ریاض: سعودی عرب میں خواتین کو گاڑیوں کی مینٹیننس اور مرمت کی تربیت دی جارہی ہے، ٹریننگ پروگرام کے لیے ماہر اور اعلیٰ سند یافتہ ٹرینرز کا انتخاب کیا گیا ہے۔
اردو نیوز کے مطابق سعودی عرب میں ٹیکنالوجی کالج اور ٹیکنیکل اینڈ ووکیشنل ٹریننگ کارپوریشن کے ماتحت ثانوی صنعتی ادارے نے کہا ہے کہ سعودی خواتین کو گاڑیوں کی اصلاح و مرمت کا تربیتی پروگرام کروایا جائے گا۔
شمالی حدود ریجن میں رفحا اور عرعر نیز مدینہ ریجن کی العلا کمشنری میں سعودی خواتین کو گاڑیوں کی مینٹیننس کا تربیتی پروگرام کروایا گیا ہے جس میں کامیابی ہوئی ہے، اب اس کا دائرہ وسیع کر کے دیگر علاقوں میں بھی پھیلایا جائے گا۔
ادارے کا کہنا ہے کہ اس پروگرام کا مقصد خواتین کو ٹیکنالوجی کے تمام شعبوں میں خود مختار بنانا اور گاڑیوں کی اصلاح و مرمت کے تمام کام سکھانا ہے۔
پروگرام کے تحت خواتین کو بریک سسٹم، لائٹ کے نظام، گاڑیوں کی بیٹری، الیکٹرانک سسٹم، انواع و اقسام کے ٹائر، انجن کو ٹھنڈا کرنے والے نظام اور موبیل آئل تبدیل کرنے سمیت تمام امور سکھائے جا رہے ہیں۔
ٹریننگ پروگرام کے لیے ماہر اور اعلیٰ سند یافتہ ٹرینرز کا انتخاب کیا گیا ہے۔
ٹریننگ پروگرام میں شریک کئی خواتین کا کہنا ہے کہ وہ ٹریننگ کے بعد گاڑیوں کی معمولی خرابی کی نشاندہی کامیابی سے کر سکتی ہیں۔
ٹیکنیکل اینڈ ووکیشنل ٹریننگ کارپوریشن نے تعلیمی اور تربیتی خدمات کا معیار بہتر بنانے کے لیے 6 انٹرنیشنل ٹیکنالوجی کالجوں کی نجکاری کی کارروائی شروع کی ہے۔
ریاض کا انٹرنیشنل ہوٹلنگ کالج، الخبر کا انٹرنیشنل ٹیکنالوجی گرلز کالج، مکہ مکرمہ کا انٹرنیشنل گرلز کالج، اسی طرح قطیف، جدہ اور مدینہ منورہ کے ٹیکنالوجی کالج اس پروگرام کے لیے مختص کیے ہیں۔
