ٹی آئی کے مینڈیٹ کو تسلیم کیا جائے، عدالتی عمل یا نئے انتخابات سے مینڈیٹ کی تصیح کی جائے۔
رؤف حسن کا کہنا تھا کہ فوج کو سیاست میں نہیں لانا چاہتے لیکن آگے بڑھنے کا راستہ فوج سے بات چیت میں ہی نکلتا ہے، اس وقت طاقت حکومت کے پاس نہیں بلکہ فوج کے پاس ہے اس لیے حکومت نہیں فوج سے ہی بات فائدہ مند ہوسکتی ہے۔
انہوں نے کہا کہ بڑی جماعت اور طاقتور ادارے کے درمیان بات چیت ضروری ہے، پی ٹی آئی مینڈیٹ کو تسلیم کرنے کی طاقت فوج کے پاس ہے، فوج سے مذاکرات کے لیے جو کرسکتے تھے وہ کیا ہے۔
رؤف حسن نے کہا کہ جوڈیشل کمیشن کے ذریعے 9 مئی کی تحقیقات کی جائیں، 9 مئی کے شواہد سامنے لائیں جائیں تو معافی مانگیں گے۔
رؤف حسن نے کہا کہ پارٹی رہنماوں کا ذاتی حیثیت میں فوج سے رابطہ ہے، ذاتی رابطے پی ٹی آئی اور مقتدرہ مذاکرات میں مددگار ہوں گے، اسٹیبلشمنٹ رابطے کے نتیجے میں ہی 22 اگست کا جلسہ ملتوی کیا۔
ترجمان پی ٹی آئی نے کہا کہ بانی پی ٹی آئی نے محمود اچکزئی کو مذاکرات کا اختیار دیا ہے، سیاسی جماعتوں سے نتیجہ نکلے تو محموداچکزئی فوج سے بات کر سکتے ہیں۔
رؤف حسن کا کہنا تھا کہ حکومت عدلیہ کو زیر اثر کرنے میں کامیاب نہیں ہوگی، عدلیہ کی حمایت کے بغیر حکومت کھڑی نہیں رہ سکتی، اور عدلیہ میں خود مختاری ثابت کرنے کی لہر آئی ہوئی ہے۔
ترجمان پی ٹی آئی نے کہا کہ وزیر اطلاعات ملک دشمن عناصر سے رابطے کے دعوے کو ثابت کریں، میرا ملک دشمن عناصر سے کوئی رابطہ نہیں ہے، ان کے پاس ایسے کوئی شواہد نہیں جو ریاست مخالفت کے زمرے میں آئیں، پارلیمنٹ اور عدلیہ کے بعد سب سڑکوں پر تحریک چلائیں گے۔
رؤف حسن کا کہنا تھا کہ 8 ستمبر سے ملک گیر تحریک کا آغاز کررہے ہیں، پاکستان کے تمام بڑے شہروں میں جلسے ہوں گے، اجازت ملے یا نہ ملے 8 ستمبر کو جلسہ ہر حال میں ہوگا، پارلیمنٹ اور عدلیہ کے بعد اب سڑکوں پر تحریک چلائیں گے۔
رؤف حسن نے مزید کہا کہ اختلاف اتحاد میں مزید جماعتیں شامل ہونے جارہی ہیں، جے یو آئی سے مشترکہ حکمت عملی اپنانے پر اتفاق ہوا ہے، پی ٹی آئی وفد کی مولانا فضل الرحمان سے ملاقات بہت خوشگوار رہی ہے، جے یو آئی سے دوطرفہ سطح پر معاملات کو آگے بڑھایا جائے گا۔
پاکستان تحریک انصاف کی قیادت مذاکرات کیلئے حکومتی کمیٹی کی تشکیل سے لاعلم نکلی۔
تفصیلات کے مطابق پاکستان تحریک انصاف کی قیادت مذاکرات کیلئے حکومتی کمیٹی کی تشکیل سے لاعلم نکلی، بیرسٹر گوہر نے میڈیا سے گفتگو میں کہا کہ حکومتی کمیٹی کی تشکیل کے بارے میں کسی نے نہیں بتایا تاہم بات چیت کیلئے حکومتی کمیٹی کی تشکیل اچھی بات ہے۔
پی ٹی آئی چیئرمین بیرسٹر گوہر علی خان کا کہنا تھا کہ ہماری طرف سے بات چیت کا اختیار محمود اچکزئی کو دیا گیا ہے، محمود اچکزئی کے حکومت سے مذاکرات کرنے پر اعتراض نہیں۔
بیرسٹر گوہر نے کہا کہ محمود اچکزئی حکومتی کمیٹی سے بات چیت کر کے تجاویز لاتے ہیں تو غور کریں گے، عمران خان نے بھی ہفتوں پہلے محمود اچکزئی کو بات چیت کی اجازت دے رکھی ہے، محمود اچکزئی سے مذاکرات کب اور کس بنیاد پر کرنے ہیں یا حکومت کی صوابدید ہے۔
واضح رہے کہ پاکستان تحریک انصاف سے بالواسطہ بات چیت کیلئے مسلم لیگ ن محمود خان اچکزئی سے رابطے میں ہے۔
