لاہور : پنجاب اسمبلی میں شام پر امریکہ اور اسکے اتحادیوں کے حملے کے خلاف مذمتی قرارداد جمع کرادی گئی ، قرارداد میں اقوام متحدہ اور مسلم ممالک کی تنظیم او آئی سی سے فوری مداخلت کا مطالبہ کیا گیا ہے۔
تفصیلات کے مطابق پنجاب اسمبلی میں شام پر امریکہ اور اسکے اتحادیوں کے حملے کے خلاف مذمتی قرارداد جمع کرادی گئی ، مذمتی قرارداد حکمران جماعت مسلم لیگ نون کی رکن حنا پرویز بٹ کی جانب سے جمع کروائی۔
قرارداد میں مطالبہ کیا گیا کہ شامی حکومت کی جانب سے اپنے شہریوں پر کیمیائی ہتھیاروں کے استعمال کو آڑ بنا کر امریکہ ، برطانیہ اور فرانس کی جانب سے شام پر فضائی حملہ دنیا کے امن کو تباہ کرنے کی سازش ہے۔
دوسری جانب اپوزیشن کے رکن ملک تیمور مسعود کی جانب سے پنجاب پولیس اور بالخصوص ڈولفن فورس کے خلاف قرارداد جمع کروائی گئی، قرارداد میں موقف اختیار کیا گیا کہ اربوں روپوں کی سرمایہ کاری سے پنجاب میں بننے والی نئی ڈولفن فورس امن و امان کے قیام میں مکمل طور پر ناکام ہو چکی ہے۔ صوبے میں گذشتہ تین ماہ کے دوران سو سے زائد افراد کا بے رحمانہ قتل اور سینکڑوں ڈکیتی کی وارداتیں ہوئیں ۔
مزید پڑھیں : امریکہ اور اس کے اتحادیوں نے شام پرحملہ کردیا
پیپلز پارٹی کے رکن میاں خرم جہانگیر وٹو کی جانب صوبے میں خواتین اور بچوں سے جسم فروشی اور ہیروئن کی سرعام فروخت کے خلاف قرارداد جمع کروائی گئی ، قرارداد میں موقف اختیار کیا گیا کہ پولیس کی ایماءپر مختلف شہروں میں چلنے والے اس مکروہ دھندے کے خلاف شہریوں میں شدید غم و غصہ پایا جاتا ہے۔
یاد رہے کہ امریکا نے اتحادیوں کے ساتھ مل کرشام پرحملہ کیا ، امریکی اوربرطانوی میزائلوں نے دوما شہر میں فوجی تنصیبات اور کیمیائی ہتھیاروں کے ذخیرے کونشانہ بنایا۔
