کراچی: سندھ کے مشیر اطلاعات مرتضیٰ وہاب کا کہنا تھا کہ جس صوبے میں گیس دریافت ہوتی ہے پہلا حق ان کا ہوتا ہے، آئین میں ہونے کے باوجود گیس فراہم نہیں کی جارہی۔
تفصیلات کے مطابق سندھ کے مشیر اطلاعات مرتضیٰ وہاب نے میڈیا سے گفتگو کرتے ہوئے کہا کہ ہماری بجلی منقطع کی گئی ہے اس کو بحال کیا جائے، بجلی کی بندش سے پانی کا مسئلہ اور بڑھے گا۔
مرتضیٰ وہاب کا کہنا تھا کہ جس صوبے میں گیس دریافت ہوتی ہے پہلا حق ان کا ہوتا ہے، آئین میں ہونے کے باوجود گیس فراہم نہیں کی جارہی۔ وفاقی حکومت نعروں سے باہر نکلے اور کام پر توجہ دے، جو وعدے کیے تھے وفاقی حکومت وہ وفا کرے۔
انہوں نے کہا کہ گورنر خود سی این جی اسٹیشن گئے تھے کھلوانے، خالی ہاتھ لوٹے۔ ’کہیں تو سندھ والوں کے ساتھ انصاف کرو‘۔
مشیر اطلاعات کا کہنا تھا کہ وفاقی حکومت نے واجبات ادائیگی کی کوئی یقین دہانی نہیں کروائی ہے، یقین دہانی کروائی گئی تھی اسکرونٹی کے واجبات کلیئر کیے جائیں گے۔
انہوں نے مزید کہا کہ ایم پی اے پر فائرنگ کے واقعے کی مذمت کرتا ہوں، کل واقعے میں 2 گرفتاریاں ہوچکی ہیں۔ پولیس ایک بار تفتیش مکمل کرلے معاملہ سامنے لائیں گے، کل کے واقعے کے بعد ایس ایچ او معطل کیا ہے۔
خیال رہے کہ گزشتہ رات کراچی کے علاقے پرانا حاجی کیمپ میں تحریک انصاف کے رکن صوبائی اسمبلی رمضان گھانچی پر فائرنگ کی گئی تھی جس کے باعث وہ زخمی ہوگئے۔
سندھ اسمبلی کے حلقے پی ایس 109 سے منختب ہونے والے رکن صوبائی اسمبلی رمضان گھانچی کو سول اسپتال میں ابتدائی طبی امداد فراہم کرنے کے بعد نجی اسپتال منتقل کیا گیا۔
واقعے کا مقدمہ رمضان گھانچی کی مدعیت میں درج کرلیا گیا۔ نیپئر تھانے میں درج مقدمے میں 4 ملزمان کو نامزد کیا گیا جن میں سے 2 ملزمان گرفتار کرلیے گئے ہیں۔