ذرائع کا اس حوالے سے کہنا ہے کہ نون لیگ کے سینئر رہنما نے محمود اچکزئی سے بات کرنے کی ذمہ داری دی گئی ہے تاہم، نون لیگ کا اصرار ہے کہ پی ٹی آئی کے ساتھ اس کے اور اس کی اتحادی جماعتوں کے مذاکرات براہِ راست ہوں، بالواسطہ بات چیت فضول مشق ہوگی۔
کابل: افغان حکومت نے امریکی شہریوں کے افغانستان میں داخلے کیلئے شرط رکھ دی۔
میڈیا رپورٹس کے مطابق افغان وزیرخارجہ امیر خان متقی نے امریکا سمیت دیگر ممالک سے بہتر تعلقات کی خواہش ظاہر کرتے ہوئے کہا کہ امریکی شہری فوجی وردی کے بغیر کاروبار یا سفارتی تعلقات کیلئے افغانستان آسکتے ہیں۔
امیر خان متقی نے کہا کہ دوحا مذاکرات میں امریکا کو بتایا تھا اور اب بھی کہتے ہیں ہم کسی بھی امریکی کو فوجی وردی میں افغانستان میں قبول نہیں کر سکتے لیکن اگر سفارتی سطح پر آئیں تو ہمیں کوئی مسئلہ نہیں۔
امیر متقی نے یہ بھی کہا کہ امریکا کی نقد امداد عبوری حکومت تک نہیں پہنچی، گزشتہ تین برس میں امریکی حکومت نے ایک ڈالربھی عبوری حکومت کو فراہم نہیں کیا۔
راولپنڈی : حکومت اور جماعت اسلامی کے درمیان مذاکرات کا تیسرا دور بھی بے نتیجہ ختم ہوگیا، لیاقت بلوچ کا کہنا ہے کہ ہمارا دوٹوک مؤقف ہے کہ ہم عوام کے لیے ریلیف چاہتے ہیں۔
تفصیلات کے مطابق حکومت اورجماعت اسلامی کے درمیان مذاکرات کا تیسرا دور بھی بے نتیجہ رہا اور مذاکرات میں کوئی پیشرفت نہ ہوسکی۔
آج پھر مذاکرات ہوں گے، ڈائیلاگ 6دن تعطل کا شکار رہے، حافظ نعیم کے7 اگست کو مارچ کے اعلان پر حکومتی کمیٹی حرکت میں آئی۔
کمشنر ہاؤس میں بات چیت ایک گھنٹہ سے زائد جاری رہی، بات چیت میں پہلی بار وزیرداخلہ محسن نقوی بھی شریک ہوئے۔
بعد ازاں میڈیا سے گفتگو کرتے ہوئے جماعت اسلامی کی مذاکراتی کمیٹی کے سربراہ لیاقت بلوچ نے کہا کہ ہم نے حکومت کے سامنے مؤقف رکھا ہے، حکومت ہماری تجاویز پر جواب دے گی۔
انہوں نے میڈیا کو بتایا ہم نے دوٹوک الفاظ میں کہا ہے کہ عوام کیلئے ریلیف چاہتے ہیں، باتیں سب اچھی کرتے ہیں، لالی پاپ دینا حکمرانوں کے بائیں ہاتھ کا کام ہوتا ہے۔
حکومت کی کمیٹی کی جانب سے تحریری صورت میں تجاویز دی جائیں گی، حکومتی کمیٹی کی تجاویز پر امیرجماعت اسلامی سے مشاورت کریں گے۔
لیاقت بلوچ نے کہا کہ ہم کسی کے مطالبے پر نہیں رکیں گے، عوام کو ریلیف دلوا کر ہی یہاں سے جائیں گے، ہمارا مسئلہ ذاتی نہیں ہے، عوام کے لیے ریلیف چاہتے ہیں۔
ان کا کہنا تھا کہ دھرنے سے متعلق ہم اپنا فیصلہ کرنے میں آزاد ہیں، حافظ نعیم الرحمان نے جو اعلانات کیے ہیں اس کے مطابق چلیں گے، ہم وہی اقدام کریں گے جو عوام کے حق میں ہوں۔
مذاکرات میں کہا کہ کمیٹی تو غائب ہوگئی تھی ہم نے اشتہارات دیئے، حکومتی کمیٹی نے کہا کہ ہم بھی اشتہار دیکھ کر ہی آئے ہیں۔
واضح رہے کہ جماعت اسلامی پاکستان کا بجلی کی زائد قیمتوں، آئی پی پیز اور مہنگائی و ٹیکسز کے خلاف پنجاب کے شہر راولپنڈی میں دھرنا 26 جولائی سے جاری ہے جسے 12 روز گزر چکے ہیں۔
اس کے علاوہ جماعت اسلامی کی جانب سے گورنر ہاؤس کراچی میں دیا جانے والا دھرنا بھی پانچویں روز میں داخل ہوچکا ہے۔
