لاہور : ایم فِل کی گولڈ میڈلسٹ طالبہ سے اجتماعی زیادتی کیس کے مرکزی ملزم نے دوران تفتیش اہم انکشاف کرتے ہوئے گینگ ریپ کے الزام کو جھوٹا قرار دے دیا۔
تفصیلات کے مطابق لاہور پولیس نےگورنمنٹ کالج یونیورسٹی کی ایم فِل کی طالبہ سےمبینہ اجتماعی زیادتی کے مقدمے میں ملوث مرکزی ملزم نے ابتدائی تفتیش میں کہا ہے کہ شادی سے انکار پر طالبہ نے گینگ ریپ کا الزام عائد کیا۔
پولیس ذرائع کا کہنا تھا کہ ملزم حسیب نے دوران تفتیش انکشاف کیا کہ دونوں نے مرضی سے ناجائز تعلقات استوار کیے تھے ،گینگ ریپ کا الزام جھوٹا ہے۔
ذرائع نے کہا کہ دونوں کے موبائل فونز سے ملزم کے دعوے کی تصدیق ہوئی ہے ، شادی کے اصرار پر ملزم نے طالبہ کا موبائل نمبر بلاک کیا تو اختلافات شدت اختیار کرگئے۔
مزید پڑھیں : یونیورسٹی کی گولڈ میڈلسٹ طالبہ کا گینگ ریپ
پولیس نے بتایا کہ مبینہ اجتماعی زیادتی کے مرکزی ملزم حسیب کو گزشتہ رات گرفتار کر لیا گیا تھا جبکہ اس کےدیگر2 ساتھیوں طلحہ اور حمزہ کی تلاش جاری ہے۔
متاثرہ طالبہ کا عدالتی حکم پر طبی معائنہ کروایا جا رہا ہے، طالبہ کا الزام ہے کہ تین ملزمان نے 10 جنوری کو سندر کے علاقے میں واقع ایک نجی سوسائٹی میں زیادتی کا نشانہ بنایا۔
جس کے بعد 21 جنوری کو ایک وکیل کی وساطت سے پولیس سے رجوع کیا اور مقدمہ درج ہو گیا، دونوں کی سوشل میڈیا پر دوستی ہوئی تھی۔
